Ang mga ginikanan nga nangin halimbawa nagaaplikar mismo sang ila ginatudlo. Halimbawa, mapaabot mo bala nga mangin tampad ang imo bata kon mabatian ka niya nga nagasiling, “Hambala sia nga wala ko diri,” kon may nagapangita sa imo?

“Pirme ta mabatian ang ginasiling nga ‘Sunda ang ginahambal ko, indi ang ginahimo ko.’ Pero indi gid ina makabulig sa kabataan. Daw mga espongha sila nga nagasuyop sang tanan naton nga ginasiling kag ginahimo, kag mahibaluan nila kon ang aton ginahimo lain sangsa aton ginatudlo.”—David.

PRINSIPIO SA BIBLIA: “Ikaw nga nagabantala nga ‘Indi magpangawat,’ nagapangawat ka bala?”—Roma 2:21.

Mas daku ang impluwensia sang mga ginikanan sa ila kabataan kag bisan sa mga tin-edyer sangsa iban, lakip na ang ila mga kaedad. Buot silingon, ikaw ang pinakamaayo nga maggiya sa imo bata sa husto nga dalan—pero siempre, iaplikar mo mismo ang imo ginahambal.

“Bisan suliton pa naton sing ginatos ka beses ang aton ginahambal mahimo nga indi gihapon mamati ang aton bata, pero bisan isa lang ka bes nga indi naton mahimo ang aton ginsiling, makita gid niya ini. Matalupangdan gid sang mga bata ang tanan naton nga ginahimo, bisan pa abi ta wala.”—Nicole.

PRINSIPIO SA BIBLIA: “Ang kaalam nga halin sa langit . . . indi salimpapaw.”—Santiago 3:17.

Usisaa ang imo mga ginahimo. Ano nga mga palaguaon ang nanamian mo? Paano mo ginatratar ang imo bana ukon asawa kag kabataan? Ano nga klase sang mga tawo ang imo mga abyan? Nagaulikid ka bala sa iban? Buot silingon, gusto mo bala nga mangin pareho sa imo ang imo mga bata?

“Wala namon ginapatuman sang akon bana sa amon kabataan ang mga talaksan nga kami mismo indi makasunod.”—Christine.

Mangayo sing pasaylo sa imo mga sala. Nahibaluan sang imo kabataan nga indi ka perpekto. Kon magsiling ka sing “pasayluha ako” sa imo bana ukon asawa kag kabataan, matudluan mo sila nga importante nga mangin tampad kag mapainubuson.

“Dapat mabatian sang amon kabataan nga ginaaku namon ang amon sala, kag nagapangayo kami sing pasaylo. Kay kon indi, matun-an nila nga taguon ang ila mga sala.”—Robin.