Ang Pagtamod sang Biblia

Gusto Bala sang Dios nga Magmanggaranon Ka?

“Ginbugayan ako sang Dios karon nga adlaw! Magakita na ako sing ginatos ka libo!”

“Gusto ko magmanggaranon katama—bangod amo sina ang gusto sang Ginuo para sa akon.”

“Ginhatagan kita sang Dios sing ikasarang nga magmanggaranon.”

“Nagamanggaranon ako bangod sa Libro [ang Biblia].”

AMO sini pirme ang mabatian naton sa madamo nga relihion nga nagasiling nga nagmanggaranon sila bangod sa bugay sang Dios. Siling nila, kon himuon mo kon ano ang husto, hatagan ka sang Dios sing ikasarang nga matigayon ang maayong mga butang sa sini nga kabuhi kag pagapadyaan ka niya. Ini nga panudlo naluyagan sang madamo nga tawo, kag ang mga libro parte sini mabakal katama. Apang amo bala sini ang ginatudlo sang Biblia?

Huo, ang aton Manunuga, nga ginatawag sang Biblia nga “malipayon nga Dios,” luyag nga mangin malipayon kita kag magmadinalag-on sa aton kabuhi. (1 Timoteo 1:11; Salmo 1:1-3) Dugang pa, ginapakamaayo niya ang mga nagapahamuot sa iya. (Hulubaton 10:22) Apang sa karon, ina bala nga mga pagpakamaayo nagapatuhoy lamang sa materyal nga kabuganaan? Mangin maathag ang sabat sa sini kon mahangpan naton kon sa diin na kita sa lakat sang panahon suno sa katuyuan sang Dios.

Tion Bala Karon Para Magmanggaranon?

Sang una, ginpakamaayo ni Jehova nga Dios ang pila sang iya mga alagad sing materyal nga mga manggad. Ang maayo nga mga halimbawa sini amo sanday Job kag Hari Solomon. (1 Hari 10:23; Job 42:12) Apang, may mga alagad man ang Dios nga imol, subong nanday Juan Bautista kag Jesucristo. (Marcos 1:6; Lucas 9:58) Ano ang buot silingon sini? Ginapakita sa Biblia nga ginapakig-angutan sang Dios ang iya mga alagad suno sa katuyuan niya para sa ila sa sina nga tion. (Manugwali 3:1) Ano sa karon ang aton matun-an sa sini?

Ginapakita sang Biblia nga nagakabuhi na kita sa “katapusan sang sistema sang mga butang,” ukon “katapusan nga mga adlaw” sini nga kalibutan. Sa sini nga panahon nahanabo ang grabe nga inaway, balatian, tiggulutom, linog, kag paglain sang pamatasan sang mga tawo. Nasaksihan sang bug-os nga katawhan ini nga mga kahimtangan sugod sang 1914. (Mateo 24:3; 2 Timoteo 3:1-5; Lucas 21:10, 11; Bugna 6:3-8) Kon sa aton pa, ini nga kalibutan daw pareho sa isa ka barko nga amat-amat nga nagakalunod! Bangod sini, makatarunganon bala nga bugayan sang Dios ang iya mga alagad sang materyal nga manggad, ukon may iban pa nga mas importante nga butang nga gusto sang Dios para sa aton?

Ginpaanggid ni Jesucristo ang aton panahon sa mga adlaw ni Noe. Nagsiling si Jesus: “Subong nga sila sadto nga mga adlaw sa wala pa ang anaw, nagakaon kag nagainom, ang mga lalaki nagapangasawa kag ang mga babayi nagapamana, tubtob sa adlaw nga nagsulod si Noe sa arka; kag wala sila magsapak tubtob nga nag-abot ang anaw kag nag-anod sa ila tanan, mangin amo man ang presensia  sang Anak sang tawo.” (Mateo 24:37-39) Ginpaanggid man ni Jesus ang aton panahon sa mga adlaw ni Lot. Ang mga kaingod ni Lot sa Sodoma kag Gomorra ‘nagakaon, nagainom, nagabakal, nagabaligya, nagatanom, kag nagatukod.’ “Apang sang adlaw nga naggua si Lot sa Sodoma nag-ulan sang kalayo kag asupre gikan sa langit kag naglaglag sa ila tanan,” siling ni Jesus, kag nagdugang pa sia: “Mangin amo man sini sa adlaw nga ipahayag ang Anak sang tawo.”—Lucas 17:28-30.

Siempre, wala sing malain sa pagkaon, pag-inom, pagpangasawa, pagbakal, kag pagbaligya. Ang malain lang kon ubuson naton ang aton tion sa sini nga mga butang kag indi kita magbatyag nga yara na kita sa ital-ital nga mga tion. Gani, pamangkuta ang imo kaugalingon, ‘Masiling bala naton nga ginapaboran kita sang Dios kon hatagan niya kita sang madamo katama nga butang nga makatublag lamang sa aton?’ * Indi gid. Sa baylo, makahalit pa gani ini sa aton. Indi amo sini ang luyag sang Dios sang gugma para sa aton!—1 Timoteo 6:17; 1 Juan 4:8.

Tion Para Magluwas sing Kabuhi!

Sa sining kritikal nga mga tion, ang katawhan sang Dios may importante nga buluhaton. Si Jesus nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mateo 24:14) Ang mga Saksi ni Jehova nagabatyag gid nga kinahanglan nila tumanon ini nga sugo. Gani, ginapalig-on gid nila ang ila mga isigkatawo nga magtuon tuhoy sa sina nga Ginharian kag sa mga ginapatuman sang Dios para sa kabuhi nga wala sing katapusan.—Juan 17:3.

Apang, indi buot silingon sini nga luyag sang Dios nga mangin pigado ang iya mga alagad. Kundi, luyag niya nga mangin kontento sila sa kon ano lang ang ila mga kinahanglanon agod makakonsentrar sila sa pag-alagad sa iya. (Mateo 6:33) Apang, pat-uron niya nga matigayon nila ang tanan nila nga materyal nga mga kinahanglanon. Ang Hebreo 13:5 nagasiling: “Ang inyo paagi sang pagkabuhi mangin wala sing gugma sa kuarta, samtang kontento kamo sa mga butang karon. Kay [ang Dios] nagsiling: ‘Indi ko gid kamo pagbayaan ukon pagpatumbayaan.’”

Tumanon sang Dios ini nga pinamulong kon luwason na niya ang “isa ka dakung kadam-an” sang iya matuod nga mga sumilimba sa katapusan sining sistema sang mga butang padulong sa bag-ong kalibutan nga may paghidait kag matuod nga kahamungayaan. (Bugna 7:9, 14) Nagsiling si Jesus: “Ako iya nagkari agod may kabuhi sila [ang iya matutom nga mga sumulunod], ang kabuhi sa iya kabuganaan.” (Juan 10:10, Maayong Balita nga Biblia) Inang ‘kabuhi sa kabuganaan’ wala nagapatuhoy sa manggaranon nga pagkabuhi karon, kundi sa kabuhi nga wala sing katapusan sa Paraiso sa idalom sang paggahom sang Ginharian sang Dios.—Lucas 23:43.

Indi magpadaya sa panudlo nga ginapamanggaranon sang Dios ang mga nagaalagad sa iya, kay ang matuod, ini nga panudlo makatublag lamang sa aton sa mas importante nga butang. Sa baylo, pamatii ang mahigugmaon apang serioso nga paandam ni Jesus: “Mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi, kag ina nga adlaw magaabot sa inyo sing hinali subong sang siod.”—Lucas 21:34, 35.

[Nota]

NAMANGKOT KA BALA?

▪ Karon ang gintalana nga tion para sa ano?—Mateo 24:14.

▪ Ginpaanggid ni Jesus ang aton panahon sa adlaw nanday sin-o?—Mateo 24:37-39; Lucas 17:28-30.

▪ Ano ang dapat naton likawan agod matigayon naton ang kabuhi nga wala sing katapusan? —Lucas 21:34.

[Blurb sa pahina 13]

Ang panudlo nga ginapamanggaranon sang Dios ang mga nagaalagad sa iya, sa pagkamatuod, isa ka panudlo nga makatublag sa aton sa mas importante nga butang