LAUEGU mauri lagani be 9 neganai, egu tubu dalana ia dika. Unai be Côte d’Ivoire dekenai lagani 34 gunanai ia vara. Hari lau gini neganai, egu lata be 1 mita sibona. Egu tubu dalana ia dika neganai, tama sina ese lau idia hagoadaia lau gaukara goada totona, unai amo egu tauanina ena toana do lau laloa momo lasi. Emai ruma vairanai teibolo ta lau karaia, unai amo frut lau hoihoilaia diba. Bona unai gabu lau hagoevaia dainai hoihoi taudia momo idia mai.

Ena be lau gaukara goadagoada, to unai ese lau ia durua momokani lasi. Lau be kwadogi momokani dainai, egu mauri lalonai lau hekwarahi gau haida lau karaia totona. Hegeregere, stoa ai kohu idia atoa gabudia be atai. Lau lalohisihisi badina gau ibounai be egu lata hegeregerena idia karaia lasi. To egu mauri lagani be 14 neganai, unai ibounai ia idau.

Dina ta, Iehova ena Witnes hahine rua be frut hoia totona idia mai, bona gabeai lau ida Baibel ai stadilaia matamaia. Unai neganai lau laloparara Iehova bona ena ura be mai anina bada. Unai ese lau ia durua bada. Lau ura henia siri be Salamo 73:28. Unai siri ena kahana ginigunana ia gwau: “Lau be Dirava badibadinai lau noho. Inai be namo herea momokani.”

To, lau bona egu ruma bese be Burkina Faso dekenai ai lao neganai, egu mauri ia idau. Côte d’Ivoire ai, momo idia diba lau be hanaihanai frut lau hoihoilaia. To Burkina Faso dekenai taunimanima momo be lau idia diba lasi, bona nega momo lau idia raraia. Unai dainai wiki haida lalonai lau be ruma lalonai sibona lau noho. Bena lau laloatao, Dirava badinai lau noho neganai, egu hemami be namo herea. Iehova ena Witnes taudia edia brens ofesi dekenai revareva lau torea, bona taihu ta ese lau ia vadivadi henia. Iena ladana be Nani, ia be misinari ta bona motabaik dekenai ia loaloa.

Emai dala be kahu bada bona nega momo ai dedi, bona medu negadiai kopukopu be bada. Nani be ena motabaik ida ia mai neganai, nega momo ia moru, to unai ese ia koua lasi egu stadi ia karaia totona. Gabeai lau ia hamaoroa hebou dekenai lau do ia abia lao. Lau laloparara unai lau karaia totona, ruma do lau rakatania bona taunimanima be lau do idia raraia. Ma danu, motabaik ena taria gauna giroa totona be auka, bona latanai lau  helai neganai, motabaik ena metau do lau habadaia. To, lau abia dae sibona, badina lau ura henia siri ena kahana iharuana ia gwau: “Siahu Ibounai Lohiabada e, oi be lauegu magu momokani.”

Nega haida lau bona Nani be kopukopu dekenai ai moru, to hebou dekenai lau lao dainai lau moale. Kingdom Hall ai momo be mai moale ida lau idia hedavari henia. Hua 9 murinai lau bapatiso.

Lau ura henia siri ena kahana ihatoina ia gwau: “Lau ura oiemu kara ibounai do lau gwauraia hedinarai.” Lau diba haroro gaukara karaia totona do lau hekwarahi. Ruma-ta-ruma-ta haroro gaukara lau karaia negana ginigunana lau laloatao. Natu maragidia bona badadia be lau idia raraia momo, lau idia badinaia, bona egu raka dalana idia tohotohoa. Unai ese egu lalona ia hahisia bada. To sibona dekenai lau gwau, ‘Idia danu be Paradaiso ena hahenamo idia abia be namo, lau bamona.’

Egu haroro dalana durua totona, basikele mai ena wili toi gauna ta lau abia. Haroro ai, bema ororo ai daekau, egu bamona ese lau ia doria daekau, bena ororo ai diho neganai, do ia guia bona ai diho hebou. Guna haroro gaukara be mai ena hekwarahi, to gabeai lau moalelaia bada, bena lagani 1998 ai, regula painia gaukara lau matamaia.

Baibel stadi momo lau karaia, bona foa idia bapatiso. Lau moale badina egu taihuna rua be hereva momokani idia abia dae. Haida be idia goada idia lao neganai, unai ese lau ia hagoadaia bada. Dina ta malaria gorere lau abia, unai neganai Côte d’Ivoire amo revareva ta lau abia. Guna, Burkina Faso ai iunivesiti dekenai ia sikuli tauna ta ida Baibel stadi lau hamatamaia, bena tadikaka ta dekenai lau henia hanaia. Gabeai unai stiuden be Côte d’Ivoire dekenai ia lao. Iena revareva amo lau ia hadibaia ia be Bapatiso lasi pablisa ai ia lao vadaeni!

Edena dala ai lau sibona do lau durua? Diseibol taudia ia durua orea ta ese dabua turia dalana be lau dekenai idia hadibaia. Ai ia hadibaia tauna ta ia itaia lau gaukara goada dainai, ia gwau: “Namona be oi dekenai sopu karaia dalana ai hadibaia.” Bena lau idia hadibaia. Ruma dekenai dabua huria bona digu sopu lau karaia. Taunimanima be egu sopu idia ura henia bona haida dekenai idia hadibaia danu. Egu motabaik lau gaukaralaia taunimanima edia ruma dekenai sopu lau henia.

Lagani 2004 ai, egu doruna turia ia hisihisi bada dainai, painia gaukara lau hadokoa. To, haroro gaukara lau goadalaia noho.

Taunimanima idia diba lau be kiri momo kekeni. Lau moale bada, badina Dirava badinai lau noho be namo herea.—Sarah Maiga ese ia sivarailaia.