Da yake Iblis ruhu ne, ’yan Adam ba sa iya ganinsa. Amma, baya cikin wutar jahannama wajen da yake wahal da miyagun mutane, kamar yadda aka nuna a hoton da ke biye da wannan talifin.

‘Yaki a sama’

 An kyale Shaidan Iblis ya rika yawo a sararin sama, har ma an ba shi damar shiga wurin da Allah da kuma amintattun mala’iku suke. (Ayuba 1:6) Littafi Mai Tsarki ya annabta cewa za a yi ‘yaki a sama,’ a sakamakon haka, za a kore shaidan daga sama kuma a “jefar da shi a duniya.” (Ru’ya ta Yohanna 12:7-9) Yadda abubuwa suka auku bi da bi da aka rubuta a Littafi Mai Tsarki da kuma abubuwan da suke faruwa a duniya sun nuna cewa an riga an yi wannan yakin. Hakan ya sa Iblis bai da ikon komawa sama.

 Shin hakan yana nufi cewa Iblis yana zama a wani wuri ko gari ne a cikin duniya? Alal misali, an ce a birnin Birgamos na dā ne “mazaunin sarautan Shaitan yake” kuma a wurin ne “Shaidan ke zaune.” (Ru’ya ta Yohanna 2:13) Kila an yi wadannan furucin ne domin irin bauta da yawancin mutane suke yi a wannan birnin da yake da alaƙa da shaidan. Littafi Mai Tsarki ya ce Iblis yana sarauta bisa “dukan mulkokin duniya,” saboda haka, ba ya zama a wani wuri ko gari a duniya amma yana yawo ne kawai a cikin duniya.—Luka 4:5, 6.