Au. Taja pan Bup Kudus ukai bup sains, tang penerang dalam Bup Kudus pasal sains nya endang amat. Peratika sekeda chunto ti nunjukka ajar ari Bup Kudus nya sejalai enggau sains sereta baka ni penerang dalam Bup Kudus pasal sains nya ngelui jeman nya.

•   Dunya raya bisi pun. (Pemungkal 1:1) Tang, mayuh cherita kelia madahka dunya raya nya enda ditempa tang datai ari proses ke enda teratur. Orang Babilon pechaya, bala petara ke ngaga dunya raya datai ari dua iti tasik. Bisi ensera ke bukai madahka dunya raya datai ari sigi telu ti amat besai.

•   Utai ke nyadi ninting hari ba dunya raya nya ketegal atur ti endang udah ditetapka, ukai datai ari asai ati bala petara. (Jop 38:33; Jeremiah 33:25) Cherita ari serata dunya madahka, orang kelia nadai daya ketegal ulah bala petara ti jai.

•   Dunya digitang ba langit ti puang. (Jop 26:7) Mayuh orang ba jeman kelia pechaya, dunya tu rata lalu disan jelu ti besai baka kerebau tauka kekura.

•   Sungai enggau mata ai datai ari wap ai tasik enggau endur ti bukai ke niki ngagai remang lalu nurun baru ngagai dunya nengah ujan, seleju, tauka ujan batu. (Jop 36:27, 28; Pengajar 1:7; Isaiah 55:10; Amos 9:6) Orang Gerika kelia ngumbai sungai datai ari tasik baruh tanah, lalu sida terus pechaya utai tu nyentuk ngagai abad ke-18.

•   Bukit pansut sereta dilamun ai. Lalu, sekeda bukit kemayaharitu dalam tasik suba. (Masmur 104:6, 8) Tang, bisi sekeda ensera madahka, bala petara meh ke ngaga bukit kemayaharitu.

•   Pemeresi ulih nyaga pengerai. Ba Adat ke diberi ngagai orang Israel, bisi pesan ke ngasuh sida masu gari pengudah negu bangkai, nyeraraka sida ti bisi penyakit ke ulih ngerampit, sereta chara nanam tai ngambika enda mai penyakit. (Adat Lewi 11:28; 13:1-5; Ulang Adat 23:13) Tang, orang Ejip ke diau sama jeman enggau orang Israel ngena ubat ke dichampur enggau tai mensia kena ngubat telih.

 Enda. Enti kitai mansik Bup Kudus, kitai ulih meda ajar Bup Kudus nya seruran sejalai enggau sains. Ba ditu, bisi sekeda runding ti salah ke dikembuan orang pasal penerang ba Bup Kudus:

 Runding ti Salah: Bup Kudus madahka dunya raya ditempa dalam timpuh 6 hari biasa (1 hari nya 24 jam).

 Utai ti Bendar: Nitihka Bup Kudus, Petara udah lama nempa dunya raya. Lalu Bup Kudus enda madahka enggau nyemetak kemaya iya ditempa. (Pemungkal 1:1) Kelimpah ari nya, “hari nempa” ke dipadah ba Pemungkal bagi 1 ditujuka ngagai timpuh ke enda ditemu pemanjai iya. Indah, timpuh ngaga langit enggau dunya mega dikumbai “sehari.”—Pemungkal 2:4.

 Runding ti Salah: Bup Kudus madahka utai tumbuh ditempa sebedau bisi mata panas ke diguna ngaga fotosintesis.—Pemungkal 1:11, 16.

 Utai ti Bendar: Bup Kudus madahka, mata panas nya siti ari utai ba “langit” ke ditempa sebedau utai tumbuh. (Pemungkal 1:1) Semina mimit aja penampak mata panas ke dipanchar ba dunya ba “hari” ti keterubah utai ditempa. Seraya langit majak terang, ba “hari” ti ketiga, penampak mata panas udah chukup kena ngaga proses fotosintesis. (Pemungkal 1:3-5, 12, 13) Ba “hari” ke nangkanka nya, mata panas ulih dipeda enggau terang ari dunya.—Pemungkal 1:16.

 Runding ti Salah: Bup Kudus madahka mata panas bepusin ngelingi dunya.

 Utai ti Bendar: Pengajar 1:5 madahka: “Mata panas semampai tumbuh semampai padam, pulai belubah-lubah ngagai endur alai iya ti deka berengkah baru.” Taja pia, ayat nya semina nunjuk ngagai pejalai mata panas ti ulih dipeda ari dunya. Kemayaharitu, kitai mega selalu ngumbai mata panas benung “tumbuh” tauka benung “padam.” Tang kitai nemu, dunya tu meh ke bepusin ngelingi mata panas.

 Runding ti Salah: Bup Kudus madahka dunya tu rata.

 Utai ti Bendar: Bup Kudus ngena leka jaku “ujung dunya” kena madahka pasal begian “dunya ti pemadu jauh.” Tu ukai reti iya dunya tu rata. (Kereja Rasul 1:8) Pia mega, leka jaku “empat iti sukut dunya” semina dikena ngambarka serata dunya. Kemayaharitu, orang mega ngena empat iti penunjuk kompas baka utara, selatan, timur enggau barat kena ngambarka utai ti sama.—Isaiah 11:12; Luke 13:29.