Taunimanima momo, sibona idia gwauraia Keristani taudia haida danu, idia gwau hari inai negai Baibel ena taravatu headava bona mahuta hebou karana dekenai be taunimanima do idia durua lasi. Inai nega ena mauri dalana badinaia totona, dubu haida ese dahaka be maoro bona kerere hadibaia dalana idia haidaua. Hari Baibel ena taravatu badinaia karana be mai anina bada, a? Oibe. Inai atikol ese badina haida do ia herevalaia.

 Dirava be Havaraia Tauna dainai taunimanima be iena heduru dekenai do idia tabekau. Baibel ia gwau: “Tau ta be ia hegeregere lasi sibona ia hakaua totona.” (Ieremia 10:23) Ena be Iehova a Dirava ese ita dekenai diba ia henia abia hidi ita karaia totona, to ita dekenai maoro ia henia lasi dahaka be maoro bona kerere ita abia hidi totona. Unai dainai ia ura ita be ia dekenai do ita tabekau.​—Aonega Herevadia 3:5.

 Dirava ena kara maoromaoro taravatudia be Baibel lalonai do ita davaria. Unai taravatu be mai anina bada ena badina rua be inai.

•   Dirava ese ita ia karaia. (Salamo 100:3) Iehova Dirava be iseda Havaraia Tauna dainai, ia diba dahaka ese iseda helt, tauanina, hemami, lalohadai do ia durua bona ita do ia hamoalea. Danu ia diba iena kara maoromaoro taravatudia ita badinaia lasi karana ese dika do ia havaraia. (Galatia 6:7) Bona Iehova ia ura mauri namona ita moalelaia. Unai dainai Baibel ia gwau, Dirava ‘ese umui ia hadibaia noho, namo umui davaria totona, Ia ese umui ia hakaua noho, dala maorona ai umui raka totona.’​—Isaia 48:17.

•   Iseda ura idauidau ese ita ia hakaua kerere diba. Taunimanima momo idia laloa dahaka be maoro bona kerere ena idau do idia diba, bema edia kudouna idia badinaia. To Baibel ia gwau, “kudouna be ia koikoi momo, bona ia ura dika ia havaraia.” (Ieremia 17:9) Bema iseda kudouna ese Dirava ena aonega dalana ia badinaia lasi, unai ese gabeai lalohisihisi ia havaraia dalana ai ita ia hakaua diba.​—Aonega Herevadia 28:26; Hadibaia Tauna 10:2.

 Lasi! Baibel ena hereva momokani ese Dirava bona ia ura do ita badinaia karadia ia hadibaia. (1 Korinto 6:9-11; Galatia 5:19-23) Dirava ia ura taunimanima ese hereva momokani do idia dibaia. (1 Timoteo 2:3, 4) Unai dainai, Keristani taudia ese Dirava ena Hereva idia hadibaia be namo.​—Tito 1:7-9.

 Baibel ena kara maoromaoro taravatudia idia ura lasi kamonai henia taudia momo be “idia ura henia gaudia sibona idia kamonai totona” tomadiho gunalaia taudia dekenai idia lao. (2 Timoteo 4:3) To, Dirava ena hereva lalonai inai sisiba ia noho: “Namo idia gwauraia dika bona dika idia gwauraia namo taudia, . . . be dika do idia davaria!” (Isaia 5:20) Ia hedinarai goevagoeva Dirava ese tomadiho gunalaia taudia do ia hahemaoro henia. Badina Dirava ia atoa taravatu maoro bona kerere dekenai be taunimanima idia hadibaia lasi.

 Lasi. Dirava idia ura hamoalea taudia ese Iesu Keriso ena haheitalai bona hahediba dalana idia badinaia. Ia murinai idia raka taudia ia hadibaia ma haida idia hahemaoro henia lasi, to ibounai dekenai lalokau bona hemataurai do idia hahedinaraia.​—Mataio 5:43, 44; 7:1.

 Iesu murinai idia raka taudia be edia mauri lalonai Dirava ena kara maoromaoro taravatudia idia badinaia. To, idia ia hadibaia ma haida ese idia abia dae gaudia o taravatu idia matauraia. (Mataio 10:14) Iesu ese ia murinai idia raka taudia ia hamaoroa lasi politik o gau ma haida dekenai taunimanima idia doria Dirava ena lalohadai idia badinaia totona.​—Ioane 17:14, 16; 18:36.

 Dirava ese maoro bona kerere ena taravatu ia atoa bona unai idia ura badinaia taudia ese namo do idia davaria hari bona vaira negai danu. (Salamo 19:8, 11) Taravatu badinaia ena namo haida be inai:

•   Moale ia habadaia.​—Aonega Herevadia 29:6.

•   Dirava tura henia namonamo karana.​—Aonega Herevadia 3:32.

•   Nega aukadia ai Dirava ese heduru ia henia.​—Aonega Herevadia 11:8.

•   Tanobada ai mauri hanaihanai ena helaro.​—Salamo 37:29.