Gindumdom sang minilyon ka Saksi ni Jehova, upod sa ila mga bisita, ang Panihapon sang Ginuo sang Martes, Abril 4, 2023. Madamo ang naka-attend sa sining espesyal nga okasyon bisan pa may ginaatubang sila nga mga kabudlayan.

Halimbawa, sa Ukraine, linibo ang naka-attend sa Memoryal bisan pa indi maayo ang tiempo kag may inaway sa pila ka lugar. Bangod indi safe sa isa ka banwa sa eastern Ukraine, ginhatag sang mga elder sa mga kauturan ang recording sang pamulongpulong para sa Memoryal isa ka semana antes pa sini nga okasyon. Pagligad sang pila ka adlaw, nadula ang Internet kag kuryente sa ila lugar, indi bangod sa inaway, kundi bangod sa mabaskog nga bagyo. Pero nakabenepisyo ang kongregasyon, bisan pa wala sang kuryente kag sigesige ang inaway, kay abanse na nila nga nabaton ang narekord nga pamulongpulong sa Memoryal.

Ang 15 anyos nga si Violetta nga taga-Kazakhstan ginahingabot sang pamilya niya. Sa iya lolo sia nagaistar, kag sa sulod sang 20 ka tuig nagapamatok gid ang iya lolo. Ginapunggan pa gani niya ang pamilya nga mag-attend sa mga miting kag ginaguba ang mga literatura nila. Pero bangod palangga niya ang iya apo, amat-amat sia nga nagapamangkot parte sa pagpati sang iya apo. Nakibot si Violetta sang nagpa-Bible study ang iya lolo kag nag-attend sa Memoryal!

Para sa iban, mabudlay mag-attend sa Memoryal bangod malayo ang lugar nga ila ginaistaran. Sa Timor-Leste, gina-Bible study sang mga kauturan paagi sa telepono ang 55 ka tawo nga nagaistar sa mga siudad sang Same kag Suai. Kon magsakay sa motor, ini nga mga siudad mga pila ka oras ang kalayuon sa pinakamalapit nga kongregasyon sang mga Saksi ni Jehova. Gani nagplano ang mga kauturan nga maghiwat sang Memoryal sa sining duha ka siudad sa pribado nga mga balay. Ang isa ka elder nagbiyahe sing apat ka oras para magpamulongpulong sa Memoryal sa siudad sang Same, diin 56 ang nag-attend. Ang isa pa ka elder nagbiyahe sing mga pito ka oras pakadto sa Suai, diin sobra 50 ka tawo ang nag-attend sa Memoryal.

Problema naman sang aton mga kauturan sa Hualpén, Chile, ang pagpangita sang lugar nga hiwatan sang Memoryal. Nangayo sila sing bulig sa isa ka lokal nga opisyal para makakita sang manami nga lugar para sa Memoryal. Mga pila ka oras antes sang Memoryal, nalipay gid ang mga elder sang ginkontak sila sang opisyal nga puede nila gamiton ang cafeteria sang isa ka eskwelahan. Insigida nga ginhimos kag ginhanda sang mga kauturan ang cafeteria para mangin matahom ini nga lugar para sa Memoryal. Nag-attend sa Memoryal ang opisyal kag ang meyor. Ang meyor nagsiling: “Dayaw gid ako sa mga nag-attend kay organisado sila kag may respeto, pati ang mga bata. Ginapasalig ko nga buligan namon kamo sa sunod.”

Nalipay man kita nga mabalitaan nga ang aton mga kauturan sa Monaco narehistro na bilang isa ka relihion sang Nobiembre 2022. Sa tapos nila mahiwat ang Memoryal sa isa ka matahom nga lugar nga ila gin-arkilahan, ang isa ka bisita nagsiling: “Kanami gid sini nga lugar, pero mas manami pa gid ini bangod sa mga tawo nga ari diri.”

Makapalig-on gid nga mabalitaan nga naatubang sang aton mga kauturan ini nga mga sitwasyon kag ang iban pa nga mga kabudlayan para matuman ang sugo sang Cristo nga magtipon “sa pagdumdom” sa iya kamatayon.—Lucas 22:19.