1. Edena dala ai heau helulu kekenina ta ena sivarai ese ita ia durua?

 MARY DECKER be heau helulu kekeni ta bona momo be ena sivarai idia diba. Lagani 1984 ai, ia be heau goada kekenina, bona momo idia laloa ia be Olympic gadara ai golo medolo ta do ia abia. To, hekwakwanai ta ia vara. Kilomita toi ena heau helulu ta lalonai, Mary be kekeni ma ta ena aena ia bampaia bona ia moru. Ena be unai heau helulu ia haorea lasi, to ia ese heau helulu gadara ia rakatania lasi. Hua haida murinai, Mary be kilomita 1.6 ena heau helulu lalonai ia heau haraga bona ia kwalimu​—⁠guna hahine ta be unai bamona ia heau lasi.

2. Keristani taudia be edena heau helulu lalonai idia heau noho? Bona edena bamona idia heau be namo?

² Ita Keristani taudia be mauri hanaihanai ena heau helulu lalonai ita heau bamona. Namo lasi gau ta ese iseda heau helulu ia hadikaia. Unai heau helulu be heau kwadogina lasi. Danu, ita be metairametaira ita heau lasi bona ita laga-ani lasi. To, iseda heau helulu be gabu daudau o maraton heau helulu bamona. Maraton heau helulu lalonai ia vareai tauna be mai haheauka ida ia heau, unai amo dokonai do ia ginidae. Aposetolo Paulo ese Korinto Keristani taudia ia tore henia, ia gwau: “Umui diba lasi, a? Heau helulu dekenai idia heau taudia ibounai be idia heau, to tamona sibona ese ahuna do ia abia. Namona be unai bamona do umui heau, vadaeni ahuna do umui abia.”​—⁠1 Kor. 9:24.

3. Daidia be mauri hanaihanai ena heau helulu lalonai idia kwalimu diba?

 ³ Baibel ia gwau unai heau helulu lalonai ita vareai be namo. (1 Korinto 9:25-27 duahia.) Unai heau helulu be idau, badina mai haheauka ida idia heau ela bona dokona taudia ibounai be ahuna do idia abia. (Mat. 24:13) To, bema heau helulu tauna be taravatu ia badinaia lasi o heau helulu ia rakatania, do ia kwalimu lasi. Unai heau helulu ena ahuna be mauri hanaihanai.

4. Dahaka dainai mauri hanaihanai ena heau helulu lalonai ita heau be mai ena hekwarahi?

⁴ Mauri hanaihanai ena heau helulu lalonai ita heau be mai ena hekwarahi. Iesu Keriso be gau ta ese ia hahekwakwanaia lasi, to ita be unai bamona lasi. Iamesi ia gwau: “Ita ibounai be nega momo ita kerere.” (Iam. 3:2) Ita be goevadae lasi dainai, reana iseda kerere o ma haida edia kerere dainai, do ita heau metairametaira, eiava heau helulu ita rakatania diba. To bema unai ia vara, namona be heduru ita abia dae bona heau helulu lalonai ita vareai lou.​—⁠1 Kin. 8:46.

5, 6. (a) Dahaka dainai Keristani tauna be ‘gau ta ese do ia hamorua diba lasi’? Bona dahaka ese ia durua ia “toreisi” totona? (b) Dahaka dainai haida idia moru neganai, idia ura lasi “toreisi”?

⁵ Ta ia moru neganai, ia karaia gauna ese do ia hahedinaraia ia be edena bamona tauna. Idia moru o kerere idia karaia taudia haida be idia toreisi, bona Dirava idia hesiai henia noho. To, haida be idia ura lasi idia toreisi o helalo-kerehai. Aonega Herevadia 24:16 ia gwau: “Kara maoromaoro tauna, be nega momo do ia moru, to ma do ia toreisi. To kara dika tauna be hisihisi ese, do ia hadikaia ore momokani.”

⁶ Ena be ita moru, to ita toreisi diba. Bema Iehova ita abidadama henia, hekwakwanai eiava kerere negadiai, Ia be mai ena ura ida ita do ia durua. Iehova ia diba ia ita lalokau henia dainai, ita do ia durua ita “toreisi” totona. To, kara dika taudia idia ura lasi idia toreisi. Idia ese Dirava ena lauma helaga bona ena taunimanima edia heduru idia dadaraia. Baibel ia gwau, Iehova  ena taravatu idia ura henia taudia be “gau ta ese do ia hamorudia diba lasi.” Anina be, ena be mauri hanaihanai ena heau helulu lalonai ita moru, to ita toreisi bona ita heau lou diba.​—⁠Salamo 119:165 duahia.

7, 8. Edena dala ai ta be Dirava ese do ia lalonamo henia noho diba, ena be ia moru?

⁷ Nega haida ta be ia manoka dainai, unai kerere tamona do ia karaia loulou. To, bema unai nega ta ta ai ia toreisi​—⁠ia helalo-kerehai momokani bona ia hekwarahi kara maorona ia karaia​—⁠Iehova ena matanai ia be kara maoromaoro tauna. Guna, Dirava ese Israela taudia ia kara henia dalana ese unai ia hahedinaraia. (Isa. 41:9, 10) Aonega Herevadia 24:16 be eda kerere ia herevalaia momo lasi, to ia hahedinaraia Iehova ese ita do ia durua ita “toreisi” totona. (Isaia 55:7 duahia.) Iehova Dirava bona Iesu Keriso idia diba ita gaukara goada noho, bona ita idia hagoadaia ita “toreisi” totona.​—⁠Sal. 86:5; Ioa. 5:19.

⁸ Bema maraton heau helulu lalonai ta ia moru, reana nega ia noho do ia toreisi bona ia heau noho totona. To, unai ia karaia haraga be namo. Mauri hanaihanai ena heau helulu do ia ore ena “dina bona hora” be ita diba lasi. (Mat. 24:36) To, bema ita gaukara goada ita moru lasi totona, do ita heau noho ela bona dokona. Vadaeni, edena dala ai ita idia hamorua gaudia ita dadaraia diba?

9. Inai stadi ai dahaka do ita herevalaia?

⁹ Inai stadi ai, ita idia hamorua diba gaudia faiv do ita herevalaia. Gaudia be inai: (1) Iseda manoka gaudia, (2) tauanina ena ura dikadia, (3) kongrigeisen ai ia vara gauna ta dainai ita lalohisihisi, (4) hisihisi o dagedage, bona (5) ma haida edia kerere. Bema unai gaudia ta dainai oi moru, namona be oi laloatao Iehova be haheauka Diravana, bona oi do ia rakatania haraga lasi.

10, 11. Davida ena manoka gauna be dahaka?

¹⁰ Iseda manoka gaudia be dala ai idia noho nadi bamona. Ita ese King Davida bona aposetolo Petero edia sivarai do ita herevalaia, bona unai amo manoka gaudia rua do ita itaia. Idia be sibona ena kara biagua lasi karana bona taunimanima gari henia karana.

¹¹ King Davida ena manoka gauna be, nega haida sibona ena kara ia biagua lasi. Hegeregere, ia be Bataseba ida ia heudahanai. Danu, gabeai Nabala ese ia habadua dainai, kahirakahira Nabala ia hamasea. Oibe, Davida be nega haida ena kara ia biagua lasi, to ia hekwarahi Iehova ia hamoalea totona. Ena be ia moru, to ma haida ese idia durua dainai, ia “toreisi.”​—⁠1 Sam. 25:5-13, 32, 33; 2 Sam. 12:1-13.

12. Ena be Petero ia kerere, to edena dala ai heau helulu lalonai ia heau lou?

¹² Petero be taunimanima ia gari henia. Ia be Iesu bona Iehova ia badinaia, to nega haida taunimanima ia gari henidia dainai kerere ia karaia. Hegeregere, ia ese nega toi Iesu ia gorea. (Luka 22:54-62) Nega ma ta ai, Petero ese Iuda Keristani taudia ia kara namo henidia, to Idau Bese Keristani taudia ia laloa maragi. Petero ena lalohadai be ia maoro lasi, bona reana kongrigeisen taudia haida ia hakaudia kerere danu. Unai dainai, Paulo ese ia sisiba auka henia. (Gal. 2:11-14) Petero be Paulo ena sisiba ia dadaraia bona mauri ena heau helulu ia rakatania, a? Lasi. Ia ese Paulo ena sisiba ia laloa namonamo, ena kara ia haidaua, bona heau helulu lalonai ia heau lou.

13. Dahaka dainai ita gorere neganai, ita moru diba?

¹³ Ita gorere neganai, eda mauri do ia auka bona eda heau helulu ita rakatania diba. Hegeregere, Japan ai taihu ta be ia bapatiso bona lagani 17 murinai, gorere badana ta ia davaria. Ena gorere ia lalohekwarahilaia dainai, ena  hetura karana Dirava ida be ia manoka. To, elda rua ese idia vadivadi henia bona hagoadaia murinai, hebou ia lao matamaia lou. Taihu ia gwau: “Lau tai badina tadikaka be mai hebogahisi ida lau idia welkam henia.” Hari, eda taihu be heau helulu lalonai ia vareai lou.

14, 15. Lalohadai dikadia ita abia neganai, dahaka ita karaia be namo? Haheitalai ta gwauraia.

¹⁴ Momo be tauanina ena ura dikadia dainai idia moru. Bema eda ura dikadia ese ita idia dibagania, namona be ita hekwarahi Dirava ena taravatu hegeregerena, eda lalohadai bona kara idia goeva noho totona. Iesu ia gwau, bema eda matana o imana ese ita ia hahekwakwanaia, namona be ita “negea.” Namona be matabodaga lalohadai bona karadia ita dadaraia, unai amo eda heau helulu do ita rakatania lasi.​—⁠Mataio 5:29, 30 duahia.

¹⁵ Tadikaka ta ia gwau, ena be Keristani ruma besena ta ai ia tubu, to ia ura geligeli taudia edia kara ia karaia. Ia gwau: “Ma haida lau bamoa neganai, lau mamia lau be idau bona egu hemami ia dika.” Ena mauri lagani be 20 neganai, ia be regula painia ai ia lao bona kongrigeisen ai hesiai tauna ena maduna ia abia. Bena kerere badana ta ia karaia dainai, elda ese Baibel amo idia sisiba henia bona idia durua. Ia guriguri, Baibel ia stadilaia bona ia gaukara goada ma haida ia durua totona. Unai ese idia durua heau helulu lalonai ia heau noho totona. Unai hekwakwanai be idaunegai ia vara, to tadikaka ia gwau: “Nega haida unai lalohadai dikana lau abia lou, to lau hekwarahi lau dadaraia totona. Lau laloparara, Iehova ese ita do ia durua hedibagani ita hanaia totona. Unai dainai, lau abia dae Dirava ia diba lau be hegeregere unai hedibagani do lau hanaia.” Unai tadikaka ia ura lasi, gau ta ese ena heau helulu do ia hadikaia. Ia laloparara hari ia haheauka be gau badana, badina tanobada matamatana ai mauri namona do ia moalelaia. Ia gwau: “Unai nega lau naria noho lalonai, do lau hekwarahi unai lalohadai dikana lau dadaraia totona.”

16, 17. (a) Ena be tadikaka ta ia laloa haida ese idia kara auka henia, to dahaka ese ia durua? (b) Daika be kongrigeisen ena Kwarana bona edena dala ai unai ese ita ia durua?

¹⁶ Bema kongrigeisen ai ia vara gauna ta dainai ita lalohisihisi, unai ese ita ia hamorua diba. France ai, guna elda gaukara ia karaia tadikaka ta ia laloa kongrigeisen taudia haida ese idia kara auka henia. Ia lalohisihisi dainai, hebou lao henia karana bona haroro gaukara ia hadokoa. Elda rua ese idia vadivadi henia bona ena lalohadai ia gwauraia neganai, idia kamonai namonamo. Ia idia hagoadaia Iehova do ia abidadama henia, bona gau badana be Dirava do ia hamoalea. Ia ese edia sisiba ia abia dae, bona daudau lasi murinai heau helulu lalonai ia vareai lou.

¹⁷ Namona be ita ibounai ita laloatao, Iesu Keriso be Dirava ese ia abia hidi kongrigeisen ena Kwarana. Unai dainai, taunimanima ese idia karaia gaudia ita laloa momo lasi be namo. Iesu ena matana be “lahi ena hururuhururu bamona,” bona ia ese kongrigeisen ai idia vara gaudia ibounai ia itaia goevagoeva. (Apok. 1:13-16) Hegeregere, reana ita laloa kongrigeisen ai ia vara gauna ta be ia maoro lasi. To, reana ita be ia vara gauna ena badina ita diba namonamo lasi. Iesu ese kongrigeisen ai idia vara hekwakwanai be ena dala bona nega maorona ai do ia hamaoromaoroa. Unai dainai, namo lasi tadikaka ma ta ena kara ese eda heau helulu ia hadikaia.

18. Edena dala ai hisihisi o dagedage ita haheaukalaia diba?

¹⁸ Ita idia hamorua diba gaudia ma rua be, hisihisi o dagedage, bona kongrigeisen ai ma haida edia kara kereredia. Iesu be uhe ia hadoa tauna ena sivarai ia gwauraia neganai, ia gwau Dirava ena taunimanima  haida be do idia moru badina “hisihisi o dagedage” idia davaria. Hereva momokani dainai eda famili, neiba o gavamani taudia ese ita idia hahisia o dagedage henia diba. Bema Keristani tauna ta be “ramuna lasi,” o ena abidadama be ia manoka, ia moru diba. (Mat. 13:21) To, bema ita ura Iehova kahirakahira ita noho, Basileia sivaraina ese eda abidadama ia hagoadaia diba. Unai dainai, hahetoho ita davaria neganai, namona be ‘Dirava ese ia moalelaia gaudia’ ita laloa dobu. (Filipi 4:6-9 duahia.) Oibe, Iehova ese ita dekenai goada do ia henia eda hahetoho ita haheaukalaia totona, unai amo eda heau helulu ita rakatania lasi.

19. Ena be ta ena kara ese ita ia hahekwakwanaia, dahaka ita karaia be namo?

¹⁹ Tadikaka taihu haida be kongrigeisen ai ma haida edia kerere idia laloa momo dainai, edia hesiai gaukara idia rakatania. Eiava, ta be ma haida edia kara ese ena lalomamina ia hadikaia dainai, ena hesiai gaukara ia rakatania. (1 Kor. 8:12, 13) Bema ta ena kara ese ita ia habadua, hereva momokani do ita rakatania, a? Ena be ita laloa ma haida ese idia karaia karana be kerere, to Baibel ia gwau idia do ita hahemaoro henidia lasi, bona edia dika ita gwauatao be namo. (Luka 6:37) Bema ta ena kara ese oi ia hahekwakwanaia, sibona oi nanadaia: ‘Lau laloa lau sibona egu lalohadai be maoro dainai, ma haida lau hahemaoro henidia, a? Tadikaka taihu be goevadae lasi taudia dainai, hereva momokani do lau rakatania, a?’ Iehova ita lalokau henia dainai, ma haida edia kara ese ita do ia koua lasi eda heau helulu ita hagugurua totona.

20, 21. Mauri hanaihanai ena heau helulu lalonai dahaka do oi karaia?

²⁰ Oi ura emu ‘heau helulu oi haorea,’ a? (2 Tim. 4:7, 8) Namona be Baibel bona iseda buka bona magasin oi stadilaia, bona oi dibaia gaudia oi laloa dobu. Unai ese oi idia durua oi idia hamorua diba gaudia oi lalopararalaia totona. Danu, Iehova oi noia ena lauma helaga amo oi dekenai goada ia henia totona. Laloatao, ena be mauri ena heau helulu lalonai ita moru, to ita toreisi diba bona ita heau ela bona dokona. Danu, namona be eda kerere amo gau ta ita dibaia, bena unai ese ita do ia durua eda heau dalana ita hanamoa totona.

²¹ Baibel ia gwau, bema ita ura mauri hanaihanai ita abia, namona be heau helulu lalonai ita heau ela bona dokona. Ita heau noho lalonai, Iehova ese ita dekenai “maino namo herea” do ia henia. (Sal. 119:165) Hari, Dirava ese ita do ia durua noho bona bema eda heau helulu ita hagugurua, ia ese ita dekenai hahenamo momo do ia henia.​—⁠Iam. 1:12.