PRINSIPIO SA BIBLIA: “Ang tawo nga indi dali maakig mas maayo sangsa makusog nga tawo.”—Hulubaton 16:32.

ANO ANG BUOT SILINGON SINI? Makabenepisyo kita kon kabalo kita magkontrol sang aton balatyagon. Bisan pa may rason kita nga maakig kon kaisa, ang indi makontrol nga kaakig makahalalit gid. Ang mga researcher subong nagsiling nga kon akig ang isa, masami nga makahambal sia ukon makahimo sing butang nga hinulsulan niya sa ulihi.

ANO ANG MAHIMO MO? Kontrola ang imo kaakig sa baylo nga ikaw ang kontrolon sini. Abi sang pila ka tawo mabakod sila kon indi nila pagpunggan ang ila kaakig, pero maalamon gid kita kon batunon naton nga isa ini ka kaluyahon. “Ang tawo nga wala sing pagpugong sa iya kaakig, daw kaangay sang siudad nga narumpag ang pader,” siling sang Biblia. (Hulubaton 25:28) Ang isa ka praktikal nga paagi nga makontrol mo ang imo kaakig amo ang paghibalo anay sang bug-os nga natabo antes mag-react. “Ang paghangop sang tawo nagapahaganhagan sang iya kaakig.” (Hulubaton 19:11) Kon pamatian naton sing maayo ang natabo, maintiendihan naton ini kag makabulig ini sa aton nga mangin kalmado.

PRINSIPIO SA BIBLIA: “Ipakita nga mapinasalamaton kamo.”—Colosas 3:15.

ANO ANG BUOT SILINGON SINI? Ginasiling sang iban nga malipayon ang isa kon mapinasalamaton sia. Napamatud-an ini sang mga napatyan sing pinalangga. Nagsiling sila nga ang nakabulig sa ila nga malampuwasan ang ila kasubo amo ang pagpokus indi sa kon ano ang nadula sa ila kundi sa kon ano pa ang nabilin sa ila.

ANO ANG MAHIMO MO? Kada adlaw, ilista ang mga butang nga gusto mo pasalamatan.  Indi kinahanglan nga dalagku ini nga mga butang. Mahimo ka makapasalamat bisan sa gagmay nga mga butang, pareho sang matahom nga pagbutlak sang adlaw, maayo nga pag-istoryahanay upod sa imo pinalangga, ukon sa kabuhi mo subong. Ini nga mga butang makabulig sa imo nga mangin mas malipayon kon pamensaran mo ini kag pasalamatan.

Makabulig man sa imo ang pagpamensar kon ngaa nagapasalamat ka gid sa imo pamilya kag mga abyan. Kon may gusto ka pasalamatan parte sa iban nga tawo, isugid ini sa ila, paagi man sa hambal, sulat, e-mail, ukon text. Makabulig ini sa imo nga magbakod ang inyo relasyon kag maeksperiensiahan mo ang kalipay nga resulta sang paghatag.—Binuhatan 20:35.

LIKAWI NGA MAKIGBAIS.

“Ang pagsugod sang away kaangay sa pagbukas sang buhangan; gani antes magsugod ang baisay, maghalin ka na.”—HULUBATON 17:14.

LIKAWI NGA MAGKABALAKA SING TUMAN PARTE SA PALAABUTON.

“Indi gid ninyo pagkabalak-i ang buas, kay ang buas may kaugalingon nga mga kabalaka. Ang tagsa ka adlaw may kaugalingon nga mga palaligban.”—MATEO 6:34.

MAMENSAR ANAY SA BAYLO NGA MAGPADALA DAYON SA IMO EMOSYON.

“Ang ikasarang sa paghunahuna sing maayo padayon nga magabantay sa imo, kag ang paghantop magaamlig sa imo.”—HULUBATON 2:11.