Nagabuligay ang mga branch office sa Rwanda kag Zimbabwe kag ang mga gulang sang lokal nga mga kongregasyon para masiguro nga mahatagan sang ila mga kinahanglanon ang mga kauturan nga namigado bangod sang coronavirus nga pandemic.

Sang Abril 2, 2020, nagsulat ang Komite sang Sanga sa Rwanda sa mga gulang nga hibaluon nila kon sin-o ang mga kauturan nga nabudlayan sa pinansial bangod sang pandemic para mabuligan sila. Gani ang mga gulang sa bilog nga pungsod naghimo sang mga kahimusan para mahatagan ining mga kauturan sang pagkaon kag iban pa nga mga kinahanglanon.

Pagligad sang mga duha ka semana, nag-organisar sing 31 ka Disaster Relief Committee (DRC) ang branch sa Rwanda. Ang mga DRC nanagtag sing mga harina sang mais, bugas, beans, asin, kalamay, kag mantika sa mga pamilya nga nagakinahanglan. Subong, sobra 7,000 ka pamilya na ang nakabaton sang mga suplay.

Sang nakabaton si Sister Nizeyimana Charlote kag ang iya tatlo ka bata sing mga suplay, nagsiling sia: “Madamo gid nga salamat sa pagpaumpaw ninyo sa amon paagi sa Biblia kag sa paghatag sang mga pagkaon kag sang iban namon nga mga kinahanglanon sa sining mabudlay nga tion bangod sang coronavirus nga pandemic. Indi mapabutyag sang mga tinaga kon ano ang amon nabatyagan.”

Ginsugid man sang isa ka brother kon ano ang natabo sang adlaw nga ginsilingan sia nga may mabaton sia nga mga suplay sang pagkaon para sa iya pamilya. Nagsiling sia: “Sina nga adlaw, nalipong ang akon asawa bangod sa gutom. Dayon may nagtawag sa akon nga brother para hambalan ako nga kuhaon ko ang pagkaon para sa akon pamilya. Daw indi gid ako makapati. Bilog nga gab-i ako nga nangamuyo kag nagpasalamat kay Jehova.”

Antes sang COVID-19 nga pandemic, ginakulang na sa pagkaon ang pungsod, kag mas naglala pa gid ini bangod sang pandemic.

Ang branch office sa Zimbabwe nag-organisar sing lima ka DRC para dumalahan ang pagbulig. Naghimo man sing paagi ang branch para ang mga manugbantala makadonar sang mga pagkaon kag sang iban nga suplay sa mga kauturan nga nagakinahanglan, dayon ginapanagtag ini sang mga DRC.

Subong, nakapanagtag na ang mga DRC sing 62,669 ka kilo sang ginaling nga mais, 6,269 ka litro sang mantika, 3,337 ka kilo sang kapenta (ukon uga nga isda), kag 5,139 ka kilo sang beans sa 7,319 ka manugbantala.

May isa ka mag-asawa nga naga-Bible study kag regular na nga nagatambong sa mga miting nga naubusan sing pagkaon. Nalipay gid sila sang gindul-ungan sila sang pagkaon sang brother nga naga-Bible study sa ila. Antes sina nga adlaw, ginkontak sila sang pastor sang simbahan nga ginatambungan nila sadto. Nangayo ang pastor sa ila sing donasyon para makapang-grocery sia kag ang iya asawa. Nakita gid nila ang kinalain sang mga Saksi ni Jehova kag sang pastor, gani nagdesisyon sila nga maghalin na gid sa ila simbahan.

Sigurado gid nga padayon nga pakamaayuhon ni Jehova ining ministeryo sang pagbulig. Sa amo, ang aton mga kauturan sa Rwanda kag Zimbabwe padayon nga mahatagan sang ila mga kinahanglanon.—Binuhatan 11:29.