Vajtswv Xav Kom Peb Paub Nws Lub Tswvyim

‘Kuv yog Yehauvas . . . tus uas qhia qhov zoo rau nej thiab coj nej taug txojkev uas tsim nyog taug. Yog nej ua tib zoo mloog kuv tej lus sam hwm! Ces tej koob hmoov yuav ntws laub lug los rau nej ib yam li tus dej ntws tsis paub nqhuab li. Nej tej kev vam meej yuav zoo ib yam li hiavtxwv ntas.’​—YAXAYAS 48:17, 18.

Thaum koj nyeem cov lus no muab xav tias yog Yehauvas caw koj los kawm ntawm nws. Nws tsuas xav pab kom koj tau nyob kaj siab lug mus ib txhis xwb.

Vajtswv Xav Pub Tswvyim Rau Koj

‘Yuav tsum muaj neeg mus qhia txoj xov zoo rau txhua haivneeg.’​—MALAKAUS 13:10.

Txoj ‘xov zoo’ qhia tias Vajtswv yuav rhuav tshem kev txom nyem mus, yuav muab lub ntiajteb kho ua ib lub Vaj Kaj Siab, thiab yuav tsa cov tuag ciaj sawv rov los. Yehauvas Cov Timkhawv tab tom tshaj tawm txoj xov zoo no thoob ntiajteb ntag.