Hari, disasta be idia vara momo. Disasta ia vara neganai, idia hegaegae namonamo bona heduru idia henia haraga. Unai dainai, Hakaua Oreana ese dala ia karaia brens ta ta ai Disaster Relief Depatmen ia noho totona.

Unai depatmen ai tadikaka idia kamonai disasta ta ia vara neganai, karaharaga elda taudia idia rin henia bona idia sekea pablisa taudia dekenai dahaka heduru idia henia diba. Bema unai disasta ese dika bada ia havaraia bona pablisa taudia ese idia hamaoromaoroa diba lasi, vadaeni brens ese tadikaka haida do ia abia hidi heduru idia henia totona. Unai tadikaka be volantia taudia totona do idia noinoi eiava gau haida hoia totona kontribiusen totona do idia noinoi, eiava idia ese gau matamatadia do idia hoia bona tadikaka taihu dekenai idia henia.

Nega momo unai dala idia badinaia neganai, namo ia havaraia. To bema tadikaka be sibodia edia lalohadai idia badinaia, do idia daradara, nega do idia haorea bona moni bona kohu do idia gaukaralaia kava.

Brens ese ia abia hidi tadikaka be disisen idia karaia diba moni hida bona volantia hida idia gaukaralaia diba relief gaukara idia durua totona. Danu, gavamani ena ofesa taudia ida idia herevahereva diba, unai amo heduru idia henia haraga. Unai dainai namo lasi sibona emu diba dekenai moni oi gogoa, aniani o kohu oi siaia eiava disasta gabuna dekenai oi lao. To namona be elda taudia edia hereva oi badinaia.

To, disasta ia vara neganai, ita ura heduru ita henia. (He 13:16) Iseda tadikaka bona taihu ita lalokau henia! Dahaka ita karaia diba? Namona be disasta ai dika idia davaria taudia bona relief gaukara idia durua tadikaka taihu totona ita guriguri. Danu maua ladana, Tanobada Ibounai Gaukarana dekenai kontribiusen ita atoa diba. Hakaua Oreana ena hakaua henunai, brens ofesi ta ta ese disasta ia vara gabudia ai heduru maorona idia henia diba. Bona bema ita ura heduru ita henia, Local Design/Construction Volunteer Application (DC-50) ita hahonua, unai amo tadikaka do idia diba ita ura heduru ita henia.

VIDIO LADANA BRAZIL AI ABATA BADANA IA VARA ITAIA, BENA INAI HENANADAI HAERELAIA:

Lagani 2020 Brazil ai, abata ia vara murinai, Iehova ena Witnes taudia edia relief gaukara amo dahaka oi moalelaia?