Enti nuan bisi basa, nuan ulih ngemansangka tiga iti pekara tu dalam pengidup:

1.   Penampak rita nuan. Chara nuan begulai enggau orang bukai ulih meri impak ti manah tauka enda manah. Enti nuan bisi basa, orang nemu nuan nya seiku orang ti nemu berunding sereta betanggungjawap, lalu sida deka bebasaka nuan. Tang enti nuan nadai basa, nuan dikumbai orang ke berundingka diri empu. Tu ngujungka, nuan lenyau pengawa tauka peluang ke bukai. Baka ke dipadahka dalam Bup Kudus, “Enti nuan jai enggau orang, nuan semina ngemediska diri empu.”—Jaku Dalam 11:17.

2.   Chara nuan begulai enggau orang bukai. Bup Kudus madahka, “Lebih ari semua, rasukka pengerindu kena ngempung semua utai nyadi siti.” (Kolosi 3:14) Lalau tu amat manah, ngambi nuan bulih kaban ti bendar. Kesuah iya, kitai deka begulai enggau orang ke bisi basa sereta manah enggau kitai. Au, sapa deka bekaban enggau orang ke nadai basa sereta ngemediska ati?

3.   Chara orang bukai begulai enggau nuan. Seiku nembiak indu ke benama Jennifer madah, “Enti nuan selalu bisi basa, nyau kelama orang ke nadai basa pan manah enggau nuan.” Tang enti nuan nadai basa, orang bukai mega deka ngereja nuan baka nya. Bup Kudus madah, “Takar ti dikena kita nakar deka dikena nakar utai ke kita.”—Matthew 7:2.

 Nyadika simpul: Ninting hari kitai begulai enggau orang bukai. Chara nuan begulai enggau sida deka nunjukka chara sida begulai enggau nuan. Amat, bisi basa nya amat beguna!

1.   Meresa diri empu. Tanya diri empu, “Kati jaku aku bisi basa lebuh bejaku enggau orang tuai? Kati bisi aku nyebut, ‘terima kasih’, ‘tulung’, enggau ‘minta ampun’? Kati aku majak kisuk macha mesej lebuh benung bejaku enggau orang bukai? Kati aku bisi basa ngagai apai indai sereta bala madi aku? Tauka aku ngereja utai sepeneka diri, laban sida nya diri sebilik aku?”

    Bup Kudus madah : “Awakka kita berebut ngayanka basa ngagai pangan diri.”—Rome 12:10.

2.   Bisi juluk ati. Tuliska tiga iti pekara ke ulih dikereja nuan kena ngubah ulah diri. Chunto iya, Allison ke beumur 15 taun madah iya patut nyadi “peninga ti manah, ukai majak bejaku.” David ke beumur 19 taun madahka iya nguji enda bemesej lebuh iya benung bejaku enggau diri sebilik tauka bala kaban iya, laban pengawa nya enda nunjukka basa, lalu baka ke nunjukka kitai enggai bejaku enggau sida. Edward ke beumur 17 taun, madahka diri enggai nyelempak maya orang bukai benung bejaku. Jennifer ke kala disebut tadi, deka ngubah chara iya begulai enggau orang tuai. Iya madah, “Suba aku selalu nyebut ‘helo’ ngagai sida lalu jejampat mupuk, bejaku enggau bala kaban ke serambau aku. Tang diatu aku nguji deka ngelala sida. Tu nulung aku nunjukka basa!”

    Bup Kudus madah: “Anang semina berundingka diri empu aja, tang berunding mega ke orang bukai.”—Pilipi 2:4.

3.   Peresa pemansang diri. Kena dalam sebulan meresa pemansang nuan. Udah nya, tanya diri empu, “Kati aku bisi baik agi? Nama agi ulah bukai ke patut dikemansangka aku?” Udah nya, tetapka baru juluk ati.

    Bup Kudus madah: “Kereja ngagai orang baka ke dikedekaka kita kereja sida ngagai kita.”—Luke 6:31.