Bup Kudus nadai nerangka mayuh pasal eutanasia. a Tang, Bup Kudus meri kitai penemu ti betul pasal pengidup enggau pemati. Pengawa ti ngujungka nyawa seseiku orang lenyau nya salah. Taja pia, kitai enda ibuh kelalu bebendar deka ngemanjaika nyawa seseiku orang enti iya udah nyauka mati.

 Bup Kudus madahka kitai, Petara nya Penempa enggau “pun pengidup.” (Masmur 36:9; Kereja Rasul 17:28) Nyawa amat berega ba mata Petara. Nya kebuah, Petara enda sekali-kali ngemendarka seseiku orang ngelenyauka nyawa orang bukai tauka munuh diri. (Pemansut 20:13; 1 John 3:15) Kelimpah ari nya, Bup Kudus mega madahka kitai patut bejimat ngambika enda ngachau nyawa orang bukai tauka diri empu. (Ulang Adat 22:8) Terang amat, Petara dekaka kitai beterima kasihka nyawa ti diberi.

Baka ni enti orang nya benung sakit raya?

 Nitihka ajar Bup Kudus, kitai enda patut madamka seput seseiku orang taja pan iya endang sigi udah ditemu enda ulih idup agi. Peratika chunto Raja Saul ari Israel. Iya balat amat bakal maya ba siti perang. Nya kebuah, iya minta seiku ari nembiak ke mai senyata iya nyintak pedang lalu ngerejang nya ngagai iya. (1 Samuel 31:3, 4) Tang nembiak ke mai senyata nya enggai. Tang, seiku lelaki ke ngaku diri deka meri utai ke dipinta Saul ngereja pengawa nya. Pengudah David nemu utai tu, iya amat ringat enggau pengawa lelaki nya lalu ngumbai lelaki nya berutang darah. David ngayanka runding Jehovah pasal nyawa.—2 Samuel 1:6-16.

Kati kitai patut ngereja sebarang utai kena ngemanjaika seput diri?

 Bup Kudus nadai madah, seseiku orang patut ngemanjaika seput diri enti iya udah ba ujung nyawa. Tang, Bup Kudus meri kitai penemu ti betul pasal pengidup. Bup Kudus madahka pemati nya munsuh kitai ketegal dosa. (Rome 5:12; 1 Korint 15:26) Tang kitai enda ibuh kelalu takut enggau pemati, laban Petara besemaya deka ngidupka baru orang ke udah mati. (John 6:39, 40) Orang ke sayauka nyawa deka bebendar ngiga chara berubat ke ngena. Tang ukai reti iya, iya patut milih chara berubat ke ulih ngemanjaika nyawa diri taja pan udah nyauka mati.

Kati pengawa munuh diri nya dosa ti enda ulih diampunka?

 Ukai. Bup Kudus nadai nyimpan pengawa munuh diri nya dalam lis dosa ke enda ulih diampunka. Taja pan pengawa munuh diri nya dosa ti besai, b tang Petara ulih nemu sekeda utai ke ngasuh orang ngereja nya. Ngambika chunto, orang nya engka bisi penanggul ba untak, berasai balat amat ditekan, tauka penyakit peturun ke enda ulih diseliahka. (Masmur 103:13, 14) Nitihka ajar Bup Kudus, Petara deka meri pengelantang ngagai orang ke baka nya. Kelimpah ari nya, Bup Kudus mega madah, “Semua orang ke lurus enggau ke enda lurus deka diangkatka ari mati.” (Kereja Rasul 24:15) Reti iya, orang ke ngaga dosa besai baka munuh diri mega bisi peluang deka diangkatka idup baru.