Ovatoroke mbe ri kombanda yozoperesende 60 kave ungurire potutavi twozomberoo, posiya ve ungurira pozomberoo zomatorokero (RTO). Ongwaye omaunguriro nga tji ye ri omanahepero? Ovatoroke ve hepa oviungurisiwa viṋe kutja ve ungure nawa pozomberoo zomatorokero? Oruveze pu pe nozomberoo zomatorokero ru ṱuna vi koviungura vyomatorokero?

 Ozomberoo zomatorokero ze tjita kutja ovatoroke ve kare popezu novandu mbe hungira eraka ndi ve toroka. Karin, ngu toroka otjindoitji tja North Amerika wa tja: “Okuza indu tji twa tjindira komberoo yomatorokero yaKwautamak, moChihuahua, tja Mexico, aruhe tu hungira Otjindoitji tja North Amerika puna ovakwetu mbu tu toroka pamwe, motjiungura tjokuzuvarisa, na indu tji matu karanda. Eṱe wina tu ri mokati kovandu mbe hungira eraka retu. Tu zuva omambo wa tjipangandjara ngu tu hina twa zuvire oure woruveze orure, nge hungirwa i ovandu ovengi ndino.”

 James ngu ungura pomberoo yOtjifrafra moGhana wa tja povikando tjiva u i hamenwa i yeṭunḓu roBetel porutavi rwomberoo. Posiya komurungu wa tja: “Mba suvera okuungura pomberoo yomatorokero. Okuzuvarisa meraka rwOtjifrafra nokumuna ovandu tji mave puratene nawa kombuze ombwa otjiṋa hi tji ṱuna komutima wandje tjinene.”

 Hapo ovakambure ovakwetu va tya kutja ozomberoo zomatorokero maze sokutungwa pi? Joseph worupa rwokutunga mouye auhe moWarwick, tja New York wa tja: “Ouzeu umwe mbu tu muna momaturiro tjiva kamuna orutjeno, nomeva poo oindaneta mbi mavi heperwa po komatorokero. Indu tji matu paha oruveze pu matu tungu omberoo yomatorokero, tu yandja ombango potuveze pekepeke pu pe hungirwa eraka ndo.

 Omuano wohakahana nu wombiriha okutwapo ozomberoo zomatorokero pEtuwo romerikotameneno poo pozondjuwo zovahindwa. Ovatoroke pu mave yenene okuyenda orurama. Indu tji pe hina otuveze, ovakambure ovakwetu ve yakura omaningiriro wokuranda otuveze nozomberoo ovatoroke pu mave kakara nokuungurira po. Indu omberoo yomatorokero tji i hina okuhepwa rukwao, i yenena okurandisiwa oupupu nu otjimariva ho a tji ka ungurisiwa koṋa ku ku nouhepe.

 Mombura ndji 2020 twa ungurisa omangete 13 (U.S.A) kutja ozomberoo zomatorokero ze kayende komurungu noviungura vyawo. Ozomberoo zomatorokero ze hepa ozokombiuta, oprograma ndji twamewa mokombiuta (software), oviungurisiwa vyokukambura omaraka, oindaneta, novihepwa vyarwe. Tji mo twamo okombiuta momberoo i yenena okukosa $750 komundu umwe uriri. Ozokombiuta ze twa mewa oprograma ndji oWatchtower Translation System (WTS), oyo i vatera ovatoroke kutja ve ungure oviungura vyawo oupupu.

 Ovatoroke ve yenena okupewa okakesa ku ke kambura omaraka wovandu ku ke tuwa momberoo aihe. Okakesa nga ka ri okanahepero indu oCorona tji ya uta, orondu ovatoroke aave yenene okutwaerera konganda kutja ve yenene okukayenda komurungu noviungura vyawo.

 Ovakambure ovakwetu povikando tjiva ve kavatera okutara kutja omambo ya torokwa vi nokuṱuna omberoo yomatorokero nawa. Cirstin, ngu karera pomberoo yomatorokero yOtjiafrikaans moCape Town, tja South Africa wa tja: “Ovazuvarise ovengi novakandjira ve yenena okutuvatera tjinene.”

 Ovavatere tjiva ve yorokera otjiungura hi. Omukazendu omukambure ngu vatera pomberoo yomatorokero wa tja: “Otjiṋa otjiwa okuvatera mbo.” Ovakambure tjiva ve yandja omaraka wawo kutja ye kakamburwe mouvidio. Juan, ngu toroka meraka rwOtjitotonaca motjihuro tja Veracruz, tja Mexico wa tja: “Mena rokutja tu kara popezu novandu mbe hungira eraka retu, nai tu yenena okuungurisa ovakambure ovakwetu ovengi mouvidio na movipuratenwa.”

 Hapo ozomberoo zomatorokero ze pwisa otjiungura tjokutoroka? Imba mbe lesa omambo wetu ve tja otjingaperi. Cedric, ngu ungura pu notjimbumba tji tji toroka Otjikongo moDRC wa tja: “Ovakambure ovakwetu tjiva aave i sana omuano mbu tu toroka Otjikongo kutja eraka ‘rwo-Watch Tower,’ orondu kaatu toroka momuano ovandu mbu ve hungira aruhe. Posiya nai ve tja tu toroka Otjikongo momuano ovandu mu ve hungira eyuva arihe.”

 Ovakambure ovakwetu moSouth Africa wina ve raisa ongaro otjingeyo ndjo. Andile ngu toroka meraka rwOtjixhosa wa tja: “Ovengi ve tja va muna omarundurukiro momatorokero wetu. Nandarire ovanatje mbaave lese okambo kOruhungu motjiingirisa nai ve lesa mOtjixhosa. Nu ve tjaterwa i yeraka epupu nda ungurisiwa mOmbeibela ndji New World Translation.”

 Ovimariva avihe mbi ungurisiwa okuvatera nokuṱuna nokutunga ozomberoo zomatorokero, nokuvatera imba mbe ungura potuveze ndwi, vi za koviyandjewa vyouharupu vyouye auhe mbi yandjewa okupitira morungovi ndwi donate.isa4310.com.