Jijọho—Naegbọn E Do Hán Sọmọ to Aihọn Mẹ?
Gblọndo Biblu tọn
Vivẹnudido gbẹtọvi lẹ tọn nado hẹn jijọho wá aihọn mẹ ko gboawupo podọ e nasọ to awugbopo na whẹwhinwhẹ́n voovo lẹ wutu:
“E ma tin to mẹhe to zọnlinzin mẹ nado do afọdide etọn lẹ gba.” (Jelemia 10:23) Gbẹtọvi lẹ ma yin didá po nugopipe lọ po kavi jlọjẹ lọ nado dugán do ode awetọ ji, enẹwutu yé ma sọgan hẹn jijọho he na dẹn-to-aimẹ wá.
“Mì dotudo ahọvi lẹ go blo, kavi do ovi gbẹtọ tọn go, mẹhe mẹ whlẹngán depope ma tin te. Gbọfufu etọn tọ́nyi, ewọ sọ gọ̀ do okọ́ etọn dè; to azán enẹ gbè gee linlẹn etọn lẹ sudo.” (Psalm 146:3, 4, Biblu Wiwe lọ—Gun alada) Ogán aihọn tọn lẹ kakajẹ dehe tindo linlẹn dagbe lẹ ji ma sọgan mọ pọngbọ he na dẹn-to-aimẹ lẹ na nuhe nọ hẹn awhàn wá lẹ gba.
“To azán godo tọn lẹ mẹ, ojlẹ awusinyẹn tọn he vẹawu nado pehẹ lẹ na wá tin. Na gbẹtọ lẹ na yin . . . kanylantọ, mẹhe ma tindo owanyi na dagbewà, mẹdehiatọ, tasinyẹntọ, mẹhe nọ gbọn kikla dali yigo.” (2 Timoti 3:1-4) Mí to gbẹnọ to “azán godo tọn” aihọn ylankan ehe tọn lẹ mẹ, yèdọ ojlẹ de he mẹ walọyizan he gbayipe lẹ nọ glọnalina jijọho te.
“Dindọn na aigba podọ na ohù, na Lẹgba ko jẹte wá mì dè, po homẹgble daho po, na e yọnẹn dọ whenu gli de wẹ emi tindo wutu.”(Osọhia 12:12) Lẹgba he yin kẹntọgán Jiwheyẹwhe tọn ko yin ginglọndo lẹdo aigba tọn mẹ podọ e to gbẹtọ lẹ sisẹ́ nado wleawuna jijọ ylankan etọn nkọ lẹ. Dile e na dẹnsọ bọ ewọ na to “ogán aihọn ehe tọn yin,” mí ma sọgan tindo jijọho pọ́n gbede.—Johanu 12:31.
“[Ahọluduta Jiwheyẹwhe tọn] na gbà ahọludu do flinflin bo sú ahọludu he lẹpo do [he diọnukunsọ Jiwheyẹwhe], ewọ bo nasọ nọte kakadoi.” (Daniẹli 2:44) Ahọluduta Jiwheyẹwhe tọn wẹ na hẹn jijọho kakadoi wá aihọn mẹ, e ma yin gandudu gbẹtọvi tọn depope.—Psalm 145:16.