NOBIEMBRE 24, 2023
ECUADOR
Ang Pinakadaan Pero Pinakapraktikal nga Libro sa Kalibutan Ginhatagan sing Atension sa Isa ka International Book Fair sa Ecuador
Halin sang Septiembre 20 asta 24, 2023, ginhiwat ang ikasiam nga International Book Fair sa Guayaquil, Ecuador. Sobra 30,000 ka bisita ang nag-attend sa sini nga event sa Guayaquil Expoplaza. Nag-display ang aton mga utod sang isa ka booth sa fair nga may makapainteres nga tema “The Oldest Modern Book.” Ini nga tema naghatag sing atension sa praktikal nga kapuslanan sang mensahe sang Biblia sa mga tawo ano man ang ila edad. May gin-display nga mga publikasyon sa Chinese Mandarin, English, Portuguese, Quichua (Chimborazo), Quichua (Imbabura), kag Spanish. Mga 150 ka kauturan ang nagpakigbahin sa sini nga event. Sobra 700 ka naimprinta nga publikasyon ang napanagtag sa mga interesado, kag madamo nga bisita ang gintudluan kon paano mag-research sang sarisari nga topiko sa jw.org.
Ginapakita sang sister sa isa ka bisita kon paano mag-download sang mga publikasyon halin sa jw.org
May isa ka tatay nga may tin-edyer nga kabataan nga nagpalapit sa aton booth kag nag-istorya parte sa mga kabudlayan nga ginaatubang sang iya kabataan. Ginpaathag sang aton mga utod nga ang mga prinsipio sa Biblia wala nagadaan kag makabulig gihapon sa mga pamatan-on para masarangan nila ang mga kabudlayan nga ila naeksperiensiahan. Ginbaton sang lalaki ang libro nga Questions Young People Ask—Answers That Work, Volume 1 kag 2, kag nagsiling: “Wala gid ako nagpaabot nga makakita ako sang mga libro nga may importante gid nga impormasyon sa sini nga fair.”
May isa ka babayi nga nagpalapit sa booth kag namangkot kon bala puede sia makapangayo sang Biblia. Nagsiling sia nga nagaistar sia sa lugar nga estrikto ang security, gani wala gid sia makaistorya sa mga Saksi ni Jehova. Ginhatagan sia sang isa naton ka sister sang Biblia kag ginsilingan nga puede sia makapa-Bible study nga wala sing bayad. Nangabay dayon ang babayi nga bisitahan sia paagi sa online form sa jw.org.
Ginapaathag sang mga Saksi ang pila ka impormasyon sa lalaki nga nagbisita sa booth
Ang isa ka brother nga si Diego, nga nagpakigbahin sa sini nga event, nagsiling: “Bisan pa madamo nga tawo ang pamilyar sa aton jw.org nga logo, diutay lang ang nakahibalo sang aton mensahe. Sa banta ko, nakabulig ang aton booth nga mabal-an sang mga tawo kon daw ano ka importante ang Biblia subong.”
Nagakalipay kita nga nabuligan sang aton mga kauturan sa Ecuador ang iban nga makatuon sing dugang parte sa praktikal nga kaalam nga makita sa Biblia, ang pinakadaan pero pinakapraktikal nga libro.—Hulubaton 3:21.