Nyob rau zaj uas hais tas los no, peb tham txog tej xwm txheej Yexus qhia. Tej ntawd qhia tias Vajtswv lub tseem fwv twb pib kav saum ntuj ceeb tsheej lawm, thiab Yexus Khetos yog tus kav lub tseem fwv ntawd.

Phau Vajlugkub qhia tias thaum Yexus ua vajntxwv kav, thawj yam nws ua yog muab Xatas thiab Xatas cov dab ncaws tawm tsis pub nyob saum ntuj ceeb tsheej ntxiv lawm. Lawv tsuas nyob tau hauv ntiajteb no lawm xwb. Vim li ntawd, txij xyoo 1914 los thiaj muaj ntau yam kev phem ua luaj.​—Tshwmsim 12:7, 9.

Txawm tias tej yam hauv ntiajteb tsuas phem zuj zus ntxiv xwb los, Yexus uas yog tus kav Vajtswv lub tseem fwv twb ua ntau yam los pab tibneeg hauv ntiajteb lawm. Nws tau pab li cas? Nws txhawb tes haujlwm mus qhia Vajlugkub thoob ntiajteb. Vim li ntawd, coob leej thiaj paub tej hauv paus ntsiab lus hauv Vajlugkub thiab muab siv rau hauv lawv lub neej. (Yaxayas 2:2-4) Xws li, lawv paub tias lub cuab lub yig yuav ua li cas thiaj muaj kev zoo siab thiab kev khwv noj khwv haus tsis yog yam ua tseem ceeb tshaj plaws. Lawv kuj txaus siab rau tej lawv muaj xwb es tsis mus laub khoom ub khoom no ntxiv. Tej uas lawv  kawm pab tau lawv lub neej lawm ntau. Tamsim no, lawv xyaum coj li cov neeg uas yuav nyob hauv lub vaj kaj siab thaum Vajtswv lub tseem fwv kav ntiajteb.

Txawm tias Yexus twb kav saum ntuj ceeb tsheej lawm los, hauv ntiajteb no tseem muaj tej tseem fwv uas kav tibneeg. Txawm li ntawd los, Vajtswv hais rau Yexus tias: “Koj cia li kav koj cov yeebncuab huv tibsi.” (Phau Ntawv Nkauj 110:2) Tsis ntev tom ntej, Yexus yuav rhuav tshem tag nrho cov uas tawm tsam Vajtswv. Ua li ntawd, txhua tus uas mloog Vajtswv lus thiaj yuav tsis raug kev txom nyem lawm.

Thaum ntawd, Vajtswv lub tseem fwv yuav

• Rhuav tshem kev ntseeg cuav. Phau Vajlugkub muab kev ntseeg cuav piv rau ib tug niam ntiav uas yuav raug puas tsuaj. Yog li ntawd, tej kev ntseeg uas dag txog Vajtswv thiab ua rau tibneeg txom nyem yuav tsis muaj nyob lawm. Thaum muaj li no, tibneeg yuav xav tsis thoob li.​—Tshwmsim 17:15, 16.

• Rhuav tshem tibneeg tej tseem fwv. Vajtswv lub tseem fwv yuav rhuav tibneeg tej tseem fwv hauv ntiajteb kom puas tsuaj tag.​—Tshwmsim 19:15, 17, 18.

• Rhuav tshem cov neeg phem. Yuav ua li cas rau cov neeg uas xav ua phem thiab tsis kam mloog Vajtswv lus? “Vajtswv yuav muab tej neeg siab phem tshem tawm hauv lub tebchaws [ntiajteb, NWT] ntawd mus.”​—Pajlug 2:22.

• Rhuav tshem Xatas thiab nws cov dab. Xatas thiab nws cov dab yuav tsis “los ntxias txhua haivneeg” ntxiv lawm.​—Tshwmsim 20:3, 10.

Yog li ntawd, cov uas txhawb Vajtswv lub tseem fwv lub neej yuav zoo li cas?

Yexus yog tus Vajntxwv uas kav saum ntuj ceeb tsheej. Nws yuav kav zoo tshaj txhua tus tibneeg uas tau kav los lawm, thiab yuav muaj 144,000 leej uas Vajtswv xaiv los nrog Yexus kav. (Tshwmsim 5:9, 10; 14:1, 3) Yexus yuav ua kom txhua yam hauv ntiajteb muaj raws li Vajtswv lub siab nyiam. Yog li ntawd, yuav muaj li cas thaum Vajtswv lub tseem fwv kav tibneeg hauv ntiajteb?

• Yuav tsis muaj kev mob kev nkeeg thiab kev tuag li lawm. “Yuav tsis muaj leejtwg nroo hais tias: ‘Kuv muaj mob,’” thiab “tej kev tuag . . . yuav tsis muaj ib zaug li lawm.”​—Yaxayas 33:24; Tshwmsim 21:4.

• Yuav muaj kev thaj yeeb thiab sawvdaws yuav nyob tso siab plhuav. Vajtswv yuav pub “kev vammeej thiab thajyeeb rau lawv,” thiab “txhua tus yuav nyob kaj siab lug ntawm nyias tej vaj txiv hmab, txiv ncuavpias, thiab yuav tsis muaj leejtwg ua rau nws tau kev txhawj kev ntshai li.”​—Yaxayas 54:13; Mikhas 4:4.

• Yuav muaj haujlwm ntau rau sawvdaws ua. “Lawv yuav zoo siab rau txhua yam uas lawv txhais tes ua tau los.”​—Yaxayas 65:22, 23.

• Yuav tsis muaj dabtsi ua rau lub ntiajteb puas tsuaj lawm. “Tiaj suabpuam thiab lub tebchaws uas qhuav nkig nkuav yuav zoo siab heev, thiab yuav muaj paj tawg ntsa iab rau saum tej av qhuav.”​—Yaxayas 35:1.

• Tibneeg yuav kawm ntxiv seb ua li cas lawv thiaj nyob tau mus ib txhis. “Txojsia ntev dhawv mus ibtxhis ntawd yog qhov uas lawv paub koj thiab paub hais tias koj tib leeg thiaj yog Vajtswv thiab paub Yexus Khetos tus uas koj txib los.”​—Yauhas 17:3.

Vajtswv xav kom koj tau tag nrho tej koob hmoov no. (Yaxayas 48:18) Nyeem txuas ntxiv, koj thiaj paub tias yuav ua li cas thiaj tau lub neej zoo kawg nkaus ntawd.