Sang aga sang Pebrero 24, 2022, gin-atake sang militar sang Russia ang Ukraine, bisan pa gintinguhaan sang mga lider sa kalibutan nga punggan ini nga inaway. Ano ang puede nga mangin epekto sini nga inaway sa kalibutan? Pila ka adlaw lang ang nagligad, ang secretary-general sang United Nations, nga si António Guterres nagsiling: “Indi naton ma-imadyin kon daw ano kadaku nga pag-antos, kagulub-an, kag kahalitan ang dal-on sini nga inaway sa seguridad sang mga pungsod sa Europa kag sa bilog nga kalibutan.”

•   Gintagna ni Jesucristo nga maabot ang tion nga “magailinaway ang mga pungsod kag subong man ang mga ginharian.” (Mateo 24:7) Basaha ang artikulo nga “Ano ang Tanda sang ‘Katapusan nga mga Adlaw,’ Ukon sang ‘Katapusan nga Panahon’?” para mabal-an mo kon paano ginasugid sang Biblia nga ang mga inaway subong katumanan sang tagna ni Jesus.

•   Sa libro sang Bugna sa Biblia, ang inaway ginlaragway nga manugkabayo nga nagasakay sa “kabayo nga daw kalayo ang kolor” kag ‘nagakuha sing paghidait sa duta.’ (Bugna 6:4) Basaha ang artikulo nga “Ang Apat ka Manugkabayo—Sin-o Sila?” para mabal-an mo kon paano ini nga tagna parte sa inaway nagakatuman sa aton panahon subong.

•   Sa libro sang Daniel may gintagna nga pagkontrahanay sang “hari sang aminhan” kag sang “hari sang bagatnan.” (Daniel 11:25-45) Tan-awa ang video nga Natuman nga Tagna—Daniel Kapitulo 11. Ginapaathag sini nga video kon ngaa masiling nga ang Russia kag ang mga kaalyado sini amo ang hari sang aminhan. a

•   Ginsugid man sang libro sang Bugna “ang inaway nga mahanabo sa daku nga adlaw sang Dios nga Labing Gamhanan.” (Bugna 16:14, 16) Pero indi ini ang inaway sang mga pungsod pareho sang nagakatabo subong. Para sa dugang nga impormasyon parte sa sina nga hitabo sa palaabuton, basaha ang artikulo nga “Ano ang Inaway sa Armageddon?”

•   Ang Biblia nagasiling nga ‘pauntaton sang Dios ang mga inaway sa bug-os nga duta.’ (Salmo 46:9) Para sa dugang nga impormasyon parte sa palaabuton nga ginapromisa sang Dios, basaha ang artikulo nga “Makalaum Kita nga Mangin Maayo ang Aton Sitwasyon sa Palaabuton.”

•   Gintudluan ni Jesus ang iya mga sumulunod nga mangamuyo nga magkari ang Ginharian sang Dios. (Mateo 6:9, 10) Ina nga Ginharian isa ka gobierno sa langit nga gamiton sang Dios para tumanon ang iya kabubut-on diri sa duta. Kag nalakip sa kabubut-on sang Dios nga may paghidait sa kalibutan. Para mabal-an mo kon paano ka makabenepisyo sa sini nga Ginharian, tan-awa ang video nga Ano ang Ginharian sang Dios?

 Sobra 129,000 ang mga Saksi ni Jehova nga nagaistar sa Ukraine. Pareho sa mga Saksi sa iban nga pungsod, ginasunod nila si Jesus paagi sa pagkabuhi nga neutral sa pulitika kag wala sila nagaentra sa inaway. (Juan 18:36) Sa bilog nga kalibutan, padayon nga ginasugid sang mga Saksi ni Jehova ang “maayong balita sang Ginharian” bilang solusyon sa mga problema sang katawhan, lakip ang inaway. (Mateo 24:14) Para mabal-an mo ang dugang nga impormasyon parte sa paglaum nga ginasugid sang Biblia, ginaagda ka namon nga kontakon kami.