MARSO 29, 2023 | GIN-UPDATE: ABRIL 18, 2023
RUSSIA

UPDATE—GINPRISO ANG MGA BROTHER | Ginabuligan ni Jehova ang Aton Napriso nga mga Kauturan

I-PLAY

Sang Abril 17, 2023, ang Ahktubinskiy District Court of the Astrakhan Region nagdesisyon nga guilty sanday Brother Rinat Kiramov, Brother Sergey Korolev, kag Brother Sergey Kosyanenko. Ang kada isa sa ila ginsentensiahan nga mapriso sing pito ka tuig. Ining tatlo ka brother ginbutang sa pretrial detention sugod sang Nobiembre 2021 kag magapabilin sila didto.

Impormasyon Parte sa Ila

Rinat Kiramov

Natawo: 1987 (Moscow, Moscow Region)

Biograpiya: Nagaeskwela sia para mangin web developer antes sia gin-aresto. Maayo sia nga musician. Nagadeliber sia sang mga sulat bilang bahin sang iya alternative civilian service

Natun-an niya ang kamatuoran halin sa iya nanay. Nagdayaw sia sa gugma kag paghiusa sang mga Saksi ni Jehova. Nabawtismuhan sia sang 2001

Napangasawa niya si Galina sang 2009

Ang Ginsiling sang Iya Asawa nga si Galina a

Ano ang nakabulig kay Rinat nga makabatas sang napriso sia?

Naghimo sang goal si Rinat nga sambiton ang ngalan sang kada kauturan nga napriso sa iya pangamuyo. Kada bulan, ginahatagan ko sia sang listahan sang tanan nga kauturan nga napriso bangod sa ila pagtuo sa bilog nga kalibutan. Kon nagapangamuyo sia sing malawig kag ginasambit niya ang kada isa sa mga kauturan, nagapabakod ini sang iya relasyon kay Jehova kag wala na sia nagapensar sing sobra parte sa iya mga kabudlayan. Ginapahanumdom man namon ang isa kag isa kon ngaa importante nga magbatas kami. Nagaresulta ini sa maayo nga panaksi kag ginasuportahan namon ang soberanya ni Jehova. Ginlakip ini ni Rinat sa iya sulat: “Bisan pa daw ano kakusog ang aton kaaway, magamadinalag-on kita sa bulig ni Jehova. Pero indi buot silingon sini nga mahilway kita. Kay para sa aton, ang buot silingon sang kadalag-an amo ang pagpabilin nga matutom asta sa katapusan.”

Paano mo nabatyagan ang suporta ni Jehova?

May ginsulat si Rinat nga nangin matuod gid: “Bangod indi ta ka maatipan subong, si Jehova ang nagaatipan sa imo.” Kag nabatyagan ko gid ang suporta sang espiritu ni Jehova halin sang nag-umpisa ini tanan. Ang Salmo 91:1 nagpromisa: “Ang bisan sin-o nga nagapuyo sa sekreto nga duog sang Labing Mataas Magapabilin sa idalom sang landong sang Labing Gamhanan.” Sang una, nabasa ko lang ining “sekreto nga duog,” pero subong nabatyagan ko gid ang pangamlig ni Jehova. Nakabulig ini para magsalig ako sa iya sing bug-os kag magbatas nga may kalipay.

Sergey Korolev

Natawo: 1973 (Penza, Penza Region)

Biograpiya: Nanamian sia magpamiktyur kag maghimo sang furniture

Nagbag-o ang iya negatibo nga panan-aw sa relihion sang nakig-upod sia sa mga Saksi ni Jehova kag sang natun-an niya ang parte sa Manunuga. Nabawtismuhan sia sang 1996

Napangasawa niya si Yekaterina sang 2005

Ang Iya Ginsiling

Paano napabakod ang imo relasyon kay Jehova sa sini nga tion?

Bangod priso ako, mabudlay likawan nga mamensar sang negatibo parte sa nagakatabo. Natilawan gid ang akon pagbatas, pagtuo, paglaum kag gugma. Nakabulig gid sa akon ang pangamuyo. Wala na sing limitasyon ang akon pagpakig-istorya sa akon Amay. Daw subong pa lang natabo nga madamo gid ako sang tinagipusuon nga pangamuyo! Naintiendihan ko na subong ang ginhimo ni Jesus nga pagpangamuyo sa iya Amay sa bilog nga gab-i. Bangod napriso ako, natun-an ko nga magsalig sing bug-os sa Dios, kag amo ina ang pinakadaku nga benepisyo nga nahatag sang pagkapriso sa akon.

Sergey Kosyanenko

Natawo: 1961 (Yelan, Volgograd Region)

Biograpiya: Nagaobra sia bilang maestro sa physical education

Napangasawa niya si Olga sang 1983. Nanamian gid sia sa pagkasibu sang Biblia parte sa kasaysayan kag mga tagna. Nabawtismuhan sia sang 2002

Ang Ginsiling sang Iya Asawa nga si Olga b

Ano ang nakabulig sa imo para indi maluyahan sing buot?

Ginatinguhaan ko gid nga mangin masako sa mga butang nga makabulig sa akon. Nagabasa ako sang base sa Biblia nga mga publikasyon kag nagapangamuyo kay Jehova. Ginapangabay ko sia nga pabakuron ako para indi ako maluyahan. Ginabasa ko sing sulitsulit ang mga sulat ni Sergey kag ginaimadyin nga makita ko sia liwat kon matapos na ini tanan. Ang pagpamati sa base sa Biblia nga mga ambahanon kag ang pagkanta sing dungan sa sini nakabulig gid sa akon.

May teksto bala sa Biblia nga nakabulig sa imo nga makabatas?

Nanamian gid ako sa ginsiling sa 1 Corinto 10:13, diin ang Dios nagpromisa nga ‘indi sia magtugot nga sulayon kita labaw sa aton masarangan.’ Nabal-an ko nga indi ko ini masarangan kon ako lang kag sigurado ako nga buligan gid ako ni Jehova nga makabatas. Kon nagakatabo ini sa aton, buot silingon masarangan naton ini. May katapusan gid ini tanan.

Makapaumpaw gid mabal-an nga pirme ginapamatud-an ni Jehova nga dalangpan sia sang iya matutom nga mga alagad, kag ginabutang niya ‘ang iya mga butkon nga nagapabilin tubtob san-o para mag-alay-ay sa aton.’—Deuteronomio 33:27.

Time Line

Nobiembre 9, 2021

Ginsugdan ang kaso. Gin-raid sang mga awtoridad ang 15 ka balay sang mga Saksi ni Jehova sa Akhtubinsk kag sa Znamensk, lakip ang balay ni Brother Kiramov, Brother Korolev, kag Brother Kosyanenko
Nobiembre 10, 2021

Gin-aresto si Sergey Korolev
Nobiembre 11, 2021

Gin-aresto si Rinat Kiramov kag si Sergey Kosyanenko. Sila nga tatlo ginbutang sa pretrial detention
Nobiembre 14, 2022

Ginsugdan ang hearing

a b Wala mainterbyu si Brother Kiramov kag si Brother Kosyanenko.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE