Jesu ko basi zẹẹmẹ dọ “lẹngbọpa pẹvi” lọ kẹdẹ wẹ na tindo tẹnmẹ to Ahọluduta olọn tọn mẹ. (Luku 12:32) Ṣigba, ahọsumẹ jiawu enẹ mimọyi ma yin nuhe yè dona yí nukunpẹvi do pọ́n. Na nugbo tọn, e zindonukọn nado zinnudeji dọ nujọnu taun wẹ e yin nado tindo pọndohlan he sọgbe eyin mẹde na yin apadewhe Ahọluduta lọ tọn.

Enẹwutu, Jesu na tuli devi etọn lẹ nado wleawudaina kọlilẹwa etọn. E dọmọ: “Mì sọnú bo wleawudai bo gbọ miyọ́ngbán mìtọn ni to jiji, podọ mìlọsu lẹ ni taidi dawe lọ lẹ he to tenọpọn whenue oklunọ yetọn na lẹkọwa sọn alọwle, na whenue e na wá bo húhúhọ̀n yé nido hùn na ẹn to afọdopolọji. Ayajẹnọ wẹ afanumẹ enẹlẹ he oklunọ yetọn wá bo mọ to nukle!”—Luku 12:35-37.

Devi lẹ sọgan mọnukunnujẹ pọndohlan he hodọ Jesu te mẹ po awubibọ po. Devizọnwatọ he go e donù lẹ ko wleawudai bo to tenọpọn kọlilẹwa oklunọ yetọn tọn. Jesu basi zẹẹmẹ dọmọ: “Eyin [oklunọ lọ] wá to mimá awetọ mẹ [sọn nudi ogàn 9 zánmẹ tọn mẹ jẹ ogàn 12 zánmẹ tọn mẹ], kavi etlẹ yin atọ̀ntọ mẹ [sọn nudi ogàn 12 zánmẹ tọn mẹ jẹ nudi ogàn 3 zánmẹ tọn mẹ], bo mọ yé domọ, ayajẹnọ wẹ yé!”—Luku 12:38.

Ayinamẹ ehe na devizọnwatọ lọ lẹ ma yin nado penukundo whégbè-zọ́n go ganji kavi yin azọ́n sinsinyẹnwatọ de poun. Enẹ họnwun to aliho he mẹ Jesu, yèdọ Visunnu gbẹtọ tọn ze ede do apajlẹ lọ mẹ te. E dọna devi etọn lẹ dọmọ: “Mìlọsu ga, mì wleawudai, na ogàn he mẹ mì ma lẹn do wẹ Visunnu gbẹtọ tọn ja.” (Luku 12:40) Enẹwutu, to ojlẹ de mẹ to sọgodo wẹ Jesu na wá. Ewọ jlo dọ hodotọ etọn lẹ, titengbe mẹhe tin to “lẹngbọpa pẹvi” lọ mẹ lẹ ni ko wleawudai.

Pita jlo na mọnukunnujẹ nuhe dọ Jesu te mẹ ganji, enẹwutu e kanse e dọmọ: “Oklunọ, be míwlẹ wẹ hiẹ to apajlẹ ehe dọna kavi na mẹlẹpo?” Kakati nado na gblọndo Pita tlọlọ, Jesu na apajlẹ devo he tindo kanṣiṣa hẹ dehe e dọ jẹnukọn: “Mẹnu wẹ họ̀nkọnsi nugbonọ, nuyọnẹntọ, mẹhe Oklunọ etọn na de do pipli devizọnwatọ etọn lẹ tọn ji nado nọ na yé núdùdù he pé yé to ojlẹ sisọ mẹ? Ayajẹnọ wẹ afanumẹ enẹ, eyin Oklunọ etọn wá bo mọ ẹn to mọwà! Nugbo wẹ yẹn dọna mì: Ewọ na de e do nutindo etọn lẹpo ji.”—Luku 12:41-44.

To apajlẹ he jẹnukọn lọ mẹ, e họnwun dọ “oklunọ” lọ dlẹnalọdo Jesu, yèdọ Visunnu gbẹtọ tọn. Enẹwutu, e sọgbe hẹ lẹnpọn dagbe dọ, “họ̀nkọnsi nugbonọ” lọ ni bẹ sunnu he yin apadewhe “lẹngbọpa pẹvi” lọ tọn lẹ hẹn, podọ yewlẹ wẹ Ahọluduta lọ na yin nina. (Luku 12:32) Tofi, Jesu to didọ dọ omẹ tangan delẹ sọn pipli ehe mẹ na yin dide do “pipli devizọnwatọ etọn lẹ tọn ji nado nọ na yé núdùdù he pé yé to ojlẹ sisọ mẹ.” Enẹwutu, Pita po devi devo he Jesu to nuplọn bosọ to núdùdù na to gbigbọ-liho lẹ po sọgan wá tadona lọ kọ̀n dọ ojlẹ de na wá tin to sọgodo, he mẹ Visunnu gbẹtọ tọn na wá te. Podọ to ojlẹ enẹ mẹ, tito gbesisọ tọn de na tin nado nọ na núdùdù hodotọ Jesu tọn lẹ to gbigbọ-liho, yèdọ “pipli devizọnwatọ” Oklunọ lọ tọn lẹ.

Jesu sọ zinnudeji to aliho devo mẹ nuhewutu devi etọn lẹ dona tin to aṣeji bo na ayidonugo pọndohlan yetọn. Na e yọnbasi dọ mẹde ni lẹzun vọdonanutọ bo tlẹ sọ nọ diọnukunsọ sinsẹ̀n-basitọ hatọ lẹ: “Ṣigba, eyin afanumẹ enẹ dọ to ahun ede tọn mẹ gbede dọ, ‘Wiwá Oklunọ ṣie tọn to dindẹn,’ bo jẹ devisunnu po deviyọnnu lẹ po hò ji, podọ bo nọ dù bosọ nọ nù bo nọ nùmú, Oklunọ afanumẹ enẹ tọn na wá to azán he gbè ewọ ma to nukundo e podọ to ogàn he mẹ ewọ ma yọnẹn, bo na sayana ẹn to aliho sinsinyẹn mẹ bo nasọ na ẹn otẹn etọn do mẹhe ma yin nugbonọ lẹ ṣẹnṣẹn.”—Luku 12:45, 46.

Jesu dọ dọ emi wá nado “flọ miyọ́n de do  aigba ji.” Podọ e wàmọ, na ohó etọn lẹ fọ́n nudindọn sinsinyẹn lẹ dote bo dekọtọn do nuplọnmẹ lalo po aṣa agọ̀ lẹ po hinhẹn zun ovọ́ mẹ. Ehe tlẹ sọ hẹn kinklan wá mẹhe dona tin to kọndopọ mẹ lẹ ṣẹnṣẹn, yèdọ “otọ́ sọta visunnu podọ visunnu sọta otọ́, onọ̀ sọta viyọnnu podọ viyọnnu sọta onọ̀, asu-nọ̀ sọta ovisi podọ ovisi sọta asu-nọ̀.”—Luku 12:49, 53.

Na taun tọn, devi etọn lẹ wẹ e dọ ohó ehelẹ na. Enẹgodo, Jesu lẹ́ pannukọn gbẹtọgun lọ. Suhugan gbẹtọ lọ lẹ tọn ko gbẹ́ kunnudenu he dohia dọ ewọ wẹ Mẹsia lọ lẹ dai, enẹwutu e dọna yé dọmọ: “To whenue mì mọ bọ aslọ súyu to whèyihọ-waji, mì nọ dọ to afọdopolọji dọ, ‘Yujẹhọn na tin,’ e sọ nọ yinmọ. Podọ to whenue mì mọ jẹhọn hùwaji tọn to yìnyìn, mì nọ dọ, ‘Yozò sinsinyẹn na tin,’ e sọ nọ jọ domọ. Mì yẹnuwatọ lẹ, mìwlẹ yọ́n lehe yè nọ tunwun awusọhia aigba po jiwhé-nukunmẹ tọn po go do, ṣigba naegbọn bọ mì ma yọ́n lehe yè nọ tunwun ojlẹ tangan ehe go do?” (Luku 12:54-56) E họnwun dọ yé ma ko wleawudai.