Sang Oktubre 29, 2022, ang final tournament sang Copa Libertadores nga amo ang pinakasagad nga mga soccer team sa South America ginhiwat sa siudad sang Guayaquil, Ecuador. Mga 1,500 ka Saksi ni Jehova ang nagpakigbahin sa pagbantala sang maayong balita gamit ang mga cart sang mga adlaw antes kag pagkatapos sining espesyal nga okasyon.

Ang mga kauturan nagplastar sang 135 ka cart sa 45 ka lugar nga madamo sing tawo sa bilog nga siudad. Madamo ang nag-adjust sang ila schedule para makapakigbahin sa sining espesyal nga pagbantala. Bangod linibo ang mga bisita halin sa Brazil para magtan-aw sang hampang, gintun-an sang iban naton nga mga kauturan ang pila ka tinaga nga Portuguese para matamyaw nila ang mga turista.

Kanami gid sang resulta sini. Halimbawa, sa sulod lang sang isa ka adlaw, ang aton mga kauturan nakahatag sang 796 ka publikasyon. Kon totalon, ang mga Saksi nakahatag sang 5,139 ka literatura sa sulod sang pulo ka adlaw, nga natapos sang Nobiembre 2.

Si Brother Davide del Monte, nga nagbulig sa pagdumala sini nga proyekto, nagsiling: “Madamo nga turista ang nagapalapit sa cart para magpapiktyur sang makita nila nga nagayuhumyuhum gid kag kabuot sang mga kauturan. Gindayaw sila sang iban bangod organisado sila kag kanami sa ila mamayo, ukon nagasiling sila nga importante gid ang aton mga literatura.”

Ang isa ka babayi nga nagpalapit sa isa sa mga cart nagsiling: “Layo pa lang, bal-an ko na kon sin-o kamo. Kanami gid sang inyo paagi kay bisan wala pa kamo makahambal bal-an na sang mga tawo ang inyo mensahe.”

Maathag gid nga ini nga pagtinguha sa pagbantala nagadayaw kay Jehova, bangod ang iya kaalam ‘nagasinggit sa mga plasa’ kag sa “masako nga mga dalan.”—Hulubaton 1:20, 21.