“Padunggi ang inyo amay kag ang inyo iloy, agod magkabuhi kamo sing malawig sa duta nga ginahatag sa inyo ni Jehova nga inyo Dios.”—Exodo 20:12, Bag-ong Kalibutan nga Badbad.

 “Tahura ang imo amay kag iloy, agod nga magkabuhi ka sing malawig sa duta nga ginhatag sang GINOO nga imo Dios.”—Exodo 20:12, Maayong Balita nga Biblia.

 Ginsugo sang Dios ang mga Israelinhon sadto nga padunggan ang ila mga ginikanan. Paagi sa pagdugang sang promisa sa sini nga sugo, naghatag sia sang isa pa ka rason para tumanon ini. Bisan pa indi na kinahanglan nga tumanon sang mga Cristiano ang Mosaikong Kasuguan, ang Kasuguan nga ginhatag sang Dios sa mga Israelinhon, ang iya mga ginapatuman wala nagbag-o. Ang mga prinsipio nga ginbasihan sang Kasuguan sang Dios amo gihapon, gani importante ini sa mga Cristiano.—Colosas 3:20.

 Ginapadunggan sang mga kabataan—bata pa ukon dalagku na—ang ila mga ginikanan kon ginarespeto kag ginapati nila sila. (Levitico 19:3; Hulubaton 1:8) Bisan pa magdalagku na ang mga kabataan kag may pangabuhi na nga ila, padayon gihapon nila nga ginapalangga kag ginabuligan ang ila mga ginikanan. Halimbawa, ginasigurado nila nga naatipan sing maayo ang ila tigulang na nga mga ginikanan, kag ginasuportahan pa gani sila sa pinansial kon kinahanglan.—Mateo 15:4-6; 1 Timoteo 5:4, 8.

 Dumduma nga dapat padunggan sang Israelinhon nga mga kabataan ang ila amay kag iloy. Ginapakita sini nga ginakilala gid sadto ang importante nga papel sang iloy sa pamilya. (Hulubaton 6:20; 19:26) Dapat amo man sini ang himuon sang mga kabataan subong.

 Pero, ang sugo nga padunggan ang mga ginikanan may limitasyon man. Indi kinahanglan tumanon sang Israelinhon nga mga kabataan ang ila mga ginikanan, ukon ang bisan sin-o nga tawo, kon ang ginasugo nila supak sa ginasugo sang Dios. (Deuteronomio 13:6-8) Pareho sang una, ‘ginatuman man sang mga Cristiano ang Dios subong manuggahom sa baylo sang mga tawo.’—Binuhatan 5:29.

 Sa Kasuguan nga ginhatag sang Dios sa Israel, nagpromisa sia nga ang mga kabataan nga nagapadungog sa ila mga ginikanan ‘magakabuhi sing malawig kag magauswag’ sa duta nga ginhatag sa ila sang Dios. (Deuteronomio 5:16) Sadto, kon indi magpati sa kasuguan sang Dios kag magrebelde sa ila mga ginikanan ang dalagku na nga mga kabataan, ginasilutan sila. Pero indi gid ini matabo sa mga kabataan nga nagapadungog sa ila mga ginikanan. (Deuteronomio 21:18-21) Ang mga prinsipio nga ginbasihan sini nga mga kasuguan wala nagbag-o bisan sa pagligad sang panahon. (Efeso 6:1-3) Bata man kita ukon dalagku na, manabat kita sa aton Manunuga. Kag suno gid sa iya ginpromisa, ang mga kabataan nga nagapati sa iya kag sa ila mga ginikanan magakabuhi sing malawig. Ang matuod, may paglaum sila nga mabuhi sing dayon.—1 Timoteo 4:8; 6:18, 19.

 Ang sugo sa Exodo 20:12 bahin sang Napulo ka Sugo. (Exodo 20:1-17) Ang mga sugo antes sini nagapaathag sang mga obligasyon sang mga Israelinhon sa Dios, pareho sang sugo nga sia lamang ang dapat nila simbahon. Ang mga sugo pagkatapos sini nagapaathag sang ila mga obligasyon sa ila isigkatawo, lakip ang mga sugo nga mangin matutom sa ila bana ukon asawa kag indi magpangawat. Gani, ang sugo nga “padunggi ang inyo amay kag ang inyo iloy” daw pareho sa taytay nga nagasugpon sining duha ka grupo sang mga sugo.