Otja tji we rihonga mokambo nga, Ombeibela i nomirari omingi mbi mavi yenene okumuvatera otjeṱunḓu. Jehova u vanga kutja u rire omuṋingandu. Eye u kwizika kutja indu tji wa twa omerikotameneno we poruveze orutenga, ‘eye me ku wezire ko oviṋa mbi avihe.’ (Mateus 6:33) Eye tjiri u vanga kutja u rire epanga re. Ungurisa oruveze aruhe ndu wa munu okutunga oupanga woye kuna Mukuru. Ihi ootjiṋa otjiwatjiwa omundu auhe tji ma yenene okukara na tjo.—Mateus 22:37, 38.

OMBEIBELA MAI TJA: “Ami me rire Iho, neṋe mamu rire ovanatje vandje ovazandu novakazona, Muhona, Omunamasaaehe, ma tja nao.” (2 Ovakorinte 6:18) Mukuru u vanga kutja u rire epanga re ropopezu. Ongumbiro oomuano umwe mu mo yenene okutjita nao. Jehova u ku ningira kutja u ‘kumbe nokuhaisa ko.’ (1 Ovatesalonika 5:17) Eye u nonḓero yokuzuva omeripura woye omakoto nozongendo zoye. (Ovafilipi 4:6) Indu tji mo kumbu pu neṱunḓu roye, owo mave munu kutja Mukuru tjiri omundu omunanḓengu tjinene kove.

Pendje nokuhungira kuna Mukuru, ove wina mo hepa okupuratena ku ye. Mo yenene okutjita nao mokukonḓonona Embo re nomambo nga zikamena kOmbeibela. (Epsalme 1:1, 2) Ripurira oukoto ku imbi mbi we rihongo. (Epsalme 77:11, 12) Okupuratena ku Mukuru wina ku hepa kutja u yende kozombongarero zombongo aruhe.—Epsalme 122:1-4.

Okuhungira kuna varwe ohunga na Jehova omuano warwe mu mo yenene okupamisa oupanga woye kuna Jehova. Otja tji mo hungire kuna Jehova povikando ovingi, opu mo yende amo tumbuka ku ye.—Mateus 28:19, 20.

OVIṊA MBI MO YENENE OKUTJITA:

• Twapo oruveze eyuva arihe kutja u lese Ombeibela nokukumba

• Otjeṱunḓu, twapeye ovitjitwa oviyapuke poruveze orutenga moruveze rwomanyando nokurikutura ouruvi

OMBEIBELA MAI TJA: “Tumbukeye ku Ndjambi, nEye ma tumbuka ku eṋe.” (Jakobus 4:8) Mamu sokutwapo oruveze noiri mu mamu ungura omerikotameneno weṋu weṱunḓu namu tjiti nao aruhe. (Genesis 18:19) Posi yokutja mo hepa okutjita ovingi kombanda yanao. Mukuru ma sokurira orupa rwovitjitwa vyeṋu vyeyuva arihe. Pamisa oupanga weṱunḓu roye kuna Mukuru mokuhungira ohunga na ye indu “tji wa haama mondjuwo yoye na tji u ri mondjira na tji wa rangavara na tji wa penduka.” (Deuteronomium 6:6, 7) Kara nondando tjimuna oyaJosua, ngwa tja: “Ami nonganda yandje matu karere Muhona.”—Josua 24:15.

OVIṊA MBI MO YENENE OKUTJITA:

• Kara nongongorasaneno yomahongero aruhe ndji mai ṱunu kouhepe womundu auhe meṱunḓu roye