AGOSTO 17, 2022
RUSSIA

Ginpalig-on Nila ang Ila mga Pinalangga Bisan Sila Mismo Ginhingabot Man

I-PLAY

Sang Agosto 8, 2022, nagdesisyon ang Golovinskiy District Court of Moscow nga guilty si Brother Aleksandr Serebryakov kag si Brother Yuriy Temirbulatov. Pareho sila nga ginsentensiahan sang anom ka tuig nga suspended prison. Indi nila kinahanglan nga mapriso sini nga tion. Ginpagua dayon sila nga duha.

Time Line

Pebrero 10, 2021

Disiseis ka balay sang mga Saksi ni Jehova ang gin-raid sang mga opisyal sang Ministry of Internal Affairs, sang FSB, kag sang National Guard. Suno sa report, duha ka brother ang ginkastigo, kag 18 ang gindala para interogahon. Si Aleksandr kag si Yuriy gin-detain
Pebrero 12, 2021

Ining duha ka brother ginbutang sa pretrial detention
Oktubre 28, 2021

Gindala si Yuriy sa ospital para maoperahan kag makuha ang iya tumor
Nobiembre 4, 2021

Halin sa ospital ginbalik si Yuriy sa pretrial detention
Pebrero 7, 2022

Ginsugdan ang hearing

Impormasyon Parte sa Ila

Aleksandr Serebryakov

Natawo: 1977 (Chekhov, Moscow Region)

Biograpiya: Mga soldado ang iya mga ginikanan. Nakaistar sia sa Ukraine kag Kazakhstan. Nag-obra sia sa konstruksion

Ang gugma nga nakita niya sa mga Saksi ni Jehova amo ang rason kon ngaa nag-Bible study sia. Nabawtismuhan sia sang 1996. Napangasawa niya si Irina sang 2006

Ang ginsiling sang iya asawa nga si Irina a

Bisan pa ara sa prisuhan si Aleksandr, paano ka niya ginbuligan nga padayon nga mangin malapit kay Jehova?

Ginapadal-an ako ni Aleksandr sang mga sulat nga nagaunod sang mensahe halin sa Biblia kag mga pagpalig-on. Nagasulatay man kami parte sa mga hiyas nga amon natun-an sa pagbasa sang Biblia kada semana. Bangod sini nga mga paumpaw halin sa Biblia nga ginasulat niya sa akon, nagasalig ako nga makabatas kami kag makapabilin nga matutom asta sa katapusan.

Ano ang nagabulig sa imo nga makabatas?

Ang Salmo 116:1, 2 nagasiling: “Ginahigugma ko si Jehova bangod ginapamatian niya ang akon tingog, ang akon pagpangayo sing bulig. Nagapamati sia sa akon, kag sa iya ako magapanawag samtang nagakabuhi ako.” Nabal-an ko nga nagapaubos si Jehova paagi sa pagpamati sa akon, bisan pa indi ako perpekto nga tawo. Ginahimo niya ini indi bangod naobligar lang sia, kundi bangod ginahigugma gid niya ako. Kontrolado gid niya ang tanan kag nahibaluan niya ang aton ginabatyag, kon ano lang ang aton masarangan, kag kon ano ang aton kinahanglan para mangin malapit kita sa iya pirme. Nagapasalig man ini sa akon nga indi gid pagpabay-an ni Jehova ang akon bana kag atipanon gid niya sia.

Yuriy Temirbulatov

Natawo: 1977 (Samarkand, Uzbekistan)

Biograpiya: Nag-obra sia bilang tax consultant

Napangasawa ni Yuriy si Alla sang 1996. Dungan sila nga nagtuon sa Biblia kag nabawtismuhan sila bilang mga Saksi ni Jehova sang 1998. May tatlo sila ka bata

Ang ginsiling sang iya asawa nga si Alla b

Paano nakapabilin nga positibo si Yuriy bisan napriso sia?

Ginsiling niya sa iya sulat nga ang pagpangamuyo, ang paglaum, kag ang suporta nga iya nabaton halin sa mga kauturan amo ang nakabulig sa iya. Ginsugid man niya ang iya mga eksperiensia parte sa iya pagsugid sang maayong balita sa iban. Ini nga mga eksperiensia nagpalig-on gid kag nagpalipay sa iya.

Ano ang nagabulig sa imo nga makabatas?

Ang pagpangamuyo kag pagpamalandong sa aton paglaum sa palaabuton nakabulig sa akon para indi maluyahan gid. Nabal-an ko nga matapos gid ini nga pagtilaw. Magadaug si Jehova kag amo man kita. Pirme ko ginapamatian ang ambahanon 44, “Pangamuyo sang Napung-awan.” Makapabakod gid ang mensahe sini nga ambahanon. Kon nabudlayan gid ako, ginapamatian ko ini kag ginakanta.

Bisan pa ara sila sa prisuhan, si Aleksandr kag si Yuriy maayo gid nga mga halimbawa sa pagbulig sa ila pamilya nga padayon nga mangin suod kay Jehova. Kabay nga sila kag ang ila pamilya padayon nga pakamaayuhon ni Jehova bangod sang ila katutom kag pagbatas.—1 Timoteo 5:8.

a b Sang ginahanda ini nga artikulo, si Brother Serebryakov kag si Brother Temirbulatov ara sa pretrial detention. Wala sila mainterbyu.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE