Laki bini enda ulih lantang ba tikah enti seduai iya enda pechayaka pangan diri. Baka ni nuan nyeliahka diri ari chemburu enti nadai kebuah?

Ba artikel tu

•  Nama reti chemburu?

•  Nama utai ke ngasuh nuan chemburu enggau nadai kebuah?

•  Baka ni nuan nagang diri ari chemburu?

•  Enti kaling pengidup nuan chemburu

•  Utai ke ulih dikerandau

 Nama reti chemburu?

 Leka jaku “chemburu” bisi mayuh reti. Ba artikel tu, reti chemburu nya asai ati kitai lebuh kitai ngasaika bisi orang bukai minat ngagai kaling pengidup kitai, tauka kaling pengidup kitai bisi minat ngagai orang bukai. Kitai engka ngasaika tikah kitai dalam bahaya. Enti utai tu amat, asai ati nuan ke chemburu nya biasa sereta endang patut. Nambahka nya, tikah siti kaul ti amat semak entara dua iku mensia, nya alai sepasang laki bini sigi bebendar ngetanka tikah sida.

 Prinsip Bup Kudus: “Seduai iya ukai dua iku agi, tang siku. . . . Nadai orang tau nyeraraka utai ti udah ditampilka Petara.”—Matthew 19:6.

 “Enti tikah kitai dalam bahaya, asai ati ti chemburu nya baka segenil ke ngingatka kitai bisi utai ke bahaya lalu kitai patut ngereja sesiti utai.”—Benjamin.

 Tang chemburu enggau nadai kebuah, datai ari asai ati ti nyangka sereta nadai bukti. Enti kitai amat rinduka kaling pengidup kitai, kitai nyeliahka diri ari chemburu enggau nadai kebuah. (1 Korint 13:4, 7) Dr. Robert L. Leahy nulis, “Enti nuan suah chemburu enggau nadai kebuah, iya ke amat tu ulih ngerusak kaul ke deka dijaga nuan.” a

 Nama utai ke ngasuh nuan chemburu enggau nadai kebuah?

 Siti kebuah nuan chemburu enggau nadai kebuah, engka ketegal suba nuan udah kala jadi enggau orang ke enda setia ngagai nuan. Tauka, ketegal apai indai nuan sarak laban enda setia, lalu nuan takut utai ti sama nyadi dalam tikah nuan.

 “Apai ngayahka indai aku maya aku agi biak, nya alai aku tusah ka pechayaka orang bukai. Utai ke nyadi tu ngachau emosi aku, lalu ngujungka aku kekadang tusah ka pechayaka laki aku.”—Melissa.

 Siti agi kebuah nya, enti nuan selalu berasai enda yakin diri, senang alai nuan ngembuan runding orang bukai deka ngachau tikah nuan. Indah nuan engka berengkah berunding, kaling nuan senang aja ngelengkaka nuan lalu jadi enggau orang bukai.

 “Kaban laki aku minta laki aku nyadi pengapit iya. Reti iya, laki aku patut beganding enggau pengapit indu ke bukai. Aku enda setuju enggau atur tu, lalu aku ngasuh iya nulak pengawa nya.”—Naomi.

 Atur tikah ba siti-siti menua enda sebaka, lalu orang Kristian patut diiring prinsip Bup Kudus. Kati asai ati Naomi nya patut? Lebuh iya ngenang baru utai ke nyadi, iya ngasaika diri chemburu enggau nadai kebuah. Ku iya madah, “Maya nya aku berasai enda yakin diri, lalu ba runding aku, laki aku mandingka aku enggau indu bukai, tang nya semina jangka aku aja.”

 Enda ngira nama, enti nuan berasai baka tu, iya nya chemburu enggau nadai kebuah, nuan ulih ngembuan runding ti salah pasal kaling pengidup nuan, lalu nuduh iya enda setia. Asai ati ke baka tu ulih ngenataika penanggul ba tikah indah ngachau pengerai nuan.

 Prinsip Bup Kudus: “Kepapas baka penyakit riman.”—Jaku-Dalam 14:30.

 Baka ni nuan nagang diri ari chemburu?

 Pechaya agi ke kaling nuan. Ari ke ngiga tanda iya enda setia, perundingka utai ke udah digaga kaling nuan nyadika kebuah nuan patut pechaya agi ke iya.

 “Aku berundingka pemanah laki aku. Enti iya kiruhka orang bukai, tu ketegal iya ibuhka orang nya, ukai ketegal tuju ati ti enda manah. Aku patut ngingatka diri empu, taja tikah apai indai aku udah rusak, ukai reti iya tikah aku mega rusak.”—Melissa.

 Anang nyimpulka utai ke dijangka nuan nya betul. Munyi ku Dr. Leahy tadi nulis, “Kitai suah pechaya, utai ke diperundingka kitai nya betul. Lalu kingatka mega, taja kitai ngasaika diri betul, kitai pan enda ulih nyadika nya bukti.” b

 “Enti kitai beratika sesiti utai ke nyadi lalu nyimpulka bisi utai ke enda manah, tu ulih mai penusah ngagai tikah kitai.”—Nadine.

 Kerandauka utai ke ngasuh nuan irau. Enda ngira nama utai ke ngasuh nuan chemburu, padahka meh pekara nya ngagai kaling nuan ngambika seduai ulih sama besetuju netapka tatak ti masuk akal maya begulai enggau orang bukai.

 “Maya kitai madahka utai ke ngasuh kitai irau ngagai kaling, kingatka mega iya enggai ngemediska ati nuan, lalu iya mega nguji ngaga pemutus ti manah ke seduai. Anang ngumbai iya bisi tuju ati ti enda manah. Engka nuan empu ke kelalu sensitif tauka kelalu ngarapka sesiti utai. Tauka, kaling nuan engka enda sedar iya enda meri nuan perhatian ke diguna nuan.”—Ciara.

 Prinsip Bup Kudus: “Awakka tiap iku orang seruran ngereja utai ke penguntung orang bukai, ukai ke penguntung diri empu.”—1 Korint 10:24.