Sang Mayo 28, 2023, gin-release ang The Bible—The Book of Matthew sa Assamese nga lenguahe sa isa ka espesyal nga okasyon nga ginhiwat sa banwa sang Duliajan, Assam, India. May 279 ka tumalambong. Pagkatapos sini nga release, ginpanagtag dayon ang naimprinta nga kopya sa mga tumalambong kag puede naman ma-download ang digital nga pormat sini.

Ang Assamese, nga kilala man nga Axomiya, amo ang opisyal nga lenguahe sa Assam, sa northeast India. Ang mga tawo sa Assam ginatawag nga mga Axomiya. Kilala sila bangod sa ila tsa kag pagkamaabiabihon.

Ang una nga grupo sa Assamese nga lenguahe naporma sang 2009. Halin sadto, padayon nga nagdamo ang mga manugbantala. Lima ka tuig sang ulihi, sang 2014, natukod ang una nga kongregasyon sa Duliajan. Subong, may 162 ka manugbantala sa walo ka kongregasyon nga nagahambal sang Assamese.

May duha ka translation sang Biblia nga ginagamit sa Assamese. Pero nabudlayan sa pagbasa kag pag-intiende ang mga manugbantala sa sini nga mga translation kay daan ang mga tinaga kag mga ekspresyon sa sini. Maayo gid kay ining bag-o gin-release nga translation sang Mateo mahapos intiendihon.

Sigurado kita nga ang aton mga kauturan, upod sa mga interesado magtuon sa Pulong sang Dios, magasuod pa gid kay Jehova kag magakalipay samtang ginabasa nila ining libro sang Mateo sa Assamese.—Nehemias 8:12.