WEDNESDAY January 18, 2023 ai, jw.org dekenai spesel hadibaia hereva ta idia halasia, Tadikaka Gage Fleegle bona Jeffrey Winder be Iehova ena Witnes Taudia edia Hakaua Oreana ena memba matamatadia. Inai tadikaka rua be lagani daudau lalonai Iehova idia hesiai henia.

Tadikaka Fleegle be Pennsylvania, U.S.A., ena west kahana ai, iena Witnes tama sina ida ia tubu daekau. Ia matamata neganai, ena famili be taoni maragina ta dekenai idia lao, unai amo pablisa momo lasi gabuna ai heduru idia henia diba. Daudau lasi murinai, November 20, 1988 ai, bapatiso ia abia.

Tadikaka Fleegle be nega ibounai ena tama sina ese idia hagoadaia ful-taim hesiai gaukara ia karaia totona. Nega momo edia ruma dekenai sekit naria taudia bona Betele taudia idia boiria, bona Tadikaka Fleegle ia itaia unai tadikaka taihu be idia moale. Ia bapatiso bona daudau lasi murinai, September 1, 1989 ai, regula painia ia hamatamaia. Lagani rua murinai, Betele dekenai ia gaukara, unai be ena mauri lagani be 12 neganai, ia atoa tahua gauna. October 1991 ai, Brooklyn Betele ai ia gaukara matamaia.

Betele ai, Tadikaka Fleegle be lagani 8 lalonai Bindery dekenai ia gaukara, unai murinai, Service Department dekenai ia gaukara. Unai nega ai, lagani haida lalonai Russia gado kongrigeisen ia bamoa. Lagani 2006 ai, Nadia ia adavaia bona ia ida Betele ai idia gaukara. Idia ruaosi be Portuguese gado kongrigeisen idia bamoa, bona lagani 10 mai kahana Spanish gado kongrigeisen idia bamoa. Lagani momo lalonai, Tadikaka Fleegle be Service Department ai ia gaukara murinai, Hadibaia Komiti ena Ofesi dekenai ia gaukara, bena gabeai Service Committee ena Ofesi dekenai ia gaukara. Lagani 2022 March ai, idia abia hidi bona ia be Hakaua Oreana ena Service Committee ena durua tauna ta ai ia lao.

 Tadikaka Winder be Murrieta, California, U.S.A ai tubu daekau. Ia be ena Witnes tama sina ese idia durua ela bona March 29, 1986 ai ia bapatiso. Bona murina hua ai, heduru painia gaukara ia hamatamaia. Unai ia moalelaia dainai, ia ura do ia painia noho. Hua haida heduru painia ia karaia murinai, October 1, 1986 ai, regula painia gaukara ia hamatamataia.

Tadikaka Winder be ia matamata neganai, Betele ai iena kakadia rua ia vadivadi henia, idia be unuseniai idia gaukara. Unai vadivadi ese ia durua dainai, ia bada neganai, ia ura Betele ai do ia gaukara. Bona May 1990 ai, ia idia boiria Wallkill Betele ai ia gaukara totona.

Betele ai, Tadikaka Winder be dipatmen idauidau dekenai ia gaukara, hegeregere, Cleaning Department, Farm Department, bona Bethel Office. Lagani 1997 ai, Angela ia adavaia bona unai nega amo ema bona hari, Betele ai idia gaukara noho. Lagani 2014 ai, Warwick dekenai idia siaidia bona Tadikaka Winder be iseda hedikwota haginia gaukarana ia durua. Bena lagani 2016 ai, Patterson, Watchtower Educational Center dekenai idia siaidia lao bona unuseniai Tadikaka Winder be Audio/Video Services dekenai ia gaukara. Lagani 4 murinai, Warwick dekenai idia siaidia lou bona unuseniai Tadikaka Winder be Gaukara Taudia Naria Komiti ena Ofesi ai ia gaukara. Bona lagani 2022 March ai, idia abia hidi bona ia be Hakaua Oreana ena Service Committee ena durua tauna ta ai ia lao.

Iehova ese ita dekenai “taunimanima be harihari gaudia bamona ia henia” bona idia totona ita guriguri, unai amo Basileia gaukaradia do idia karaia noho.—Efe. 4:8.