Սխալ կարծիք #1. Կը հագուիս ինչ որ ծանուցումներուն մէջ կը տեսնես

Թերեզա անունով պատանուհի մը կ’ըսէ. «Ատեններ կ’ուզեմ որոշ նորոյթի մը հետեւիլ, քանի որ ատոր մասին ծանուցումներ կը տեսնեմ։ Երբ որ միշտ տեսնես որ մարդիկ որոշ բան մը կը հագուին, կ’ուզես դո՛ւն ալ ատիկա հագուիլ»։

Միայն աղջիկները չեն որ ծանուցումներէն կ’ազդուին։ Գիրք մը կ’ըսէ. «Տղաքն ալ նորոյթէն կ’ազդուին։ Ծանուցում պատրաստողները կը փորձեն անո՛նց ալ ազդել պզտիկ տարիքէն (The Everything Guide to Raising Adolescent Boys)։

Առաջարկ։ Սուրբ Գիրքը կ’ըսէ. «Միամիտ մարդը ամէն խօսքի կը հաւատայ, բայց խելացին իր քայլերը կը քննէ» (Առակաց 14։15)։ Ուրեմն, երբ որ ծանուցում մը տեսնես, ատոր մասին լաւ մտածէ։ Օրինակ, երբ որ սեքսի հագուստներու մասին ծանուցում մը տեսնես, դուն քեզի հարցուր.

• ‘Իմ ետեւէս ո՞վ դրամ կը շահի եթէ այդ նորոյթին հետեւիմ’։

• ‘Մարդիկ իմ մասիս ի՞նչ պիտի ըսեն, եթէ այդ հագուստը հագուիմ’։

• ‘Կ’ուզե՞մ մարդիկ իմ մասիս այդ կարծիքը ունենան’։

Խրատ։ Մէկ շաբթուան ընթացքին, ամէն անգամ որ հագուստի մասին ծանուցում մը տեսնես, դուն քեզի աս հարցումները հարցուր. ‘Ատիկա ի՞նչ գաղափարներ կ’ուզէ միտքէս անցընեմ’, ‘Ատիկա կը փորձէ՞ զիս համոզել, որ որոշ նորոյթի հետեւիմ’։ Քէրըն անունով պատանուհի մը կ’ըսէ. «Ծանուցումները կը փորձեն համոզել որ կատարեալ երեւիս, հագուստդ շատ անուշիկ ըլլայ եւ քու գրաւիչ մարմինդ ցուցնես։ Ծանուցում պատրաստողները գիտեն որ պատանիները ասանկ կը մտածեն եւ անոր համար կ’ուզեն անոնց խելքին հետ խաղալ»։

Սխալ կարծիք #2. Որոշ հագուստ մը կը հագուիս, միայն որ ուրիշներուն պէս երեւիս

Մանուէլ անունով պատանի մը կ’ըսէ. «Եթէ որոշ նորոյթ մը ելլէ, ամէն մարդ այդ նորոյթին կը հետեւի։ Եթէ դուն չհետեւիս, մարդիկ քեզ կը դատեն»։ Աննա անունով պատանուհի մը իրեն հետ կը համաձայնի, եւ կ’ըսէ. «Մարդոց խելքը միտքը նորոյթէն ըլլալ չէ։ Հապա աւելի ուրիշներուն նմանիլ է»։

Առաջարկ։ Սուրբ Գիրքը կ’ըսէ. «Մի՛ կերպարանիք այս աշխարհին կերպարանքովը» (Հռովմայեցիս 12։2)։ Ասիկա ընելու համար, հագուստներուդ նայէ եւ դուն քեզի հարցուր.

• ‘Ես ինչո՞ւ այս հագուստները կը հագուիմ’։

• ‘Ինծի համար որքա՞ն կարեւոր է յայտնի անուն կրող հագուստներ հագուիլ’։

• ‘Կը փորձե՞մ հագուստներովս ուրիշները տպաւորել’։

Խրատ։ Մի՛ կարծեր որ առջեւդ միայն երկու ընտրութիւն կայ։ Նորոյթէն հագուիլ եւ մարդոց կողմէ ընդունուիլ կամ հին մոտէլ հագուիլ եւ ուրիշներուն կողմէ չընդունուիլ։ Ուրիշ ընտրութիւն մըն ալ ունիս։ Ինչ ալ հագուիս, ինքնավստահ եղիր. քանի որ եթէ ինքնավստահ ես, հոգ պիտի չընես որ ուրիշներ ի՛նչ կը մտածեն։