Ginabulubanta nga mga lima ka bilyon ka tawo ang magalantaw sang FIFA World Cup nga ginahiwat sugod sang Nobiembre 20 asta Disiembre 18, 2022. Ginapatihan sang madamo nga ini nga sporting event wala lamang nagapabatyag sa mga tawo nga nahiusa sila bangod palareho sila nga nagatan-aw sang hampang.

•   “Ang sport may gahom sa pagbag-o sang kalibutan. May gahom ini sa pagpahulag sa mga tawo. May gahom ini sa paghiusa sa mga tawo sa espesyal nga paagi.”—Nelson Mandela, presidente sadto sang South Africa.

•   “Ang football . . . nagapabatyag sa mga tawo nga nahiusa sila sa ila paglaum, sa ila kalipay, sa ila balatyagon, sa ila gugma, kag nahiusa sila bisan pa naghalin sila sa sarisari nga pungsod.”—Gianni Infantino, presidente sang FIFA. a

 Mahimo gid bala ini sang World Cup ukon sang iban pa nga sporting event? Posible gid bala nga matigayon ang paghidait kag paghiusa?

 Ang World Cup sini nga tuig indi lamang football. Ang mga hampang sa sini nagresulta sa mga debate parte sa mga isyu sa komunidad kag pulitika pareho sang kinamatarong sang tawo, diskriminasyon sa rasa, kag indi pareho nga sitwasyon sang pangabuhi.

 Siempre, madamo ang nanamian magtan-aw sang mga international sporting event pareho sang World Cup. Pero bisan pa gustuhon sang mga tawo, ini nga mga event indi gid makahatag sang permanente nga paghiusa. Ang matuod, pirme makita sa sini nga mga hampang ang mga batasan kag mga buhat nga nagapabahinbahin sa mga tawo. Kag siling sang Biblia ina nga mga batasan nalakip sa mga tanda sang panahon nga ginatawag “katapusan nga mga adlaw.”—2 Timoteo 3:1-5.

 Ang Biblia nagasugid sang matuod nga paglaum nga mahiusa ang kalibutan. Nagapromisa ini nga ang tanan nga tawo sa duta mahiusa sa paggahom sang isa ka gobierno sa langit nga ginatawag “Ginharian sang Dios.”—Lucas 4:43; Mateo 6:10.

 Siguraduhon sang Hari sina nga Ginharian, nga si Jesucristo, nga may paghidait sa bilog nga duta. Ang Biblia nagasiling:

•   “Magalambo ang matarong, kag magabugana ang paghidait.”—Salmo 72:7.

•   “Luwason niya ang imol nga nagapangayo sing bulig . . . Luwason niya sila sa pagpamigos kag sa pagpamintas.”—Salmo 72:12, 14.

 Bisan subong, minilyon ka tawo na ang nahiusa sa 239 ka kadutaan bangod ginsunod nila ang mga panudlo ni Jesus. Natun-an nila nga indi magdumot. Para sa dugang nga impormasyon, basaha ang mga artikulo nga may tig-ulo “Pagtapos sa Wala Untat nga Pagdumtanay.”