INAI OI PIKSAIA: Oi be miusiam ta lalonai oi loaloa bona idaunegai raro amo idia karaia uro momo oi itaia. Momo be idia dika vadaeni. Haida edia kahana badana idia noho lasi. To oi itaia uro ta be ia dika lasi, ena toretore be idia hedinarai goevagoeva. Oi ia hakaua tauna oi nanadaia: “Inai uro be vanegai sibona idia karaia, a?” Ia haere: “Lasi, inai haida be gabeai idia karaia, to ia be idaunegai idia karaia uro ginigunana ta, to ia dika lasi.” Ma oi nanadaia lou: “Reana medu, lai bona dina ese ia botaia lasi, ani?” Hakaua tauna ia gwau: “Lasi, ia be lai bona medu badana ese idia botaia danu. Bona raskol taudia momo idia ura idia henaoa danu.” Oi hoa bada bona oi laloa, ‘Inai uro be dahaka amo idia karaia?’

Ita gwau diba, Baibel be ia dika lasi urona bamona. Oibe, buka gunadia haida idia noho danu, to Baibel sibona be idaunega buka ginigunana ta. To uro gunadia idia dika hegeregerena, lagani momo idia hanaia lalonai buka gunadia momo be idia dika momokani. Hegeregere, saiens taudia edia diba matamatadia bona idia hamomokania gaudia ese idia hahedinaraia, buka gunadia ai idia torea saiens herevadia be idia kerere. Edia medikol buka gunadia haida edia hadibaia herevadia ese gorere tauna ia durua lasi, to ia hamasea diba. Danu, buka gunadia edia toana be idia namo lasi, badina edia kahana haida be idia boio eiava idia darea o edia revareva be idia hedinarai goevagoeva lasi.

To, Baibel be idau momokani. Lagani 3500 gunanai idia torea matamaia, to Baibel ena revareva ta ia boio lasi. Ena be lagani tausen momo lalonai Baibel idia hadikaia hegeregere, idia gabua, idia taravatua bona idia gwauraia dika, to ena hereva be ia boio lasi. Ena be tanobada ena aonega ia bada, to Baibel ena hereva idia hakoikoia lasi. Baibel be aonega herevadia amo ia honu.—Maua ladana “Baibel be Buka Gunana Eiava Lasi?” itaia.

To, reana oi laloa, ‘Baibel ena hahediba hereva be hari ita idia durua diba, eiava?’ Haere oi diba totona, sibona oi nanadaia: ‘Hari inai negai taunimanima be dahaka hekwakwanai badadia idia davaria noho? Edena hekwakwanai be idia dika momokani?’ Reana oi ese tuari, ranu bona hodahoda idia miro, raskol o korapsen karadia oi laloa. Vadaeni, mani Baibel ena hahediba hereva haida oi laloa. Unai oi karaia lalonai, sibona oi nanadaia, ‘Bema taunimanima be inai hakaua herevadia idia badinaia, tanobada ena mauri be do ia namo, a?

MAINO KARANA LALOA BADA

“Maino idia karaia taudia be idia moale, badina ma haida ese do idia gwauraia Dirava ena natudia.” (Mataio 5:9) “Bema mai dalana bona bema umui karaia diba, taunimanima ibounai ida maino ai do umui noho.”—Roma 12:18.

HEBOGAHISI BONA DIKA GWAUATAO

“Hebogahisi taudia be idia moale, badina ma haida ese do idia hebogahisi henidia.” (Mataio 5:7) “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni. Iehova * ese mai kudouna ibounai ida umui ia gwauatao hegeregerena, namona be umui danu be unai bamona do umui karaia.”—Kolose 3:13.

BESE IDAUIDAU BE MAINO AI IDIA NOHO

Dirava “ese tau tamona amo bese iboudiai taudia ia karaia, tanobada ibounai dekenai idia noho totona.” (Kara 17:26) “Dirava be taunimanima edia toana ia laloa lasi, to bese iboudiai lalonai ia idia gari henia bona kara maoromaoro idia karaia taudia be ia ese ia abia dae.”—Kara 10:34,35.

TANOBADA NARIA NAMONAMO

“Iehova Dirava ese unai tau ia abia bona Eden umana dekenai ia atoa, do ia geia bona naria totona.” (Genese 2:15, NWT.) Dirava ese “tanobada idia hadikaia taudia do ia hadikaia ore.”—Apokalupo 11:18.

MATAGANIGANI BONA MATABODAGA KARADIA DADARAIA

“Mataganigani karadia idauidau ibounai dainai do umui gima noho, badina ena be tau ta be mai ena kohu momo, to ena kohu ese ia dekenai mauri do ia henia lasi.” (Luka 12:15) “Namona be matabodaga karadia, kara miro idauidau bona mataganigani karadia be umui huanai umui herevalaia lasi, helaga taudia edia kara hegeregerena.”—Efeso 5:3.

KARA MOMOKANI BONA GAUKARA GOADA

“Ai ura mai momokani ida gau ibounai ai karaia.” (Heberu 13:18) “Namo lasi henaoa tauna ia henaohenao lou, to namona be ia gaukara goada.”—Efeso 4:28.

OGOGAMI TAUDIA DURUA BE MAI ANINA BADA

“Lalometau taudia do umui hagoadaia, manoka taudia do umui durua bona taunimanima iboudiai dekenai do umui haheauka.” (1 Tesalonika 5:14) “Tamana bona sinana lasi natudia bona vabu be edia hisihisi lalonai do ita naria.”—Iamesi 1:27.

Baibel ese unai hakaua herevadia ia gwauraia sibona lasi. To, ita ia hadibaia unai hakaua herevadia do ita laloa bada bona dina ta ta ai do ita badinaia daladia ia hadibaia danu. Bema taunimanima momo ese edia mauri lalonai ataiai hakaua herevadia idia badinaia, tanobada ai hekwakwanai momo do idia ore. Oibe, Baibel ena hakaua herevadia be ita idia durua  diba! To, Baibel ena hahediba hereva ese hari edena dala ai oi ia durua diba?

Aonega bada tauna ta ia gwau: “Tau ta ese ia karaia kara namodia ese idia hamomokania, ia be aonega tauna.” (Mataio 11:19) Unai hereva oi abia dae, a? Tohoa dalana be inai: Hereva ta oi badinaia bena ena anina ia vara neganai, do oi hamomokania unai be aonega dalana eiava lasi. Vadaeni, reana oi laloa: ‘Bema Baibel ese lau ia durua diba, vadaeni bema egu mauri lalonai ena hereva lau badinaia, namo do lau davaria, ani? Edena dala ai Baibel ese lau ia durua diba hari lau davaria hekwakwanai lau hanaia totona?’ Mani haheitalai ta ita itaia.

Delphine * be bisi hahinena, gaukara idauidau ia karaia bona unai ia moalelaia. To, ia dekenai hekwakwanai badadia idia vara. Ena tineij natuna kekeni ia mase. Bena iena headava ia dika. Moni ena hekwakwanai ia davaria. Ia gwau: “Egu mauri ia idau—egu natuna kekeni ia mase, egu adavana ia raka oho bona lau be ruma be lasi. Lau mamia lau be anina lasi—lau diba lasi dahaka do lau karaia, egu goada ia ore, bona helaro be lasi.”

Delphine ese inai Baibel siri ena anina ia lalopararalaia momokani: “Aiemai mauri lagani be 70 sibona. Bema ai be goada neganai sedira lagani 80 do ai abia, to inai lagani ibounai lalonai, hekwarahi bona  lalohisihisi ai abia noho. Aiemai mauri be idia ore haraga, vadaeni ai boio.”—Salamo 90:10, NW.

Unai lalohisihisi negana ai, Delphine ese Baibel ena heduru ia tahua. Baibel ese ia durua dalana be hoa gauna. Atikol gabedia toi ese do idia hahedinaraia hegeregerena, momo idia itaia hekwakwanai idia vara neganai, Baibel ena hakaua herevadia idia badinaia dainai, heduru bada idia davaria. Idia mamia Baibel be ataiai ita herevalaia uro bamona. Buka haida be idia gunana neganai edia hereva be anina lasi. To, Baibel be unai buka gunadia bamona lasi. Dahaka oi laloa, unai ia vara badina Baibel be gau idauna ta amo idia karaia, a? Reana Baibel lalonai taunimanima edia lalohadai lasi to Dirava ena lalohadai ia noho dainai ia be idau, a?—1 Tesalonika 2:13.

Reana oi danu oi itaia mauri be ia kwadogi bona hekwakwanai be momo. Emu hekwakwanai be momo herea neganai, heduru, goada bona sisiba namodia abia totona, edeseni oi lao?

Mani Baibel ese oi do ia durua daladia toi ita laloa. Oi do ia hadibaia

1. hekwakwanai oi dadaraia totona.

2. hekwakwanai oi hamaoromaoroa haraga totona.

3. Oi hanamoa diba lasi hekwakwanai oi haheaukalaia totona.

Atikol ma haida be unai point toi do idia herevalaia.