Bag-o lang gin-agyan sang Bagyo Freddy ang East Africa. Amo ini ang isa sa pinakadugay nga bagyo sa kasaysayan. Nagsugod ini sang una nga mga semana sang Pebrero 2023, kag nag-landfall ini sa madamo nga pungsod. Sang Pebrero 21, 2023, gin-igo sini ang Madagascar kag nagtabok ini sa Mozambique Channel pagligad sang pila ka adlaw, dayon ginwaswasan sini ang Mozambique kag Malawi. Nagbaskog pa gid ini kag nag-landfall liwat sa Mozambique sang Marso 11, 2023. Madamo nga probinsia sa Madagascar, Malawi, kag Mozambique ang naapektuhan. Grabe ang pagbaha bangod sang mabaskog nga hangin kag makusog nga ulan sa sini nga mga lugar gani madamo nga balay ang naguba kag sobra 500 ang napatay lakip ang pila naton ka kauturan. Linibo man ang nagbakwit.

Ari ang total nga ginreport sang Marso 27, 2023. Ini nga kadamuon base sa kompirmado nga report sang aton mga kauturan. Pero, posible nga indi lang amo sini, kay ginatinguhaan pa sang mga kauturan nga makuha ang report sa mga lugar nga mabudlay kadtuan.

Madagascar

• 256 ka kauturan kag iban pa nga miembro sang ila panimalay ang nagbakwit

• 8 ka balay ang nawasak

• 29 ka balay ang may guba

• 3 ka Kingdom Hall ang may guba

Malawi

• Makapasubo nga 8 ka kauturan ang napatay kag 6 ang missing

• 3 ka kauturan ang nasamaran

• Indi magnubo sa 4,300 ka kauturan kag ang iban nga miembro sang ila panimalay ang nagbakwit

• 821 ka balay ang nawasak

• 174 ka balay ang may guba

• 20 ka Kingdom Hall ang may guba

Mozambique

• Makapasubo nga 1 ka utod ang napatay kag 1 ang missing

• 880 ka kauturan kag ang iban nga miembro sang ila panimalay ang nagbakwit

• 248 ka balay ang nawasak

• 185 ka balay ang may guba

• 7 ka Kingdom Hall ang may guba

• Madamo pa nga lugar ang indi gihapon makadtuan

• Ang Disaster Relief Committee nagahatag sang dalayunan, pagkaon, tubig, kag iban pa nga suplay sa mga naapektuhan

• Sa Mozambique, may ginpatindog nga temporaryo nga dalayunan sa probinsia sang Gaza para sa 167 ka kauturan kag pamilya nila nga nagbakwit sa Assembly Hall. Ginatos pa ang nagtener sa mga Kingdom Hall kag nagdayon sa iban nga mga balay sa bilog nga rehiyon

• Indi magnubo sa 16 ka balay ang nakay-o na

• Ang mga miembro sang Branch Committee, mga manugtatap sang sirkito, kag ang mga gulang nagabisita sa mga pamilya para tan-awon kon ano ang ila kinahanglan kag paumpawan sila

Bisan pa sa sining mabudlay nga sitwasyon, ang apektado nga mga kauturan padayon gihapon nga nagahiwat sang mga miting kon posible kag nagapalig-unay. Nagasalig kita nga si Jehova padayon nga magahatag sa ila sang “gahom nga labaw sa kinaandan” para buligan sila nga makabatas.—2 Corinto 4:7.