Emui Natudia Hadibaia

LAI bada negana ai, reana guba ena boiboi bada oi kamonai. Unai ese oi ia hagaria, a?⁠​—⁠ a Iesu ese iena hahediba taudia rua ia gwauraidia “Guba Boiboi Natudia.” Unai bamona ia hereva ena badina mani ita itaia.

Unai taudia rua be Iamesi bona Ioane. Idia be tadikaka, Sebedeo bona ena adavana, Salome edia natudia. Reana Salome be Iesu ena sinana Maria ena tadina. Unai dainai Iesu, Iamesi bona Ioane be kasin bona reana idia tubu daekau neganai idia be tura namodia.

Sebedeo be haoda tauna, Iamesi bona Ioane danu. Idia be Iesu ese ia abia hidi hahediba taudia ginigunadia rua. Ia boiridia neganai, maoromaoro edia haoda gaukara idia rakatania bona ia murinai idia raka. Gabeai, Iesu ese ia abia hidi aposetolo taudia 12 huanai, rua be Iamesi bona Ioane.

Hua haida idia do noho bena Iesu do idia hamasea neganai, ia bona ena aposetolo taudia be Samaria ena ororo gabudia dekenai idia raka lao. Gabu ia dibura noho, bona ibounai idia hesiku bada. To, Samaria taudia idia ura lasi Iesu bona iena aposetolo taudia be edia taoni ai idia mahuta. Oi diba dahaka dainai?​​​—⁠ Mani ita itaia.

Iesu bona iena aposetolo taudia be Iuda taudia, bona Iuda taudia momo ese Samaria taudia idia hebogahisi henia lasi. Momokani, Iesu be unai bamona ia karaia lasi, to mai hebogahisi ida idia ia kara henia. Iamesi bona  Ioane be unai bamona idia karaia be namo. To Samaria taudia ese idia abidia dae lasi dainai unai hahediba taudia rua idia badu bona Iesu idia nanadaia: ‘Oi ura lahi ai boiria diho, idia ia hadikaia ore totona, a?’ Oi laloa Iesu be dahaka ia gwau?​​​—⁠ Ia hamaorodia unai bamona idia hereva be kerere! Iamesi bona Ioane ese hebogahisi karana dekenai diba ma haida idia abia be namo.

Iamesi bona Ioane edia hekwakwanai ma ta be idia ura idia guna bona ma haida idia hereaia. Iesu ia do mase lasi neganai, edia sinana idia siaia Iesu dekenai bona ia gwau: “Mani oi gwauhamata, inai egu natudia ruaosi be emu Basileia lalonai do idia helai, ta be emu idibana kahanai bona ta be emu laurina kahanai.” Vadaeni, aposetolo ten be Iamesi bona Ioane ese idia karaia gauna idia kamonai neganai, idia badu. Do oi badu danu, a?​​—⁠

Reana. Bema haida idia ura idia guna bona ma haida idia hereaia, do ita moale lasi. Gabeai Iamesi bona Ioane be edia kerere bona hebogahisi lasi karana idia dibaia neganai, edia kara idia haidaua, bona lalokau bona hebogahisi aposetolo taudia ai idia lao. Edia sivarai amo dahaka ita dibaia?​​—⁠

Iesu amo ita dibaia gauna be, mai hebogahisi ida ma haida ita kara henia. Iesu ese tatau, hahine bona natudia ia kara namo henia. Do oi hekwarahi iena haheitalai oi laloatao bona badinaia totona, a?​​—⁠

Emu Baibel ai oi duahia

Mareko 3:​17

Mataio 27:​55, 56; Mareko 15:​40, 41

Mataio 4:​18-​22

Ioane 4:​4-​15, 21-​26; Luka 9:​51-​55

Mataio 20:​20-​24; Mareko 10:​35-​37, 41

[Footnote]