NAGAPALIBOG KA BALA KON DIIN ANG DIOS KON MAY MGA TRAHEDYA? UKON KON BALA NAGAULIKID SIA KON MAY MAKAPASUBO KA NGA EKSPERIENSIA?

Amo man sini ang ginbatyag ni Sheila, nga taga-Estados Unidos. Relihioso ang iya pamilya, pero nagsiling sia: “Halin sang bata pa ako, nanamian na ako sa Dios kay sia ang naghimo sa aton. Pero indi kami suod. Pamatyag ko ginatan-aw niya ako halin sa malayo. Pamatyag ko indi man sia akig sa akon, pero daw wala man sia labot sa akon.” Ngaa nagaduhaduha si Sheila nga palangga sia sang Dios? Nagsiling sia: “May sunodsunod nga trahedya nga natabo sa amon pamilya, kag daw ginpabay-an lang kami sang Dios.”

Pareho ni Sheila, mahimo nagapati ka gid nga may Labing Gamhanan nga Dios. Pero nagapalibog ka kon bala nagaulikid gid sia sa imo. Ang matarong nga si Job nagatuo sa gahom kag kaalam sang Manunuga, pero nagduhaduha man sia. (Job 2:3; 9:4) Sang sunodsunod ang natabo sa iya nga trahedya, kag daw indi na ini mag-untat, namangkot sia sa Dios: “Ngaa ginalipdan mo ang imo nawong kag ginakabig ako nga kaaway?”—Job 13:24.

Ano ang ginasiling sang Biblia? Balasulon bala ang Dios kon may trahedya? May pamatuod bala nga nagaulikid ang Dios sa mga tawo kag sa kada isa sa aton? Bilang indibiduwal, natalupangdan gid bala niya kita, nahangpan, ukon ginabuligan sa aton mga problema?

Binagbinagon sa masunod nga mga artikulo kon ano ang ginatudlo sang mga tinuga parte sa pag-ulikid sang Dios sa aton. (Roma 1:20) Binagbinagon man kon ano ang ginasiling sang Biblia parte sa pag-ulikid sang Dios. Samtang mas ‘ginakilala mo sia’ paagi sa iya mga tinuga kag paagi sa iya Pulong, mas makumbinsi ka nga ‘nagaulikid sia sa imo.’—1 Juan 2:3; 1 Pedro 5:7.