“Ginpadaku Ako nga Ateista”

SI Propesor František Vyskočil sang Charles University sa Prague, kilala sa bilog nga kalibutan sa iya research sa neurophysiology. Ateista sia sang una pero subong nagapati na sia nga may Dios. Sa interbyu sang Magmata! ginpaathag ni Propesor Vyskočil kon ngaa nagbag-o ang iya pagtamod.

Ano ang pagtamod mo sa relihion antes ka nangin sientipiko?

Ginpadaku ako nga ateista kag pirme ginapakalain ni Tatay ang mga klero. Sang 1963, naggradweyt ako sa Biology kag Chemistry. Sang nagaeskwela ako nagapati ako nga ang teoriya sang ebolusyon amo ang rason kon ngaa nanarisari ang kabuhi.

Sugiri kami parte sa imo propesyon.

Pagkatapos ko eskwela sa pagkadoktor, gintun-an ko ang kemikal kag elektrikal nga koneksion sang mga synapse. Gintun-an ko man ang mga neuron, membrane pump, transplantation, kag drug desensitization. Madamo sa resulta sang akon pagtuon ang gin-publish, kag ang pila ka artikulo ginhimo nga reperensia. Sang ulihi, nangin miembro ako sang Learned Society of the Czech Republic, isa ka grupo sang mga sientipiko nga ginpili sang ila mismo mga kaupod. Pagkatapos sang “Velvet Revolution” sang Disiembre 1989, nangin propesor ako sa Charles University kag ginapadala ako sa iban nga pungsod nga indi komunista para makigkita sa iban nga sientipiko, nga ang iban sa ila nakakuha sing Nobel Prize.

Namensar ka man bala kon may Dios?

Huo. Kon kaisa, natingala ako kon ngaa madamo sing maalam nga tawo, pati na ang akon mga propesor, ang nagapati sa Dios—bisan pa nagahipos lang sila bangod sa Komunista nga paggahom. Pero para sa akon, ang Dios ginhimuhimo lang sang tawo. Naugot man ako sa kapintas nga ginahimo sang iban bangod sa relihion.

Ngaa nagbag-o ang imo pagtamod sa ebolusyon?

Nagsugod ang akon pagpangduhaduha sa ebolusyon sang gintun-an ko ang mga synapse. Nagdayaw gid ako kay ining daw simple lang nga mga koneksion tama gali ka komplikado. Namensar ako, ‘puede bala nga natabuan lang ining mga koneksion kag ang mga impormasyon nga naka-program sa sini?’ Indi gid ini posible.

 Sang maaga nga bahin sang katuigan 1970, nag-attend ako sa lektyur sang isa ka kilala nga Russian nga sientipiko kag propesor. Nagsiling sia nga ang buhi nga mga organismo indi resulta sang random mutation kag natural selection. Ang isa sa mga nagtambong namangkot kon ngaa nasiling niya ini. Ginkuha sang propesor ang gamay nga Russian nga Biblia sa iya dyaket kag ginbayaw ini nga nagasiling, “Basaha ang Biblia—ilabi na ang istorya sang pagpanuga sa Genesis.”

Sang ulihi, sang ara na kami sa lobby, ginpamangkot ko ang propesor kon serioso gid sia parte sa Biblia. Nagsabat sia: “Ang simple nga bakterya nagatunga kada 20 minutos kag may ginatos ka lainlain nga protina, nga ang kada isa nagaunod sing 20 ka sahi sang amino acid nga nagalaba sing daw pila ka gatos ka kadena. Para mag-evolve ang kada bakterya paagi sa beneficial mutation, magalawig ini sing sobra pa sa tatlo ukon apat ka bilyon ka tuig, mas malawig pa sangsa ginabulubanta sang mga sientipiko nga kalawigon sang kabuhi diri sa duta.” Para sa iya mas rasonable ang ginasiling sang tulun-an sang Genesis sa Biblia.

Ano ang epekto sa imo sang komento sang propesor?

Bangod sa iya obserbasyon, pati na sa akon pangduhaduha, ginpamangkot ko ini nga topiko sa pila ko ka kaupod kag mga abyan nga relihioso, pero wala ako makumbinsi. Dayon nag-istorya ako sa isa ka pharmacologist nga isa ka Saksi ni Jehova. Sa sulod sang tatlo ka tuig, ginpaathag niya sa akon ang Biblia upod sa akon asawa nga si Ema. Nakibot gid kami sang matun-an namon nga ang ginakabig sang iban nga “Cristianismo” malayo gid sa ginatudlo sang Biblia. Kag nakumbinsi kami nga ang Biblia nagahisanto sa matuod nga siensia bisan indi ini libro sa siensia.

Naapektuhan bala ang imo scientific research bangod nagbag-o na ang imo pagtamod?

Wala. Ang maayo nga sientipiko dapat mangin objective bisan ano man ang iya ginapatihan. Pero ang akon pagtuo nagpabag-o sa akon. Halimbawa, nagapasalamat ako sa Dios sa akon mga ikasarang sa baylo nga magsalig lang sa akon kaugalingon, makigkompetensia sa iban, kag magpabugal sa akon mga ikasarang sa siensia. Kag sa baylo nga magsiling nga natabuan lang ang komplikado nga mga desinyo sang mga tinuga, ginapamangkot namon sang iban nga sientipiko ang amon kaugalingon, ‘Paano ini ginhimo sang Dios?’

[Blurb sa pahina 9]

Ginapamangkot namon sang iban nga sientipiko ang amon kaugalingon, ‘Paano ini ginhimo sang Dios?’