N’yin jiji to Moundsville, yèdọ tòpẹvi de he to Tọ̀sisa Ohio tó to agewaji Virginie-Occidentale tọn to États-Unis. Yẹn wẹ yin ovi awetọ to sunnu atọ̀n yọnnu dopo he mẹjitọ mítọn lẹ ji lẹ mẹ, podọ na mí yin ovi ẹnẹ wutu, e ma yá bọ mí nọ nọ̀ whii to whégbè. Mẹjitọ ṣie lẹ yin azọ́n sinsinyẹn watọ, nugbonọ bo tindo owanyi na mẹdevo lẹ. Mí ma yin adọkunnọ, ṣigba nude ma nọ whè do mí. Taidi Kunnudetọ Jehovah tọn, mẹjitọ ṣie lẹ wà nuhe go yé pé lẹpo nado do nunọwhinnusẹ́n Biblu tọn lẹ do ahun mítọn mẹ to whenue mí gbẹ́ pò to ovu.

Etomọṣo, to whenue n’biọ owhe aflanmẹ tọn mẹ, n’jẹ ayihaawe tindo ji gando nuplọnmẹ he n’mọyi lẹ go. N’nọ kanse dee eyin gbẹzan he yin anadena gbọn nunọwhinnusẹ́n Biblu tọn lẹ dali sọgan tindo zẹẹmẹ kavi hẹn pekọ wá namẹ nugbonugbo. N’nọ lẹndọ mẹdekannujẹ mlẹnmlẹn wẹ yin aliho dopo he nọ namẹ ayajẹ nujọnu tọn. To ojlẹ kleun de godo, n’doalọtena opli Klistiani tọn lẹ yìyì. Awe to nọvi ṣie lẹ mẹ sọ kọnawudopọ hẹ mi to atẹṣiṣi mẹ. Mẹjitọ mítọn lẹ wà nuhe go yé pé lẹpo nado gọalọna mí, ṣigba mí gbẹkọ alọgọ yetọn go.

N’ma lẹn gbede dọ mẹdekannujẹ wunmẹ he dín n’te ehe na wá hẹn mi zun afanumẹ. To gbèdopo, dile n’tọ́n sọn wehọmẹ jei whégbè, họntọn de whlé mi siga. N’kẹalọyi. Bẹsọn gbenẹgbe, n’jẹ mahẹ tindo to walọ ylankan devo lẹ mẹ ji. To nukọn mẹ, n’jẹ amasin-adínọ lẹ po ahàn sinsinyẹn po ṣì zan ji bo nọ doalọ to walọ fẹnnuwiwa tọn mẹ. To owhe he bọdego lẹ mẹ, n’jẹ amasin-adínọ he sinyẹn lẹ zan ji vudevude bo gbọnmọ dali lẹzun afanumẹ na susu yetọn. N’wá peve to e mẹ sọmọ bọ n’jẹ amasin-adínọ lẹ sà ji nado sọgan tindo pekọ to gbẹzan ylankan ṣie mẹ.

Dile n’to tintẹnpọn nado dovọ́na ayihadawhẹnamẹnu ṣie do, mọ wẹ e nọ to finflin mi dọ gbẹzan he zan n’te ylan do niyẹn. Ṣogan, n’nọ lẹndọ whenu ko fẹ́ nado basi vọjlado. Nugbo wẹ dọ gbẹtọ lẹ kẹdẹ wẹ nọ lẹdo mi to agọ́ lẹ tẹnmẹ podọ to núhò-tẹn lẹ, ṣigba n’nọ saba tindo numọtolanmẹ ṣokẹdẹninọ tọn bo nọ jẹflumẹ. To whedelẹnu n’nọ lẹnnupọndo lehe mẹjitọ ṣie lẹ tindo jijọ dagbe bo jọmẹ do ji bosọ nọ kanse dee lehe n’wagbọn do danbú sọn nugbo lọ mẹ.

Mahopọnna dọ yẹnlọsu na dee ko hẹn todido bu dọ n’ma sọgan diọ ba, mẹsusu ma wàmọ. To 2000, mẹjitọ ṣie lẹ basi oylọna mi wá plidopọ agbegbe Kunnudetọ Jehovah tọn lẹ tọn de tẹnmẹ. N’whleawu whẹpo do yì. Ṣigba, nuhe paṣa mi wẹ yindọ nọvi ṣie awe he ko danbú lẹ lọsu wá otẹn lọ mẹ ga.

To plidopọ lọ ji, n’flindọ e ko diblayi owhe dopo todin bọ n’wá pọ́n nuhiho rock tọn de to nọtẹn dopolọ. Ṣigba, vogbingbọn he n’mọ yinuwado ji e yì ahun mẹ. To nuhiho lọ whenu, nọtẹn lọ gọ́ na ogbó po azọ̀ siga tọn po. Suhugan mẹhe wá otẹn lọ mẹ lẹ tọn ma jọmẹ, podọ ohàn lọ lẹ gọ́ na hogbe apọṣimẹ tọn lẹ. Ṣigba to plidopọ lọ ji, mẹhe tindo ayajẹ nujọnu tọn lẹ kẹdẹ wẹ lẹdo mi pé—yé dokuavọna mi po zohunhun po, mahopọnna dọ n’ko mọ yé din owhe ko sẹyì. Nọtẹn lọ tin to wiwe ji podọ hosọ he yin zizedonukọnnamẹ lẹ gọ́ na hogbe he namẹ todido lẹ. Na n’mọ aliho dagbe he mẹ nugbo Biblu tọn nọ yinuwadomẹji te wutu, n’wá kanse dee nuhewutu n’do gbẹkọ e go to tintan whenu!—Isaia 48:17, 18.

Tlolo to plidopọ lọ godo, n’de dide nado gọ̀ jẹ opli Klistiani tọn lẹ yì ji. Numimọ he nọvi ṣie awe lọ lẹ lọsu tindo to plidopọ lọ ji whàn yé nado lẹkọwa nugbo lọ mẹ. Mí omẹ atọ̀n lẹ kẹalọyi plọnmẹ Biblu.

Wefọ Biblu tọn he whàn mi taun wẹ Jakọbu 4:8, he dọmọ: “Mì dọnsẹpọ Jiwheyẹwhe, podọ ewọ na dọnsẹpọ mì.” N’mọdọ eyin n’jlo na dọnsẹpọ Jiwheyẹwhe, n’dona hẹn gbẹzan ṣie jẹ yọyọ. N’dona basi diọdo delẹ, enẹ wẹ yindọ n’dona jo taba nùnù, amasin-adínọ lẹ po ahàn sinsinyẹn ṣiṣizan po do.—2 Kọlintinu lẹ 7:1.

N’gbẹ́ họntọn ṣie hoho lẹ dai, bo wá jihọntọn yọyọ lẹ to sinsẹ́n-basitọ Jehovah tọn lẹ ṣẹnṣẹn. Klistiani mẹho agun tọn he nọ plọn Biblu hẹ mi gọalọna mi taun. E nọ ylọ mi to alokan ji whẹwhẹ, bo nọ dla mi pọ́n nado pọ́n lehe n’te do. Kakajẹ egbé, e yin dopo to họntọn vivẹ́ ṣie lẹ mẹ.

To amakikọ-whenu to 2001, yẹn po nọvi ṣie awe lẹ po yí baptẹm bo gbọnmọ dali dohia dọ mí ko klan míde do wiwe na Jiwheyẹwhe. Yí nukun homẹ tọn do pọ́n lehe ayajẹ mẹjitọ ṣie lẹ po nọvisunnu ṣie he hẹn nugbonọ-yinyin etọn go tọn na ko sù do sọ, to whenue whẹndo mítọn wá jẹ Jehovah sẹ̀n ji to pọmẹ.

To dai, n’nọ lẹndọ nunọwhinnusẹ́n Biblu tọn lẹ nọ glọnalinamẹ gbau, ṣigba todin n’nọ pọ́n yé hlan taidi hihọ́-basinamẹnu họakuẹ de. Biblu gọalọna mi nado doalọtena amasin-adínọ zinzan po sisà po, bọ n’gbọnmọ dali lẹzun gbẹtọ-jọ-gbẹtọ.

Todin, n’tindo lẹblanulọkẹyi lọ nado yin apadewhe pipli sinsẹ̀n-basitọ Jehovah tọn lẹ tọn lẹdo aihọn pé. Omẹ ehelẹ yiwanna ode awetọ nugbonugbo, podọ yé nọ sẹ̀n Jiwheyẹwhe to pọmẹ. (Johanu 13:34, 35) N’mọ dona vonọtaun de to pipli mẹmẹsunnu lẹ tọn ehe mẹ—enẹ wẹ asi ṣie Adrianne, mẹhe n’yiwanna taun bo nọ wlebòna. Mẹdatọ mítọn sinsẹ̀n to pọmẹ hẹn ayajẹ susu wá na mí.

Kakati nado dómọna gbẹzan ṣejannabi tọn, n’to sinsẹ̀n todin taidi lizọnyizọnwatọ whenu-gigọ́ tọn de, bo nọ plọn gbẹtọ lẹ lehe yelọsu sọgan mọaleyi sọn Ohó Jiwheyẹwhe tọn mẹ do. Azọ́n ehe ko hẹn ayajẹ daho hugan wá na mi. Todin, n’sọgan sọalọakọ́n po nujikudo po dọ Biblu ko diọ gbẹzan ṣie. N’wá mọ mẹdekannujẹ he dín n’te.