PABLISA momo lasi tanona dekenai ia lao tadikaka o taihu ta oi diba, a? Reana sibona oi nanadaia: ‘Dahaka dainai idia ura idau tano ai hesiai gaukara idia karaia? Idia lao totona, edena bamona idia hegaegae? Lau danu unai lau karaia diba, a?’ Unai henanadai edia haere ita diba totona, pablisa momo lasi tanodia dekenai idia lao tadikaka taihu ita hereva henidia diba. Mani unai ita karaia.

Dahaka dainai oi laloa pablisa be momo lasi tanona dekenai hesiai gaukara oi karaia be namo? Amy  ena mauri lagani be 35 bamona, bona ia be United States amo. Ia gwau: “Lagani momo lalonai, lau ura idau tano dekenai hesiai gaukara lau karaia, to lau mamia lau hegeregere lasi.” Dahaka dainai ena lalohadai ia haidaua? “Lagani 2004 ai, Belize ai idia noho headava tadikaka bona taihu ese lau idia boiria bona idia ida hua tamona lalonai painia gaukara ai karaia. Unai lau karaia bona lau moalelaia! Lagani ta murinai, Ghana dekenai lau lao bona unuseniai painia gaukara lau karaia.”

Lagani haida gunanai, Stephanie, hari ena mauri lagani be 25 bamona, bona ia danu be United States amo, ese ena noho dalana ia lalohadailaia bona ia gwau: ‘Lauegu tauanina be ia goada bona ruma bese maduna ta lau huaia lasi. Unai dainai egu hesiai gaukara Iehova dekenai lau habadaia be namo.’ Mai momokani ida sibona ena noho dalana ia lalohadailaia dainai, Ghana dekenai ia lao, ena hesiai gaukara ia habadaia totona. Idia headava painia tadikaka bona taihu, Filip bona Ida, edia mauri lagani be 50 bamona, bona idia be Denmark amo, nega momo idia ura pablisa be momo lasi tanona dekenai idia lao. Dala idia tahua edia tahua gauna idia hagugurua totona. Filip ia gwau: “Dala ia kehoa neganai, unai be hegeregere Iehova be ai dekenai ia gwau,  ‘Umui lao!’” Lagani 2008 ai, Ghana dekenai idia lao bona unuseni lagani toi edia hesiai gaukara idia karaia.

Idia headava painia tadikaka bona taihu, Hans bona Brook, edia mauri lagani be 30 bamona, bona idia be United States amo. Lagani 2005 ai, lai gubana (Hurricane Katrina) ia vara murinai, idia be heduru idia henia. Gabeai, intanesinol konstraksen gaukara totona aplikeisen idia hahonua, to idia boiridia lasi. Hans ia gwau: “Hebouhebou ena tok ta ai, tadikaka ese ia hahedinaraia King Davida ia abia dae ia ese dubu helaga do ia haginia lasi neganai, ia ese ena tahua gauna ia haidaua. Unai ese ai ia durua bena ai laloparara ta ese tiokratik tahua gaudia ia haidaua be kerere lasi.” (1 Siv. 17:1-4, 11, 12; 22:5-11) Brook ma ia gwau: “Iehova ia ura tahua gauna ma ta do ai atoa.”

Tano ma haida ai hesiai gaukara idia karaia turadia edia ekspiriens idia kamonai murinai, Hans bona Brook idia ura idau tano ai painia gaukara do idia karaia. Lagani 2012 ai, Ghana dekenai idia lao bona unuseniai hua foa idia noho, bona saini gado kongrigeisen idia durua. Ena be United States dekenai idia giroa lou, to Ghana ai idia karaia hesiai gaukarana ese edia ura ia habadaia, edia mauri ai Basileia idia atoa guna. Unai nega amo idia be Micronesia ai brens konstraksen gaukara idia durua.

Pablisa momo lasi tanona dekenai oi lao totona, dahaka oi karaia? Stephanie ia gwau: “Gima Kohorona ai, pablisa momo lasi tanodia durua karana idia herevalaia atikol haida lau duahia. * Danu, kongrigeisen elda taudia bona sekit naria tauna bona ena adavana ida tano ma ta ai hesiai gaukara karaia urana lau herevalaia. To mai anina bada gauna be nega momo Iehova dekenai egu tahua gauna lau gurigurilaia.” Ma danu, Stephanie be kohu momo ia tahua lasi, unai amo moni sisina ia haboua bena idau tano ai sibona ia durua diba.

 Hans ia gwau: “Heduru totona Iehova ai noia, badina ai ura ai ia siaia gabuna dekenai ai lao. Danu, emai guriguri lalonai, emai lao dinana ena deit ai gwauraia.” Idia ese brens ofesi foa dekenai revareva idia siaia. Ghana ena brens ofesi amo haere idia abia murinai, unuseni idia lao, bona idia ura hua rua idia noho. Hans ia gwau: “Kongrigeisen ida gaukara hebou karana ai moalelaia bada, unai dainai unuseni ai noho daudau.”

Headava tadikaka bona taihu, George bona Adria, edia mauri lagani be 35 bamona, bona idia be Canada amo, idia abia dae bema abia hidi maorodia ita karaia Iehova ese unai do ia hanamoa. Unai dainai edia tahua gauna hagugurua totona gau haida idia karaia. Idia ese Ghana ai pablisa momo lasi gabuna ai hesiai gaukara ia karaia taihu ta idia rini henia bona ia dekenai henanadai momo idia henia. Danu, idia ese Canada ena brens bona Ghana ena brens dekenai revareva idia torea. Adria ia gwau: “Dala ai tahua emai mauri ai haidaua noho totona, unai amo kohu momo lasi maurina ai noholaia.” Unai abia hidi idia karaia dainai, lagani 2004 ai, Ghana dekenai idia lao.

Idau tano oi lao murinai, dahaka hekwakwanai oi davaria, bona edena dala ai oi haheaukalaia? Amy ena hekwakwanai be ena ruma bese ia laloa momo. “Gau momo idia idau, lau manadalaia gaudia amo.” Dahaka ese ia durua? “Egu ruma bese ese lau idia rini henia bona lau karaia gaukarana dainai lau idia hanamoa, unai ese lau ia durua unuseni lau lao ena badina lau laloa totona. Gabeai, egu ruma bese ida vidio amo ai herevahereva. Ai itaia heheni diba  dainai, lau mamia egu ruma bese be lau kahirakahira idia noho.” Amy ese Ghana taihu ta ia tura henia dainai, edia kastom idauidau ia dibaia. “Taunimanima edia kara haida lau lalopararalaia lasi neganai, egu turana amo heduru lau abia. Iena heduru dainai, lau karaia diba bona karaia diba lasi gaudia lau dibaia, unai ese lau ia durua mai moale ida egu hesiai gaukara lau karaia noho totona.”

George bona Adria be Ghana dekenai idia lao neganai, idia mamia idia be sene taudia edia nega ai idia noho bamona. Adria ia gwau: “Dabua huria totona, masini ai gaukaralaia lasi, to baketi ai gaukaralaia. Aniani hegaegaelaia totona nega bada ai negea, guna bamona lasi. To daudau lasi murinai, emai mauri dala matamatana ai manadalaia.” Brook ia gwau: “Ena be ai painia taudia ese unai bamona hekwakwanai ai davaria, to emai mauri ai moalelaia. Ai davaria ekspiriens ibounai ai lalodia lou neganai, ai moale bona unai do ai laloaboio lasi.”

Dahaka dainai oi laloa ma haida ese inai Basileia gaukarana idia durua danu be namo? Stephanie ia gwau: “Teritori dekenai ai davaria taudia momo be idia ura hereva momokani idia dibaia, bona idia ura ai ida dina ta ta ai Baibel idia stadilaia be moale gauna. Lau mamia pablisa be momo lasi gabuna dekenai lau lao karana be abia hidi namona!” Lagani 2014 ai, Stephanie ese Aaron ia adavaia, bona hari idia ruaosi be Ghana brens ofesi dekenai idia gaukara.

Painia taihuna, Christine, ia gwau: “Unai be ekspiriens namona.” Ia be Germany amo, bona ena mauri lagani be 30 bamona. Christine be guna Bolivia ai ia noho, gabeai Ghana dekenai ia lao. Ma ia gwau: “Egu ruma bese amo lau noho daudau dainai, nega ibounai Iehova ena heduru lau noia. Lau dekenai ia be taunimanima korikorina bamona. Danu, Iehova ena taunimanima huanai ia noho lalotamona lau mamia. Unai hesiai gaukara ese egu mauri ia hanamoa.” Vanegai sibona Christine be Gideon ia adavaia, bona idia rua be Ghana ai edia hesiai gaukara idia karaia noho.

Filip bona Ida ese edia Baibel stadi taudia idia durua totona inai idia karaia. “Guna emai Baibel stadi be 15 mai kahana, to hari be 10 sibona, unai amo emai stadi taudia ai hadibaia namonamo diba.” Stadi taudia be dahaka namo idia davaria? Filip ia gwau: “Lau be mero matamatana ladana Micheal ida lau stadi. Ia be dina ta ta ia stadi diba bona iena buka ia hegaegaelaia namonamo, unai amo hua tamona sibona lalonai Baibel Hadibaia bukana ai haorea. Unai murinai, Micheal be bapatiso lasi pablisa ai ia lao. Iena haroro dina ginigunana ai, lau ia nanadaia, ‘Ia namo egu Baibel stadi haida oi karaia?’ Mai hoa ida ia lau itaia. Micheal ia gwau, ia ese Baibel stadi toi ia hamatamaia bona ia ura ia lau durua stadi lau hakaua totona.” Mani oi laloa, hadibaia taudia be momo lasi dainai, Baibel stadi taudia be Baibel hadibaia taudia danu!

Amy ia laloparara heduru bada idia ura, ia gwau: “Ghana dekenai lau ginidae, bena nega sisina murinai, hanua ta dekenai ai haroro bona taia kudima taudia ai tahua. Unai hanua tamona ai, taia kudima taudia 8 ai davaria!” Gabeai, Amy ese Eric ia adavaia, bona idia rua be hari spesel painia gaukara idia karaia. Idia rua ese saini gado kongrigeisen ai idia noho bona taia kudima pablisa taudia 300 mai kahana bona kamonai taudia idia durua. George bona Adria be Ghana ai edia hesiai gaukara idia karaia dainai, misinari taudia edia mauri idia mamia. Gabeai, revareva idia abia Gilead Sikuli ena klas namba 126 dekenai do idia lao neganai, idia moale bada! Hari, idia be Mozambique ai misinari gaukara idia karaia.

Ita moale badina tano ma haida amo tadikaka taihu momo be idau tano dekenai idia lao bona unai tano tadikaka bona taihu ida gogoa gaukarana idia durua. (Ioa. 4:35) Lagani tamona ena wiki ta ta ai, Ghana dekenai taunimanima 120 idia bapatiso. Ghana dekenai idia lao taudia 17 hegeregerena, tanobada hegegemadai pablisa taudia tausen momo be Iehova idia lalokau henia dainai, “mai ura ida sibona idia henia.” Idia be Basileia harorolaia taudia momo lasi gabudia dekenai idia lao. Idia be sibona idia henia dainai, Iehova ena lalona idia hamoalea!​—Sal. 110:3; Aon. 27:11.