“Ninting hari, laki bini patut sabar enggau pangan diri. Sebedau jadi, kitai nadai kala berundingka utai tu. Tang, tu meh pemanah ke patut dikemansangka kitai ngambi ulih lantang ba ruang bilik.”—John.

•  Nama kebuah nuan patut sabar?

•  Baka ni nuan ulih sabar?

•  “Sabar nya amat beguna”

•   Pengudah jadi, nuan deka nemu semua pengelemi kaling pengidup nuan.

   “Pengudah beberapa taun jadi, senang agi kitai meda pengurang kaling pengidup ari ke meda pemanah iya. Enti kitai majak meda pengelemi iya, kitai enda ulih sabar.”—Jessena.

•   Enti nuan enda sabar, nuan bejaku enggau enda berunding.

   “Aku orang ke beterus-terang. Enti aku ulih sabar, aku tentu ulih berunding dulu. Ari tu aku berati, ukai semua utai patut disebut aku magang.”—Carmen.

   Bup Kudus madah, “Pengerindu nya liat ati, nelap.” (1 Korint 13:4) Dua iku orang ke rinduka pangan diri patut sabar. Tang, nya enda senang. Baka ke dipadahka John tadi, “Ngembuan ulah ti manah endang begunaka awak. Chunto, kitai senang agi nyadi orang ke jampat ringat ari orang ke sabar. Nya alai, kitai patut bebendar ngemansangka ulah ti sabar.”

•   Lebuh utai ke enda disadang nyadi.

   Chunto: Lebuh kaling nuan bejaku kasar ngagai nuan. Nuan terus deka nyaut iya.

   Prinsip Bup Kudus: “Anang lengkar. Nuan beli enti nuan bedendam.”—Pengajar 7:9.

   Chara tetap sabar. Nguji nagang diri. Sebedau nyaut, kingatka diri empu, kaling nuan nadai ati deka ngemediska ati nuan. Bup Fighting for Your Marriage madahka, “Kekadang kitai ke leluba nyadang utai ke disebut kaling kitai nya, tang iya ke bendar, ukai baka nya reti ku iya.”

   Indah, enti sema kaling nuan sengaja ngasuh nuan pedis ati, nuan ulih nagang diri ari ke ngemesaika laya seduai nya enggau sabar. Bup Kudus ngelalau, “Api padam enti nadai kayu.”—Jaku Dalam 26:20.

   “Enti nuan pedis ati ngagai bini nuan, uji ngetu enda lama lalu perundingka baru, nama kebuah nuan sayauka iya. Udah nya, jejampat meh merindang ati iya baru.”—Ethan.

   Uji perunding:

  •  Nama deka digaga nuan enti kaling nuan nyebut tauka ngereja utai ke ngemediska ati nuan?

  •  Baka ni nuan ulih sabar enti nya nyadi baru?

•   Lebuh kaling nuan majak ngereja utai ke ngemediska ati.

   Chunto: Kaling nuan selalu laun. Ketegal tu, nuan selalu nganti iya, lalu ngujungka nuan pan enda ulih sabar agi.

   Prinsip Bup Kudus: “Sabar enggau pangan diri, lalu ampun pangan diri enti kita bisi enda nyamai ati ngagai pangan diri.”—Kolosi 3:13.

   Chara tetap sabar: Uji kemeratka kaul seduai ari ke majak berundingka diri empu. Perundingka: ‘Enti aku ringat lalu belayaka sesiti utai, kati nya ngemanahka kaul kami tauka ngasuh kaul kami rusak?’ Kingatka, “semua kitai bela ngereja mayuh macham penyalah.” (James 3:2) Reti iya, nuan empu mega bisi pengelemi.

   “Kekadang aku sabar agi enggau bala kaban ari laki aku empu. Aku ngasaika, engka laban aku suah agi begulai enggau laki aku. Aku nemu semua pengelemi iya. Tang enti aku sabar, nya nunjukka aku sayau sereta bebasaka iya. Nya utai ti amat beguna dalam tikah kami.”—Nia.

   Uji perunding:

  •  Kati nuan sabar enggau pengelemi kaling nuan?

  •  Baka ni nuan ulih sabar agi?