Mapagros nga Panglawas Para sa Tanan​—⁠Malapit Na!

“ANG ideya nga indi na liwat magmasakit . . . amo karon ang popular,” report sang Aleman nga magasin sang balita nga Focus. Apang, indi bag-o ini nga ideya. Sang magsugod ang pagkabuhi sang tawo, wala gid gintuyo sang Manunuga nga magmasakit ang katawhan. Ang iya katuyuan para sa katawhan indi lamang amo ang “isa ka rasonable nga kapagros sang lawas para sa tanan nga tawo sa kalibutan.” (Italiko amon.) Ang katuyuan sang aton Manunuga amo ang himpit nga panglawas para sa tanan!

Gani ngaa nagamasakit ang tanan? Ginasugiran kita sang Biblia nga gintuga ni Jehova nga Dios ang mga ginikanan sang tanan nga tawo, si Adan kag si Eva, nga himpit. Sang matapos niya ang iya pagpanuga, “nakita sang Dios ang tanan nga butang nga ginhimo niya kag, yari karon! tama gid ini kaayo.” Indi gid katuyuan sang aton mahigugmaon nga Manunuga nga ang pagkabuhi sang tawo paantuson sang balatian kag kamatayon. Apang sang ginpili ni Adan kag ni Eva nga sikwayon ang dalanon sang pagkabuhi nga ginlaragway para sa ila, nakasala sila. Ang resulta sang Adaniko nga sala amo ang kamatayon, nga ginpaliton sa tanan nga tawo.​​—⁠Genesis 1:​31; Roma 5:⁠12.

Wala ginsikway ni Jehova ang katawhan sing dayon. Wala man niya gintalikdan ang iya orihinal nga katuyuan para sa ila kag sa duta. Sa bug-os nga Biblia, ginapakilala niya ang iya katuyuan nga ipasag-uli ang matinumanon nga katawhan sa ila orihinal nga kahimtangan sang mapagros nga panglawas. Sang si Jesucristo, nga Anak sang Dios, yari sa duta, ginpakita niya ang gahom sang Dios sa pag-ayo sing mga balatian. Halimbawa, gin-ayo ni Jesus ang bulag, aruon, bungol, nagapalanghubawhubaw, kuyapon, kag ang paralitiko.​​—⁠Mateo 4:​23, 24; Lucas 5:​12, 13; 7:​22; 14:​1-4; Juan 9:​1-7.

Sa indi madugay suguon sang Dios ang iya Mesianikong Hari, si Jesucristo, agod magdumala sa kalibutan sang katawhan. Sa idalom sang iya pagdumalahan, ang tagna ni Isaias magamatuod: “Wala sing pumuluyo nga magasiling: ‘Nagamasakit ako.’ Ang katawhan nga nagapuyo sa duta amo sila ang napatawad sa ila sala.” (Isaias 33:24) Paano ini mahanabo?

Matalupangdan naton nga ang manalagna nagsulat nga ang mga tawo “napatawad sa ila sala.” Sa  amo, ang orihinal nga kabangdanan sang balatian​​—⁠ang ginpanubli nga sala sang katawhan⁠​—⁠​pagadulaon. Paano? Ang balor sang halad nga gawad ni Jesus gamiton sa matinumanon nga katawhan, sa amo madula ang sadsaran sang balatian kag kamatayon. Ang tulad-Paraiso nga mga kahimtangan maeksperiensiahan sa tanan nga pamusod sang duta. Ang Cristiano nga si apostol Juan nagsulat: “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” Matabo ini sa indi madugay!​​—⁠Bugna 21:​3, 4; Mateo, kapitulo 24; 2 Timoteo 3:​1-5.

Pagpabilin nga Balanse

Samtang wala pa ina, minilyon ka tawo ang nagamasakit. Gani, natural lamang nga mabalaka ang mga indibiduwal sa ila panglawas kag sa panglawas sang ila mga hinigugma.

Ginaapresyar gid sang mga Cristiano karon ang mga panikasog sang mga propesyonal sa medisina. Ginahimo nila ang rasonable nga mga tikang agod magpagros ukon magpabilin nga mapagros. Apang, ang ginasaad sang Biblia nga palaabuton nga wala sing balatian nagabulig sa aton nga magpabilin nga balanse sa sining bahin. Tubtob wala pa nagadumala ang Mesianikong Hari sa katawhan, indi posible ang himpit nga panglawas. Subong nakita na naton, bisan gani ang labing makadalayaw nga mga natukiban wala makabulig sa medisina nga makuha ang pinakamaduga nga mansanas sa tuyuktuyukan sang kahoy​​—⁠ang mapagros nga panglawas para sa tanan.

Ang tulumuron nga “isa ka rasonable nga kapagros sang lawas para sa tanan nga tawo sa kalibutan” malab-ot sa indi madugay. Apang indi paagi sa NU ukon sa World Health Organization ukon sa mga tawo nga nagatinguha sa pag-amlig sa palibot ukon sa mga repormador sang katilingban ukon sa mga manugbulong. Ini nga katigayunan ginatigana para kay Jesucristo. Makalilipay gid kon ang katawhan sa ulihi ‘mahilway gikan sa pagkaulipon sa pagkamadinulunton kag magaagom sing mahimayaon nga kahilwayan sang mga anak sang Dios’!​​—⁠Roma 8:⁠21.

[Mga retrato sa pahina 10]

Ang tanan mangin mapagros sa bag-ong kalibutan sang Dios