Ang Manamit nga Prutas sang Armenia

● Ang apricot linibo na ka tuig nga ginapatubo sa Asia kag Europa. Nagapati ang mga taga-Europa nga naghalin ini sa Armenia amo nga gintawag nila ini nga mansanas sang Armenia.

Sa karon, may mga 50 na ka bariedad sang apricot sa Armenia. Nagapamunga ini sa tungatunga sang Hunyo asta sa katapusan sang Agosto. Pinasahi ang katam-is sang apricot sa Armenia bangod bastante ang init diri kag matambok ang duta nga halin sa bulkan. Gani para sa madamo nga tawo, diri nagahalin ang pinakamanamit nga apricot.

Ang kalabanan nga bariedad sang apricot daw serguelas kadaku nga ang kolor halin sa yellow pa orange. Ang panit sini mahumok kag ang unod madasok. Indi ini tama kaduga. Ang iban sini matam-is, pero may maaslom man. Siling sang iban, ang sabor sini daw peach nga daw plum.

Ang mga nagapatubo sini, nakahimo sing “itom” nga apricot. Pero indi ini matuod nga apricot kundi cross breed sang apricot kag plum. Tama ini kadukot nga violet, nga daw itom na kon tan-awon. Daw may gilok ang panit sini kag yellow ang unod. Ginatawag ini nga pluot, plumcot, ukon aprium.

Nagapamulak ang apricot sing mahamot kag puti nga bulak antes ini manglumbay. Ang mga bulak sini kaanggid sa peach, plum, kag cherry. Nami ang tubo sini nga kahoy sa mga lugar nga may tigtulugnaw kag tig-ilinit. Gani, sampat gid ang klima sang Armenia para sa apricot.

Maayo sa panglawas ang apricot. Halimbawa, dagaya ini sa beta-carotene kag vitamin C. Madamo ang nakatilaw sang apricot nga uga kay madali mahanog kag madunot ang preska. Gani sa iban nga lugar, mas madamo sing uga nga apricot sangsa preska. Pero madamo gihapon ini sing bitamina kag dagaya sa fiber kag iron. Ginahimo man ini nga brandy, jam, kag juice.

Ang kahoy sang apricot ginahimo man nga mga gamit nga tinigib pareho sang duduk, nga ginatawag man nga apricot pipe. Isa ini ka popular nga instrumento sa Armenia nga ginahuyop. Sa mga balaligyaan kag merkado sa Yerevan, ang kapital sang Armenia, makabakal man ang mga turista sing tinigib nga mga souvenir nga human sa kahoy sang apricot.

Kon nagaistar ka sa lugar nga nagatubo ang apricot, tilawi ini. Sigurado nga manamitan ka gid sa sini nga prutas.