Dalam Bup Kudus endang udah madahkka, ba hari ti penudi penyakit (nyengkaum penyakit berampit) deka nyadi. Tang penyakit berampit ukai ukum ari Petara. Indah, enda lama da agi, Petara deka ngetuka semua penanggul ba pengerai, nyengkaum penyakit berampit nengah Perintah Iya.

•  Kati Bup Kudus bisi madah pasal penyakit berampit?

•  Kala Petara ngena penyakit ngukum orang?

•  Kati penyakit berampit ke benung nyadi nunjukka ukum ari Petara?

•  Kati penyakit berampit tu ulih diketuka?

•  Ayat Bup Kudus pasal penyakit

 Dalam Bup Kudus, enda madahka enggau nyemetak bansa penyakit ke nyadi. Baka COVID-19, AIDS, tauka renga Sepanyol. Tang Bup Kudus bisi madah, “penyakit” deka nyadi. (Luke 21:11; Pemandang 6:8) Semua tu, sebagi ari tanda “hari ti penudi.”—2 Timoti 3:1; Matthew 24:3.

 Dalam Bup Kudus, bisi beberapa iti utai ke nyadi nunjukka Petara ngena penyakit ngukum orang. Chunto, iya ngenataika penyakit kulit ngagai beberapa iku orang. (Penyampau 12:1-16; 2 Raja 5:20-27; 2 Bansa Israel 26:16-21) Petara ngena chara nya, kena ngukum sekeda orang ke ngelaban Iya. Tu jauh bida enggau penyakit berampit ke ngelekai ngagai sesapa aja.

 Ukai. Ba runding orang kemayaharitu, Petara ngena penyakit berampit tauka penyakit bukai ngukum orang. Tang, dalam Bup Kudus nadai bukti ti nunjukka Petara kitai baka nya. Nama kebuah?

 Kenyau ari kelia nyentukka diatu, sekeda ari penyembah Petara ke tetap ati pan kena penyakit. Chunto iya, Timoti merinsa laban “selalu sakit.” (1 Timoti 5:23) Tang nadai bukti ari Bup Kudus ke nunjukka, sida sakit ketegal Petara enda rinduka sida. Sama mega kemayaharitu, sekeda penyembah Petara ti tetap ati enda ulih nyeliahka diri ari sakit. Tu ketegal, engka sida ba endur tauka maya ti salah.—Pengajar 9:11.

 Nambahka nya, tu bedau maya iya alai Petara ngukum orang jai. Indah, kitai benung idup ba maya “hari pengelepas.” (2 Korint 6:2) Reti iya, diatu maya Petara benung mai semua orang semak ngagai Iya, ngambi ulih selamat. Siti chara ke dikena Iya, nengah pengawa nginjil ke madahka Berita Manah ngagai semua orang.—Matthew 24:14.

 Ke diatu, enda. Tang, dalam Bup Kudus bisi semaya, jemah ila semua penyakit deka nadai agi. Ba baruh Perintah Petara, semua penanggul ke bekaul enggau pengerai deka diketuka. (Isaiah 33:24; 35:5, 6) Iya mega deka ngetuka pemerinsa, penyakit, sereta pemati. (Pemandang 21:4) Iya mega deka ngidupka baru orang ti udah mati ngagai dunya tu, ngambi sida ulih ngasaika pengidup ti sempurna.—Masmur 37:29; Kereja Rasul 24:15.

 Pemandang 6:8: “Aku malik, lalu tepedaka siku kuda ti bechura pudar. Orang ke nepan kuda nya benama Pemati, dititihka Dunya Pemati. Seduai iya diberi kuasa . . . munuh mensia . . . ngena penyakit.”

 Reti: Utai ke ditulis dalam Bup Kudus, pasal empat iku orang ke nepan kuda, nunjukka penyakit berampit deka nyadi ba jeman kitai kemayaharitu.