Ang mga gannet isa ka sahi sang dalagku nga mga pispis sa dagat nga maka-dive sa tubig sa kadasigon nga asta sa 190 kilometros kada oras. Kon ang gannet magtupa sa tubig, ang impact sini mahimo magsobra sing 20 ka beses sangsa puersa sang gravity. Ngaa indi mahalitan ang gannet sa sining madasig katama kag sulitsulit nga pag-dive?

 Binagbinaga: Antes magtupa ang gannet sa tubig, nagauntay ang mga pakpak sini palikod, para mangin daw baslay ang posisyon. May panit man sa palibot sang mata sini nga nagakipot para proteksionan ini. Dayon mahabok ang mga organ sa liog kag dughan sini nga daw airbag para indi tam-an ka kusog ang impact kon magtupa ini sa tubig.

 Pagtupa sang gannet sa tubig, ang tuktok, ulo, kag liog sini daw korte-apa ang posisyon. Gani indi lang isa ka maskulo ang nagasalo sang impact kundi ang tanan nga maskulo sa liog sang gannet. Insigida man nga maka-adjust ang mga mata sang gannet para makakita ini sa idalom tubig.

 Daw ano kadalom ang malab-ot sang gannet kon mag-dive ini? Ang kadasigon sang pagbuylo sini makalab-ot sa kadalumon nga halos 11 metros, pero makasalom ini sing mas madalom pa kon magkapakapa ang nakapilo nga pakpak sini kag magsikadsikad ang mga tiil sini nga daw pareho sa pato. Ang matuod, may nakita na nga mga gannet nga naka-dive sang sobra 25 metros sa idalom sang dagat. Pagkatapos sini mag-dive, mahapos lang ini magpalutaw para makabutwa sa tubig, kag maglupad naman liwat.

 Tan-awa ang naga-dive nga mga gannet

 Naghimo ang mga researcher sang robot nga mga gannet nga magamit sa search-and-rescue operation. Gindesinyo nila ini nga makalupad, maka-dive sa tubig, kag makalupad liwat. Pero sang gintestingan nila ini, ang isa ka robot pila ka beses nga naguba bangod sang kakusog sang impact sa tubig. Gani ang mga researcher nagsiling nga ang ila ginhimo nga robot “indi pareho kasagad sang gannet sa pag-dive.”

 Ano sa banta mo? Ang abilidad sang gannet sa pag-dive resulta bala sang ebolusyon? Ukon gindesinyo ini?