Katapusan na Bala sang Planeta nga Duta?

Sa diin ang imo sabat sa masunod nga pamangkot?

Ano ang mangin kahimtangan sang duta sa palaabuton?

(a) Mangin maayo.

(b) Amo man gihapon.

(c) Magalala pa gid.

POSITIBO bala ang imo pagtamod sa palaabuton? Kon huo, may maayo gid ini nga mga epekto. Halimbawa, ginapakita sang mga pagtuon nga mas maalam kag mapagros ang mga tawo nga may positibo nga pagtamod. Nasapwan man sang isa ka malawig nga pagtuon nga ang mga tawo nga may negatibo nga pagtamod sa kabuhi amo sa masami ang nagabalatian sa tagipusuon. Nahisanto gid ini sa ginsiling sang Biblia pila ka siglo na ang nagligad: “Ang tagiposoon nga malipayon maayo nga bolong, apang ang espiritu nga boong nagapamala sang mga tul-an.”​—Hulubaton 17:22.

Apang, bangod sa mga ginabulubanta sang mga sientipiko nga matabo sa Duta sa palaabuton, madamo ang nabudlayan nga magpabilin nga malipayon kag positibo. Binagbinaga ang pila lang sining makahaladlok nga mga balita tuhoy sa palaabuton.

Ang Planeta Yara sa Katalagman

Sang 2002, ang Stockholm Environment Institute nagpaandam nga kon indi matapna ang pag-abuso sang mga tawo sa palibot  bangod sa ila pagtinguha nga pauswagon ang ekonomiya, mahimo “magbag-o sing bug-os ang klima kag sistema sang ekolohiya sang duta.” Nagsiling pa ang report nga ang kaimulon, wala katapusan nga inhustisya, kag pagkaubos sang duna nga manggad mahimo magresulta sing “asud-asod nga problema sa katilingban, seguridad, kag pagkaguba sang duta.”

Pagkatapos sang apat ka tuig nga pagtuon sang planeta nga Duta sang sobra 1,360 ka eksperto gikan sa 95 ka pungsod, sang 2005, nagpagua ang Nasyones Unidas sang Millennium Ecosystem Assessment Synthesis Report. Ini nagpaandam: “Bangod sa sobra nga pag-abuso sang mga tawo sa palibot, indi na mapat-od kon masakdag pa sang sistema sang ekolohiya sang Duta ang masunod nga mga henerasyon.” Agod matapna ang pagkaguba sang palibot, kinahanglan ang “daku nga mga pagbag-o sa mga pagsulundan, pagdumalahan, kag pagginawi, apang wala pa gid ini masugdan tubtob karon,” siling sang report.

Ang pangulo nga direktor sang United Nations Human Settlement Programme nga si Anna Tibaijuka nagsiling kon ano ang ginapatihan sang kalabanan nga mga manalawsaw: “Kon indi kita maghimo sing mga pagbag-o, delikado ang aton mangin palaabuton.”

Kon Ngaa Mangin Positibo

Ang mga Saksi ni Jehova nga nagabalhag sini nga magasin, nagapati nga malapit na ang daku nga mga pagbag-o sa kahimtangan sang duta. Apang, kumbinsido sila nga ini nga mga pagbag-o indi magadul-ong sa malaglagon nga palaabuton kundi magaresulta sa pinakamaayo nga kahimtangan sa kalibutan. Ngaa amo sina ang ila paglaum? Bangod nagasalig sila sa mga saad sang Biblia. Ang isa sini nga mga saad nagasiling: “Kay sa diotay pa nga tion, kag ang malauton wala na; bisan talupangdon mo sing makugihon ang iya duug, wala na sia didto. Apang ang mapainubuson magapanubli sang duta, kag magakalipay sila sa kabuganaan sang paghidait.”​—Salmo 37:10, 11.

Dalamguhanon lamang bala ini? Antes mo sabton ina nga pamangkot, hunahunaa ini sing maayo: Linibo ka tuig sa wala pa ini matabo, sibu nga gintagna sang Biblia ang dalagku nga mga problema nga nagaapektar sa duta kag sa katawhan karon. Palihug basaha ang mga kasulatan nga makita sa masunod nga artikulo kag ipaanggid ini sa nagakatabo sa kalibutan karon. Samtang ginahimo mo ini, magalig-on ang imo pagsalig nga sibu gid ang ginatagna sang Biblia tuhoy sa palaabuton.