Baka Ni Gamal Jesus?
Saut ari Bup Kudus
Laban Bup Kudus nadai madahka baka ni gamal Jesus, nya kebuah nadai seiku pan orang nemu baka ni gamal iya ke bendar. Tu nunjukka baka ni gamal Jesus nya ukai utai ti dikemeratka. Tang ba Bup Kudus bisi meri kitai penemu, ti ulih ngambarka mimit pasal gamal Jesus.
Gaya gamal: Jesus nya orang bansa Judah, lalu iya engka bisi murih sekeda ari pemanah indai iya. (Hebrew 7:14) Bisi sekali, iya mupuk ari Galili ngagai Jerusalem tang nadai orang ngelala iya. (John 7:10, 11) Nambahka nya, gamal Jesus mega enda tampak agi ari bala murid iya ke pemadu rapat. Nya kebuah, Judas Iskariot patut madahka ni bagi Jesus, ngagai orang mayuh ke deka nangkap iya.—Matthew 26:47-49.
Pemanjai buk: Laban dalam Bup Kudus bisi madahka, “lelaki ke panjai buk, ngemaluka diri empu”. Enti nitihka ayat tu, buk Jesus enda panjai.—1 Korint 11:14.
Ragum: Jesus bisi ragum. Iya nitihka adat orang Judah ke nagang lelaki ke udah besai tuai, ari “mipil ragum” sida. (Adat Lewi 19:27; Galatia 4:4) Nambahka nya, Bup Kudus bisi nyebut pasal ragum Jesus lebuh iya diperinsa.—Isaiah 50:6.
Gaya tubuh: Mayuh penerang ngambarka Jesus nya, kering sereta bepengerai. Jesus ulih bejalai jauh lebuh iya bejalaika pengawa nginjil. (Matthew 9:35) Iya kala dua kali meresi Rumah Petara enggau chara nungkupka mija sida penukar wang, pia mega kala muru jelu tupi ngena penyipat. (Luke 19:45, 46; John 2:14, 15) McClintock and Strong’s Cyclopedia madah, “Ari semua pengawa injil ke digaga Jesus, nunjukka iya bisi gaya tubuh ti gerai sereta kering.”—Volum IV, lambar 884.
Gaya mua: Jesus nya seiku orang ke rindu begulai sereta siru. Pemanah iya nya ulih dipeda ari gaya mua iya. (Matthew 11:28, 29) Mayuh orang ke datai ari mayuh macham chara pengidup, datai semak ngagai Jesus ngiga pengelantang sereta tulung. (Luke 5:12, 13; 7:37, 38) Indah bala anak mit pan rinduka Jesus.—Matthew 19:13-15; Mark 9:35-37.
Runding ti salah pasal gamal Jesus
Runding ti salah: Sekeda orang ngumbai Jesus nya datai ari peturun Afrika. Laban ba bup Pemandang mandingka buk iya sebaka enggau bulu bedus, lalu kaki iya “baka temaga ti udah dipugar”.—Pemandang 1:14, 15.
Fakta: Kena ngambarka aja, gaya gamal ke dipadah pasal Jesus ke bekaul enggau buk sereta kaki iya nya, enggau terang madah pasal pemanah Jesus pengudah iya diangkatka idup baru. Nya ukai nerang pasal gamal iya maya agi ba dunya. Bup Pemandang 1:14 madahka “pala enggau buk Iya burak baka bulu bedus, ngemurak seleju”. Iya ke bendar, kala buk Jesus ke burak nya madah pasal penemu ke dikembuan iya, ukai pasal umur iya. (Pemandang 3:14) Nya alai, ayat tu semina nyadika banding kena ngambarka Jesus, ukai ngegerang madah pasal gaya buk iya.
Kaki Jesus “baka temaga ti udah dipugar, baka ti udah dituchi ngena api”. (Pemandang 1:15) Nambahka nya, ‘mua iya beperenching baka penerang mata hari ti manchar tengah hari.’ (Pemandang 1:16) Nadai siti pan bansa ke ngembuan kala kulit baka utai ke dipadah nya. Nya kebuah, kitai ngumbai genera tu semina tanda ke madah pasal Jesus udah diangkatka idup baru, lalu “diau dalam penampak ti enda ulih digagai mensia, ke nadai kala dipeda, tauka ulih dipeda mensia.”—1 Timoti 6:16.
Runding ti salah: Jesus lemi sereta nadai pengering.
Fakta: Jesus enda lemi. Ngambika chunto, iya berani madahka diri ngagai orang mayuh ke bisi senyata ti deka nangkap iya. (John 18:4-8) Laban Jesus nya tukang kayu, lalu suah ngena perengka kereja ke kasar, iya tentu seiku lelaki ti kering.—Mark 6:3.
Enti pia, nama kebuah Jesus begunaka tulung maya iya ngesan tiang ke kena munuh iya? (Luke 23:26; John 19:31-33) Sebedau Jesus diukum mati, tubuh iya amat lemi. Iya enda ulih tinduk sepemanjai malam ketegal balat irau sereta tusah ati. (Luke 22:42-44) Ba malam nya mega, orang Judah ngelaban iya, lalu orang Rome merinsa iya ba pagi siti. (Matthew 26:67, 68; John 19:1-3) Nya engka kebuah ke ngasuh iya jampat agi mati.
Runding ti salah: Jesus selalu tusah ati.
Fakta: Bup Kudus ngambarka Jehovah nya Petara ti gaga ati, lalu Jesus neladan pemanah Apai iya ti di serega enggau sempurna. (1 Timoti 1:11; John 14:9) Indah, Jesus ngajar orang bukai chara ngulihka pengelantang. (Matthew 5:3-9; Luke 11:28) Ari semua fakta nya, kitai ulih nyimpulka mua Jesus suah agi gaga ati.
Nuan Engka Rindu Meda Tu
ESSENTIAL BIBLE TEACHINGS
Baka Ni Kitai Nemu Utai Ba Bup Kudus Nya Amat?
Enti Bup Kudus dikarang Petara, iya tentu enda baka bup bukai ke kala ditulis.
PASAL KAMI
Pinta Datai
Kerandauka tanya pasal Bup Kudus, tauka belajar mayuh agi pasal Saksi-Saksi Jehovah.