Ano ang Ginhalinan sang Halloween?

I-PLAY

Ang sabat sang Biblia

Ang Halloween, nga isa ka selebrasyon nga ginahiwat sang madamo kada Oktubre 31, wala ginsambit sa Biblia. Ang ginhalinan kag ang mga tradisyon nga ginahimo kon Halloween supak sa ginatudlo sang Biblia.

Sa sini nga artikulo

Ang ginhalinan sang Halloween kag sang mga tradisyon sini

Samhain: Ang Halloween naghalin sa “dumaan nga pagano nga kapiestahan nga ginselebrar sang mga Celt, sobra 2,000 ka tuig na ang nagligad,” siling sang The World Book Encyclopedia. “Ang mga Celt nagapati nga ang mga patay nagapakig-upod sa mga buhi sa sini nga tion. Sa tion sang Samhain, ang mga buhi mahimo magbisita kaupod sang mga patay.”—Tan-awa ang “ Ngaa ginatawag ini nga Halloween?”
Mga kostyum sang Halloween, dulse, kag trick or treat: Suno sa isa ka reperensia, ang pila ka Celt nagasuksok sing makahaladlok nga kostyum agod “masal-an sila sang nagalagawlagaw nga mga espiritu nga mga espiritu man” kag indi sila paghalitan. Ang iban nagahalad pa gani sing matam-is nga mga pagkaon para indi maakig sa ila ang mga espiritu. a

Sa Europe sang una, ginbaton sang mga klero sang Katoliko ang pagano nga mga kustombre kag ginsilingan ang ila mga sakop nga magkostyum kag magpamalaybalay kag mangayo sing gagmay nga mga regalo.
Murto, bampira, werewolf, manughiwit, kag zombie: Madugay na ini ginpatihan nga may koneksion sa kalibutan sang malain nga mga espiritu. Sa libro nga Halloween Trivia, gintawag sila nga “gamhanan nga mga monster,” kag mga tinuga “nga may labot sa kamatayon, sa patay, kag sa kahadlok nga mapatay.”
Mga kalabasa nga ginagamit sa Halloween, ukon jack-o’-lantern: Sa Britain sang una, ang mga tawo “nagakadto sa mga balay kag nagapangayo sing pagkaon kabaylo sang pangamuyo para sa patay,” kag nagadala sila sing “ginbuhuan nga singkamas nga may kandila sa sulod, nga nagasimbulo sang kalag nga indi na makagua sa purgatoryo.” (Halloween—From Pagan Ritual to Party Night) Ang iban nagasiling nga ini nga mga lantern ginagamit para tabugon ang malain nga mga espiritu. Sang dekada 1800 sa North America, kalabasa na ang gingamit imbes nga singkamas kay mas madamo ini didto kag mas mahapos buhuan kag kortehan.

Importante bala nga mabal-an kon ano ang ginhalinan sang Halloween?

Huo. Para sa iban, daw indi man malain ang Halloween kay kalingawan lang ini. Pero ang ginahimo sang mga tawo kon Halloween supak sa ginatudlo sang Biblia. Kay man, nabase ini sa sala nga mga pagpati parte sa patay kag sa indi makita nga mga espiritu, ukon mga demonyo.

Binagbinaga ang masunod nga mga bersikulo nga nagapakita kon ano ang pagtan-aw sang Dios sa mga ginahimo kon Halloween:

“Wala sing bisan sin-o sa inyo nga . . . nagadangop sa espiritista ukon sa manugpakot sing mga hitabo, ukon bisan sin-o nga nagapamangkot sa patay.”—Deuteronomio 18:10-12.

Ang buot silingon: Indi gusto sang Dios nga makig-istorya sa mga patay ukon bisan ang lahuglahog lang nga pagpakig-istorya sa mga patay.
“Ang mga patay wala gid sing nahibaluan.”—Manugwali 9:5.

Ang buot silingon: Ang mga patay indi makapakig-istorya sa mga buhi.
‘Indi magpakig-ambit sa malaot nga mga espiritu. Indi mahimo nga mag-inom kamo sa tasa sang Ginoo kag sa tasa sang malaot nga espiritu.’—1 Corinto 10:20, 21, Ang Pulong sang Dios, APD.

Ang buot silingon: Kon gusto sang isa nga malipay ang Dios sa iya dapat nga likawan niya ang bisan ano nga koneksion sa malaut nga mga espiritu ukon mga demonyo.
“[Magtindog] kamo sing malig-on batok sa tuso nga mga pahito sang Yawa; bangod nagapakig-away kita . . . batok sa puersa sang malaut nga mga espiritu.”—Efeso 6:11, 12.

Ang buot silingon: Ang mga Cristiano dapat magpakig-away sa puersa sang malaut nga mga espiritu, kag indi maghimo sang bisan ano nga nagapakita nga nagaselebrar sila upod sa mga demonyo.