GINAPAKITA sang report nga sobra 700 milyones ka tawo sa bilog nga kalibutan nga nagaedad sing 15 anyos pataas ang indi makahibalo magbasa ukon magsulat. Gani, madamo sila sang indi mahibaluan, lakip na ang maayo nga mga panudlo sa moral kag espirituwal “nga ginsulat [sa Biblia] sa pagtudlo sa aton.” (Roma 15:4) Amo kon ngaa sa madamo nga lugar, ginalakip sang mga Saksi ni Jehova sa ila programa sang pagpanudlo sa Biblia ang pagtudlo sa pagbasa kag pagsulat—tanan ini wala sing bayad. Nangin madinalag-on bala ini nga programa?

Binagbinaga ang hilikuton sang mga Saksi ni Jehova sa Mexico, nga ang kalabanan nagahambal sing Espanyol. Sugod sang tuig 1946, sobra sa 152,000 ka tawo ang natudluan sang  mga Saksi sa pagbasa kag pagsulat, kag madamo sa ila ang nangin manunudlo man sang ulihi. Nagpadala sing pila ka sulat ang gobierno sa mga Saksi bilang pag-apresyar sang ila ginhimo. Ang isa ka sulat nagasiling: “Ang General Board of Education nagakilala kag nagapanginbulahan sa inyo bangod sang inyo kooperasyon sa pagpauswag sang Adult Education Program.”

Nakabenepisyo ang bata kag tigulang sa sini nga programa. Halimbawa, si Josefina nagaedad sing 101 anyos sang nagpaenrol sia sa sini nga klase kag natapos niya ini sa sulod sang duha ka tuig!

Bisan pa Espanyol ang panguna nga lenguahe sa Mexico, indi lang amo ini nga lenguahe ang ginatudlo sa sini nga mga klase. Sang tuig 2013, walo ka grupo sang tumandok nga mga tawo ang nakatuon sa pagbasa kag pagsulat sa ila tumandok nga hambal paagi sa sini nga programa.

Ang pagbasa kag pagsulat nagahatag sing kahigayunan nga makatuon sing madamo kag bag-o nga mga butang. Apang labaw sa tanan, nakabulig ini sa tanan nga sahi sang tawo nga mabasa ang Biblia—ang libro nga ang pagsulat gintuytuyan sang Dios kag makahilway ini sa ila sa pagkaulipon sa mga disparatis, butig nga pagtuluuhan, kag makahalalit nga batasan.—Juan 8:32.