MGA napulo ka tuig ang nagligad, ang mag-asawa nga mga treintahon nga sanday Gregorio kag Marilou, nagapayunir sa Manila samtang nagatrabaho sing full-time. Mabudlay ini, pero nagmadinalag-on sila. Nangin manedyer si Marilou sa bangko nga iya ginaubrahan. “Bangod maayo ang amon trabaho, nangin komportable ang amon kabuhi,” siling ni Marilou. Nag-ayuhan gid ang ila pangabuhi, amo nga nagdesisyon sila nga magpatindog sing balay sa isa ka maayo nga lokasyon nga mga 19 kilometros sa sidlangan sang Manila. Ginkontrata nila ang isa ka kompanya nga magpatindog sini kag nagsugtanay nga bayaran nila ini sing binulan sa sulod sang napulo ka tuig.

Si Marilou nagsiling: “Daku nga tion kag kusog ang akon ginagamit sa akon bag-o nga trabaho amo nga nadulaan ako sing gana sa espirituwal nga mga hilikuton. Pamatyag ko ginakawatan ko si Jehova.” Sia nagpaathag: “Indi ko na mahatag kay Jehova ang tion nga gindedikar ko sa pag-alagad sa iya.” Bangod indi sila malipayon sa ila kahimtangan, isa ka adlaw, gin-istoryahan nanday Gregorio kag Marilou kon diin nagapadulong ang ila kabuhi. Si Gregorio nagsiling: “Gusto namon maghimo sing pagbag-o, pero indi kami kahibalo kon paano. Gin-istoryahan namon kon paano magamit sing labi pa ang amon kabuhi  sa pag-alagad kay Jehova, ilabi na kay wala kami sing bata. Nangamuyo kami kay Jehova para giyahan kami.”

Sadto nga tion, makapila sila makabati sing mga pamulongpulong parte sa pag-alagad sa diin may mas daku nga kinahanglanon sang mga manugbantala. “Para sa amon, amo ini ang sabat ni Jehova sa amon mga pangamuyo,” siling ni Gregorio. Nangamuyo sila sing dugang nga pagtuo para mangin maisog sa paghimo sing husto nga mga desisyon. Ang isa ka daku nga problema amo ang ila ginapatindog nga balay. Tatlo ka tuig na sila nga nakabayad sini. Ano ang ila ginhimo? Si Marilou nagsiling: “Kon untaton namon ang kontrata, indi na namon mabawi ang amon nabayaran, kag daku ini nga kantidad. Pero para sa amon, isa ini ka pagtilaw kon bala unahon namon ang kabubut-on ni Jehova ukon ang amon mga handum.” Bangod sang laygay ni apostol Pablo parte sa ‘pagbaton sing kadulaan,’ wala nila ginpadayon ang pagpatindog, naghalin sila sa ila obra, ginbaligya ang madamo nila nga pagkabutang, kag nagsaylo sa isa ka lugar sa Palawan, nga mga 480 kilometros sa bagatnan sang Manila.—Fil. 3:8.

Antes magsaylo sanday Gregorio kag Marilou, ginhanda na nila ang ila kaugalingon sa simple nga kabuhi, pero wala nila mahibaluan kon daw ano ini ka simple asta nga nakaabot sila sa ila teritoryo. “Nakibot gid ako,” siling ni Marilou. “Wala sing koryente, kag kabudlay sang kahimtangan. Imbes magtig-ang sa rice cooker, kinahanglan pa namon magbi-al sing kahoy para makaluto. Nahidlaw gid ako maglagaw sa mall, magkaon sa gua, kag iban pa nga butang sa siudad.” Pero padayon nga ginpahanumdom sang mag-asawa ang ila kaugalingon kon ngaa nagsaylo sila, kag wala madugay naka-adjust na sila. Si Marilou nagsiling: “Nalipay na ako karon sa pagtan-aw sa palibot, lakip na ang nagaigpat nga mga bituon sa kagab-ihon. Labaw sa tanan, makalilipay gid makita ang kalipay sang mga tawo kon amon sila bantalaan. ‘Natun-an namon diri ang sekreto’ kon paano mangin kontento.”—Fil. 4:12.

Si Gregorio nagsiling: “Sang nag-abot kami, apat pa lang ang Saksi diri. Nalipay gid sila sang nagahatag ako sang pamulongpulong publiko kada semana kag nagaupod kanta sa ila sang mga ambahanon sa Ginharian samtang nagagitara.” Sa sulod sang isa ka tuig, nasaksihan sang mag-asawa kon paano ining gamay nga grupo nangin kongregasyon nga may 24 ka manugbantala. Si Gregorio nagsiling: “Natandog gid kami sa gugma sang kongregasyon sa amon.” Sa karon, pagligad sing sobra anom ka tuig nga pag-alagad sa sini nga lugar, nakasiling sila: “Indi matupungan ang kalipay nga makita ang pag-uswag sang kongregasyon. Subong lang namon nabatyagan nga may katuyuan ang amon kabuhi.”

Diri sa Pilipinas, mga 3,000 ka kauturan ang nagsaylo sa mga lugar diin may mas daku nga kinahanglanon sang mga manugbantala. Mga 500 sa ila ang dalaga. Ang isa ila amo si Karen.

Si Karen, nga mga 25 anyos karon, nagdaku sa Baggao, Cagayan. Sang tin-edyer sia, pirme niya ginapamensaran ang pagpasangkad sang iya ministeryo. Sia nagsiling: “Bangod nahibaluan ko nga ginpalip-ot ang tion kag ang tanan nga sahi sang tawo kinahanglan makabati sing mensahe sang Ginharian, gusto ko mag-alagad sa lugar diin mas daku ang kinahanglanon sang mga manugbantala.” Pero ginpalig-on sia sang pila sa iya pamilya nga magkuha sing mataas nga edukasyon imbes nga magsaylo sa iban nga lugar para magbantala, gani nangamuyo si Karen kay Jehova para giyahan sia. Nakig-istorya man sia sa mga nagaalagad na sa iban nga lugar. Sa edad nga 18, nagsaylo sia sa isa ka lugar nga mga 64 kilometros halin sa ila banwa.

Ang gamay nga kongregasyon nga ginasuportahan ni Karen amo ang nagabantala sa mga kabukiran sa baybayon sang Pasipiko. Si Karen nagsiling: “Para makaabot sa bag-o nga kongregasyon halin sa Baggao, nagalakat kami sing tatlo ka adlaw, nga nagataklad kag nagadulhog sa mga kabukiran kag nagatabok sing sobra 30 ka beses sa mga kasubaan.” Nagdugang pa sia: “Para makadtuan ang pila ka estudyante sa Biblia, nagalakat ako sing anom ka oras, nagatulog sa ila balay, kag pagkaaga malakat naman sing anom ka oras pauli.” Takus bala ini nga pagpangabudlay? “Kon kaisa nagasakit ang akon mga tiil, pero,” siling pa ni Karen nga nagayuhum, “18 ang akon ginadumalahan sing pagtuon sa Biblia. Natilawan ko kag nakita nga maayo si Jehova!”—Sal. 34:8.

Ano ang nagpahulag kay Sukhi, isa ka dalaga nga mga kuarentahon nga nagaistar sa Estados Unidos, nga magsaylo sa Pilipinas? Sang 2011, nagtambong sia sa isa ka sirkito nga asembleya sa diin gin-interbyu ang isa ka mag-asawa. Ginsaysay nila nga ginbaligya nila ang madamo nila nga pagkabutang kag nagsaylo sa Mexico para magbulig sa pagbantala didto. “Yadto nga interbyu,” siling ni Sukhi, “nagpahunahuna sa akon parte sa mga tulumuron nga wala ko anay napamensaran.” Sang nahibaluan ni Sukhi, nga isa ka Indian, nga nagakinahanglan sing bulig para mabantalaan ang mga Punjabi sa Pilipinas, nagdesisyon sia nga masaylo. May mga kabudlayan bala sia?

“Mas mabudlay gali ang pagdesisyon kon ano nga butang ang ibaligya kag kon ano ang indi,” siling ni Sukhi. “Subong man, pagligad sang 13 ka tuig nga pagkabuhi sing komportable sa akon apartment, temporaryo ako nga nag-istar sa isa ka pamilya. Indi  ini mahapos, pero maayo gid ini nga paagi para makahanda ako sa simple nga kabuhi.” Ano ang iya mga kabudlayan sang nagsaylo na sia sa Pilipinas? “Daku gid nga hangkat sa akon ang kahadlok sa mga insekto kag kahidlaw sa akon pamilya. Natun-an ko nga magsalig pa gid kay Jehova!” Husto bala ang iya ginhimo? Si Sukhi nagyuhum kag nagsiling: “Si Jehova nagasiling sa aton, ‘Tilawi ako karon sa sini, kon indi ko iula sa inyo ang pagpakamaayo.’ Nangin matuod gid ini sa akon sang ginpamangkot ako sang tagbalay, ‘San-o ka mabalik? Madamo pa ako sing pamangkot.’ Nalipay gid ako nga mabuligan ang mga tawo nga ginagutom sa espirituwal!” (Mal. 3:10) Si Sukhi nagdugang: “Ang pinakamabudlay nga bahin amo ang pagdesisyon nga magsaylo. Sang nakasaylo na ako, nagdayaw gid ako kon paano gintatap ni Jehova ang mga butang para sa akon.”

Si Sime, nga may asawa kag manug-40, nag-abroad sa Middle East para sa isa ka daku sing sueldo nga obra. Napalig-on sia didto sang manugtatap sang sirkito kag sang pamulongpulong sang miembro sang Nagadumala nga Hubon nga unahon si Jehova. “Pero nakulbaan ako maghalin sa akon obra,” siling ni Sime. Bisan pa sini, naghalin sia sa iya obra kag nagpauli sa Pilipinas. Si Sime kag ang iya asawa nga si Haidee, nagaalagad subong sa Davao del Sur, diin may daku nga kinahanglanon sang mga manugbantala para mabantalaan ang malapad nga teritoryo. “Sa paghinumdom,” siling ni Sime, “nagapasalamat gid ako nga nadaug ko ang akon kahadlok nga madulaan sing obra, kag gin-una ko si Jehova. Wala na sing mas makapahalipay pa sangsa ihatag ang imo pinakamaayo para kay Jehova!”

Sang nahibaluan sang mag-asawa nga payunir nga mga treintahon nga sanday Ramilo kag Juliet, nga nagakinahanglan sing bulig ang kongregasyon nga mga 30 kilometros halin sa ila balay, nagboluntaryo sila nga magbulig. Gani kada semana, maulanan man ukon mainitan, nagabalikbalik sila sakay sa ila motorsiklo sa pagtambong sa mga miting kag sa pagbantala. Ang pag-agi sa batsihon nga mga dalan kag mga hanging bridge mabudlay gid, pero malipayon sila sa pagpasangkad sang ila ministeryo. Si Ramilo nagsiling: “Kami nga mag-asawa nagadumala sing 11 ka pagtuon sa Biblia! Sakripisyo gid ang pag-alagad sa lugar diin mas daku ang kinahanglanon, pero nagahatag ini sa amon sing matuod nga kalipay!”—1 Cor. 15:58.

Gusto mo bala nga makahibalo sing dugang pa parte sa pag-alagad sa inyo lugar ukon sa iban nga pungsod diin mas daku ang kinahanglanon sang mga manugbantala? Makig-istorya sa inyo manugtatap sang sirkito kag basaha ang artikulo nga ‘Makatabok Ka Bala sa Macedonia’? sa Agosto 2011 nga Ang Aton Ministeryo sa Ginharian.