Sang Agosto 14, 2023, ginbuksan sang mga Saksi ni Jehova ang bag-o nga visitor center sa branch office sa Dominican Republic nga makita sa Santo Domingo. May ara ini sang historical exhibit nga may tema nga “A Journey of Faith.” Ginapakita sini nga eksibit ang malipayon nga pag-alagad sang mga Saksi ni Jehova sa Dominican Republic bisan pa sang mga paghingabot kag mga kabudlayan. Ang ila panimuot, pareho man sa panimuot sang aton mga kauturan sa bilog nga kalibutan.

Ginapakita sang eksibit ang kasaysayan sang mga Saksi ni Jehova sa Dominican Republic. Lakip sa sini kon paano nila ginsugdan ang pagbantala sang mensahe sang Ginharian gamit ang base sa Biblia nga mga publikasyon kag mga radyo pono nga madaladala. Ginpakita man sini kon paano gingamit ang mga newspaper kag radyo para mas madamo nga tawo ang masugiran sang kamatuoran sa Biblia. Matun-an man sang mga bisita ang kasaysayan sang una nga mga misyonero nga nagsugod sa pagbantala sa Dominican Republic sang 1945.

Dugang pa, ginapakita man sa eksibit kon paano nagpadayon sa pagbantala ang mga Saksi ni Jehova sa Dominican Republic sang mga tuig nga gin-ban sila. Bisan pa sang grabe nga pagpamatok, maisog nga ginkopya kag ginpanagtag sang aton mga kauturan sa Dominican Republic ang base sa Biblia nga mga publikasyon. Pagligad sang mga tinuig, madamo nga tawo ang nakatuon sang kamatuoran kag nangin mga Saksi ni Jehova. Sa hingapusan sang eksibit ginapakita ang mga buluhaton kag mga pamaagi sa pagbantala sang aton mga kauturan sa Dominican Republic subong.

Si Brother Leonel Peguero, nga nagaalagad sa branch office sang Dominican Republic, nagsiling: “Sa sini nga eksibit, matun-an sang mga bisita ang kasaysayan kag ang ginahimo subong diri sa Dominican Republic paagi sa orihinal nga mga artifact, piktyur, kag interactive nga mga audio kag video display. Daw pareho lang nga ginbalikan mo ang mga natabo sadto para maintiendihan mo ang koneksion sang pagsugod sang hilikuton sang una kag sang mga ginahimo namon subong. Ginaagda namon ang tanan nga magbisita kag mag-enjoy sa pagtuon parte sa amon kasaysayan sa Dominican Republic.”