Kena 16 Disember 2020, a Kot Pililih Leninskiy ba Novosibirsk deka meri jaku gerah pasal kes Menyadi Yuriy Savelyev. Penawa udah minta kot meri ukum jil pengelama lapan taun ngagai Menyadi Yuriy. Enti nyadi, tu meh ukum jil ti pemadu lama ke diberi ngagai seiku Saksi kenyau ari taun 2017, lebuh Kot Besai Rusia mutuska nagang semua pengawa gerempung Saksi-Saksi Jehovah.

Yuriy Savelyev

• Ada: 1954 (Krokhalyovka, Begian Novosibirsk)

• Biograpi: Indai Yuriy nadai lebuh iya agi mit. Iya dibesaika madi tuai iya ke indu. Iya gawa nyadi tukang paip ba kilang tenaga. Pengudah bini iya nadai, iya belabuh bisi minat pasal pengarap. Semua tanya iya disaut dalam Bup Kudus. Iya nyadi seiku Saksi lalu dibaptisa kena taun 1996

Kena 8 November 2018, piak polis nyerungkai apartment iya sereta semilan buah rumah menyadi bukai di Begian Novosibirsk. Yuriy ditangkap lalu ditan nganti kes iya dipechara.

Yuriy dituduh ngatur pengawa Saksi-Saksi Jehovah ba nengeri iya. Taja pan udah bisi mayuh peminta ngelepaska Menyadi Yuriy, tang timpuh iya ditan udah ditambah lama agi. Kenyau ari pemutus Kot Besai Rusia kena 2017, semina dua iku menyadi bukai ke lama agi ditan ari Yuriy, iya nya, Menyadi Dennis Christensen enggau Sergey Klimov.

Kena 9 Disember 2020, enggau berani Yuriy madahka jaku penutup tu ngagai hakim: “Dalam kes tu, aku ukai dituduh ngereja pengawa jenayah, tang aku dituduh nitihka ajar pengarap Saksi-Saksi Jehovah.”

“Aku endang nadai munsuh, indah seumur idup aku (iya nya 67 taun), aku nadai kala dituduh ngereja jenayah. Aku mengkang neutral ba politik. Reti iya, aku sigi nulak semua pemangah enggau penyai, nemuka nya ngemediska orang ba fisikal, mental tauka nengah jaku.”

“Laban aku deka ngasika Petara, aku bebasaka semua orang, enda ngira tikas sosial, bansa, tauka pengarap sida.”

“Bup Kudus ngasuh kitai ngayanka basa ngagai piak ti bekuasa. Rome 13:1-3 madahka: ‘Awakka semua orang nunduk ngagai perintah ti megai menua; laban perintah nadai tau bisi enti enda ari Petara, lalu perintah ti bisi nya didudukka Petara. Nya alai barang sapa ngelaban perintah, ngelaban utai ti udah didudukka Petara.’”

“Aku enggai ngelaban piak ti bekuasa, laban aku enggai ngelaban atur Petara, lalu pengawa ngelaban Petara ngujungka pemati. Terima kasih ngagai Saksi-Saksi Jehovah, aku ulih belajar pasal Petara ti bendar enggau Anak Iya, Jesus Kristus. Ketegal sida, aku andalka Bup Kudus nya siti bup ti amat spesial. Pesan iya meri empas ngagai semua utai ba pengidup kitai.”

Kitai diperansang lebuh ninga pasal penegap pengarap Yuriy, lalu kitai ulih meda Jehovah endang merekatka iya sereta meri iya ‘pemaik ti pemadu menyana’.—Isaiah 26:3.