HOSỌ OPLỌN TỌN 28
OHÀN 123 Litaina Tito Yẹwhehọluduta Tọn
Be A Yọ́n Nugbo lọ Ya?
“Mì nọte gligli bo yí gbànnú nugbo tọn do blagbajana alinkàn mìtọn.”—EFE. 6:14.
NUHE E BẸHẸN
Hosọ ehe na plọnazọ́n mí nado nọ doayi vogbingbọn he to nugbo he mí ko plọn sọn Jehovah dè po lalo he Satani gọna nukundiọsọmẹtọ mítọn lẹ nọ zedaga lẹ po ṣẹnṣẹn go.
1. Etẹwẹ nọ yin numọtolanmẹ towe gando nugbo lọ go?
OMẸ Jehovah tọn lẹ nọ yiwanna nugbo he to Ohó Jiwheyẹwhe tọn mẹ. Nugbo enẹ ji wẹ mí ze yise mítọn sinai do. (Lom. 10:17) Mí ko wá yise dọ Jehovah do agun Klistiani tọn ai taidi “dòtin podọ alọgọ nugbo lọ tọn.” (1 Tim. 3:15) Humọ, po ayajẹ po wẹ mí nọ litaina “mẹhe to anadenanu” to ṣẹnṣẹn mítọn lẹ dile yé to zẹẹmẹ nugbo he to Biblu mẹ tọn basi bosọ to anademẹ he to kọndopọ mẹ hẹ ojlo Jiwheyẹwhe tọn lẹ na.—Heb. 13:17.
2. Sọgbe hẹ Jakọbu 5:19, owù tẹwẹ mí nọ pannukọn whenue mí ko yọ́n nugbo lọ godo?
2 Etomọṣo, to whenue mí ko kẹalọyi nugbo lọ gọna adà he titobasinanu Jiwheyẹwhe tọn nọ yiwà nado wleawuna ayinamẹ dejidego lẹ godo, mí gbẹ́ gán yin hinhẹn danbú. (Hia Jakọbu 5:19.) Satani ma na jlo nudevo de hugan nado sisẹ́ mí nado hẹn jidide mítọn bu to Biblu mẹ kavi to anademẹ he mí nọ mọyi sọn titobasinanu Jiwheyẹwhe tọn dè lẹ mẹ.—Efe. 4:14.
3. Naegbọn mí dona tẹdo nugbo lọ go gligli? (Efesunu lẹ 6:13, 14)
3 Hia Efesunu lẹ 6:13, 14. To madẹnmẹ, Lẹgba na yí nujijla oklọ tọn huhlọnnọ de zan nado doyẹklọ akọta lẹpo nado diọnukunsọ Jehovah. (Osọ. 16:13, 14) Mí gán sọ donukun dọ Satani na dovivẹnu dogọ nado doyẹklọ omẹ Jehovah tọn lẹ. (Osọ. 12:9) Enẹwutu, nujọnu wẹ e yin dọ mí ni plọnazọ́n míde nado nọ yọ́n vogbingbọn to nugbo lọ po lalo po ṣẹnṣẹn bosọ nọ setonuna nugbo lọ. (Lom. 6:17; 1 Pita 1:22) Whlẹngán mítọn to nukunbibia daho lọ whenu na sinai do mọwiwà ji!
4. Etẹwẹ mí na gbadopọnna to hosọ ehe mẹ?
4 To hosọ ehe mẹ, mí na mọ jẹhẹnu awe delẹ he na gọalọna mí nado yọ́n nugbo he wá sọn Biblu mẹ lọ, bosọ nọ kẹalọyi anademẹ he wá sọn titobasinanu Jiwheyẹwhe tọn dè lẹ. Enẹgodo, mí na gbadopọnna ayinamẹ atọ̀n delẹ he mí na hodo nado sọgan tẹdo nugbo lọ go gligli.
JẸHẸNU HE MÍ DO HUDO ETỌN NADO YỌ́N NUGBO LỌ LẸ
5. Nawẹ budisi Jehovah nọ gọalọna mí nado yọ́n nugbo lọ gbọn?
5 Budisi Jehovah. Eyin mí wleawuna obu he sọgbe na Jehovah, mí nọ yiwanna ẹn sọmọ bọ mí ma na jlo gbede nado wà nudepope he na hẹn homẹgble e. Na mí nido sọgan tindo nukundagbe Jehovah tọn, mí nọ to jejeji nado yọ́n vogbingbọn to dagbe po oylan po ṣẹnṣẹn podọ to nugbo po lalo po ṣẹnṣẹn. (Howh. 2:3-6; Heb. 5:14) Mí ma dona dike gbede na obu gbẹtọ tọn ni sinyẹn hú owanyi mítọn na Jehovah, na nuhe nọ hẹn homẹ gbẹtọ lẹ tọn hùn wẹ nọ saba hẹn homẹgble Jehovah wutu.
6. Nawẹ obu gbẹtọ tọn zọ́n bọ ahọvi Islaelivi ao lọ lẹ slokọna nugbo lọ gbọn?
6 Eyin gbẹtọ wẹ mí na dibusi hugan Jiwheyẹwhe, mí gán yin hinhẹn danbú sọn nugbo lọ mẹ. Lẹnnupọndo apajlẹ ahọvi 12 he yì bẹ̀ aigba he Jehovah dopà nado na Islaelivi lẹ pọ́n tọn lẹ ji. Obu he ao to amẹ́ lọ lẹ mẹ di na Kenaninu lẹ sinyẹn hú owanyi yetọn na Jehovah. Yé dọna Islaelivi hatọ yetọn lẹ dọmọ: “Mí ma sọgan hẹji yì hoavùn sọta mẹlọ lẹ, na yé dohuhlọn hú mí.” (Sọh. 13:27-31) To pọndohlan gbẹtọvi tọn mẹ, Kenaninu lẹ dohuhlọn hú Islaelivi lẹ, podọ hójọhó wẹ enẹ yin. Amọ́ mẹdepope he dọ dọ Islaelivi lẹ ma na penugo nado gbawhàn kẹntọ yetọn lẹ tọn, hò Jehovah do apadopo. Amẹ́ ao ehelẹ dona ko ze ayidonugo do nuhe Jehovah jlo dọ Islaelivi lẹ ni wà ji. Yé sọ dona ko lẹnayihamẹpọn do nuhe ewọ ko wà na yé ojlẹ kleun de jẹnukọn lẹ ji. To whenẹnu, yé na mọdọ Jehovah dohuhlọn hú Kenaninu lẹ adó gbàn. To vogbingbọn mẹ na amẹ́ he yise whèdo enẹlẹ, Jọṣua po Kalẹbi po jlo na tindo nukundagbe Jehovah tọn. Yé dọna gbẹtọ lọ lẹ dọmọ: “Eyin homẹ Jehovah tọn hùn do mí go, ayihaawe ma tin dọ e na plan mí yì aigba ehe ji bo yí i na mí.”—Sọh. 14:6-9.
7. Nawẹ mí gán hẹn budisi mítọn na Jehovah siso deji gbọn? (Sọ pọ́n yẹdide lọ.)
7 Nado hẹn budisi mítọn na Jehovah siso deji, mí dona na ayidonugo homẹ etọn hinhẹn hùn to nudide he mí nọ basi lẹpo mẹ. (Salm. 16:8) Dile a to kandai Biblu tọn lẹ hia, nọ kanse dewe dọ, ‘Eyin yẹn wẹ to ninọmẹ enẹ mẹ, nudide tẹwẹ n’na ko basi?’ Di apajlẹ, yí nukun homẹ tọn do pọ́n dewe hlan dile a to todoai bọ ahọvi Islaelivi ao lọ lẹ to linlin agọ̀ yetọn lẹ na. Be a na yí nuhe yé dọ sè bo joawuna obu gbẹtọ tọn wẹ ya kavi owanyi towe na Jehovah po ojlo towe nado hẹn homẹ etọn hùn po na duto obu lọ ji? Whẹndo Islaelivi lẹ tọn blebu gboawupo nado wle nugbo he dọ Jọṣua po Kalẹbi po te. Taidi kọdetọn de, dotẹnmẹ lọ nado biọ Aigba Pagbe tọn lọ ji gbọ̀ yé go.—Sọh. 14:10, 22, 23.
Mẹnu wẹ a na ko yise? (Pọ́n hukan 7tọ)
8. Jẹhẹnu tẹwẹ mí dona dovivẹnu nado wleawuna, podọ etẹwutu?
8 Whiwhẹ. Jehovah nọ de nugbo lọ hia whiwhẹnọ lẹ. (Mat. 11:25) Whiwhẹ wẹ zọ́n bọ mí yigbe dọ yè ni gọalọna mí nado plọn nugbo lọ. (Owalọ 8:30, 31) Amọ́, mí dona payi ma nado lẹzun goyitọ. Goyiyi gán zọ́n bọ mí na nọ mọdọ pọndohlan mítọn sọgbe kẹdẹdile nunọwhinnusẹ́n Owe-wiwe lẹ tọn gọna anademẹ he wá sọn titobasinanu Jehovah tọn dè lẹ sọgbe do.
9. Nawẹ mí gán hẹn whiwhẹ mítọn go gbọn?
9 Nado to whiwhẹnọ yin zọnmii, mí dona nọ flindọ mí whè taun yijlẹdo kiklo-yinyin Jehovah tọn go. (Salm. 8:3, 4) Mí gán sọ nọ hodẹ̀ nado wleawuna whiwhẹ gọna ojlo lọ nado yin pinplọn. Jehovah na gọalọna mí nado nọ yí nukun nujọnu tọn do pọ́n linlẹn etọn he e nọ wleawuna gbọn Ohó etọn po titobasinanu etọn po gblamẹ lẹ hugan mítọn titi lẹ. To Biblu hihia towe whenu, nọ dín nuagokun he dọhodo lehe Jehovah yiwanna whiwhẹ bo ka gbẹwanna goyiyi, glòlò-jijlá po sakla po do ji. Podọ, to aṣeji taun nado hẹn whiwhẹ towe go eyin a mọ lẹblanulọkẹyi sinsẹ̀nzọn tọn de yí, he zọ́n bọ a diyin jẹ obá de mẹ.
LEHE MÍ GÁN TẸDO NUGBO LỌ GO GLIGLI DO
10. Mẹnu lẹ wẹ Jehovah nọ yizan nado na nudọnamẹ po anademẹ lẹ po omẹ etọn lẹ?
10 Nọ dejido anademẹ yẹwhehọluduta tọn lẹ go. To Islaeli hohowhenu tọn, Jehovah yí Mose zan bosọ yí Jọṣua zan to godo mẹ nado na anademẹ omẹ Etọn lẹ. (Jọṣ. 1:16, 17) Islaelivi lẹ mọ dona yí whenue yé pọ́n sunnu ehelẹ hlan taidi afọzedaitọ Jehovah Jiwheyẹwhe tọn lẹ. Owhe kanweko susu lẹ to enẹgodo, whenue agun Klistiani tọn yin didoai to tintan whenu, apọsteli 12 lẹ wẹ nọ na anademẹ lẹ. (Owalọ 8:14, 15) To nukọn mẹ, pipli enẹ wá gbloada bo bẹ mẹho devo lẹ hẹn to Jelusalẹm. “Agun lẹ to yinyin hinhẹn lodo zọnmii bo to jijideji to sọha mẹ egbesọegbesọ” dile yé to tonusena anademẹ he yé mọyi sọn sunnu nugbonọ ehelẹ dè. (Owalọ 16:4, 5) To ojlẹ mítọn mẹ ga, mílọsu nọ mọ dona lẹ yí eyin mí hodo anademẹ yẹwhehọluduta tọn he wá sọn titobasinanu Jehovah tọn dè lẹ. Amọ́, nawẹ e na ṣí na Jehovah eyin mí gbẹ́ nado kẹalọyi mẹhe ewọ de lẹ? Mí gán mọ gblọndo na kanbiọ enẹ eyin mí gbadopọnna nuhe jọ whenue Islaelivi lẹ to yinyin anadena yì Aigba Pagbe tọn lọ ji.
11. To Islaeli hohowhenu tọn, etẹwẹ jọ do mẹhe diọnukunsọ nudide Jiwheyẹwhe tọn nado yí Mose do basi nukọntọ lẹ go? (Sọ pọ́n yẹdide lọ.)
11 To gbejizọnlin Islaelivi lẹ tọn jei Aigba Pagbe tọn lọ ji whenu, e jẹ fide bọ sunnu nukundeji delẹ diọnukunsọ Mose po azọ́n he Jehovah de na ẹn lọ po. Yé dọmọ: “Pipli lọ pete [e ma yin Mose kẹdẹ] wẹ yin wiwe, yèdọ yemẹpo, podọ Jehovah tin to ṣẹnṣẹn yetọn.” (Sọh. 16:1-3) Dile etlẹ yindọ nugbo wẹ dọ to nukun Jiwheyẹwhe tọn mẹ, “pipli lọ pete” yin wiwe, Jehovah ko de Mose nado deanananu to omẹ Etọn lẹ ṣẹnṣẹn. (Sọh. 16:28) To whenue atẹṣitọ lọ lẹ mọhodọdo Mose go, Jehovah go wẹ yé to homọdọdo na taun tọn. Yé ma ze ayiha do nuhe yin ojlo Jehovah tọn ji; nuhe jlo yé wẹ yé na ayidonugo, enẹ wẹ huhlọn po yindidi po. Jiwheyẹwhe và nukọntọ lọ lẹ sudo na atẹṣiṣi yetọn wutu, podọ obá dopolọ wẹ hò omẹ fọtọ́n susu devo lẹ he kọngbedopọ hẹ yé. (Sọh. 16:30-35, 41, 49) To egbehe, mí gán kudeji dọ Jehovah ma nọ kẹalọyi mẹhe ma nọ na sisi anademẹ he wá sọn titobasinanu etọn dè lẹ.
Mẹnu wẹ a na ko nọgodona? (Pọ́n hukan 11tọ)
12. Naegbọn mí gán hẹn jidide mítọn to titobasinanu Jehovah tọn mẹ go?
12 Mí gán hẹn jidide mítọn go to titobasinanu Jehovah tọn mẹ. Eyin e wá họnwun dọ mí dona basi vọjlado de gando nukunnumọjẹnumẹ mítọn do nugbo Biblu tọn de ji go kavi gando aliho he mẹ azọ́n Ahọluduta lọ tọn yin tito-basina te go, mẹhe to anadenanu lẹ ma nọ whleawu nado basi diọdo he e biọ lẹ. (Howh. 4:18) Yé nọ wàmọ, na hugan nudevo depope yé nọ jlo na hẹn homẹ Jehovah tọn hùn. Yé sọ nọ wà nuhe go yé pé lẹpo nado ze nudide yetọn lẹ sinai do Ohó Jiwheyẹwhe tọn ji, yèdọ nujinọtedo he omẹ Jehovah tọn lẹpo dona nọ setonuna.
13. Etẹwẹ yin “ohia ohó he sọgbe lẹ tọn,” podọ etẹwẹ mí dona yí i do wà?
13 ‘Nọ tẹdo ohia ohó he sọgbe lẹ tọn go gligli.’ (2 Tim. 1:13) “Ohia ohó he sọgbe lẹ tọn” nọ dlẹnalọdo nuplọnmẹ Klistiani tọn he to Biblu mẹ lẹ. (Joh. 17:17) Nuplọnmẹ enẹlẹ wẹ yin dodonu nuhe mí yise lẹpo tọn. Titobasinanu Jehovah tọn ko plọn mí nado tẹdo yé go gligli. Dile e na dẹnsọ bọ mí na to mọwà, mí na yin didona.
14. Nawẹ Klistiani delẹ gboawupo nado tẹdo “ohia ohó he sọgbe lẹ tọn” go gbọn?
14 Etẹwẹ gán jọ eyin mí zẹ̀ sọn “ohia ohó he sọgbe lẹ tọn” lọ go? Pọ́n apajlẹ ehe. To owhe kanweko tintan whenu, e taidi dọ yèdọ-yèdọ de gbayipe to Klistiani delẹ ṣẹnṣẹn he dohia dọ azán Jehovah tọn ko wá. E gán ko yindọ wekanhlanmẹ de he mẹlẹ lẹndọ apọsteli Paulu wẹ kàn mẹ wẹ linlin ehe te. Kakati Klistiani Tẹsalonika tọn delẹ ni wle-agbọ́-mì bo vọ́ nudọnamẹ ehelẹ gbeje pọ́n, yé yí yèdọ-yèdọ lọ sè bo tlẹ sọ jẹ hinhẹn ẹn gbayipe ji. Yé ma na ko yin yẹdoklọ eyin yé ko flin nuhe Paulu ko plọn yé whenue e gbẹ́ topọ hẹ yé wẹ. (2 Tẹs. 2:1-5) Paulu na ayinamẹ mẹmẹsunnu etọn lẹ ma nado nọ yí nuhe yè nọ dọna yé lẹpo sè. Podọ nado gọalọna yé to nukọn mẹ, Paulu dotana wekanhlanmẹ etọn hlan Tẹsalonikanu lẹ po hogbe ehelẹ po: “Nudọdomẹ ṣie die, he yẹn Paulu yí alọ ṣie titi do kàn, ehe yin ohia de to wekanhlanmẹ lẹpo mẹ; lehe yẹn nọ kanwe do die.”—2 Tẹs. 3:17.
15. Nawẹ mí gán basi hihọ́na míde sọn lalo he nọ taidi nuhe sọgbe lẹ si gbọn? Na apajlẹ. (Sọ pọ́n yẹdide lọ lẹ.)
15 Etẹwẹ mí gán plọn sọn hogbe Paulu tọn lẹ hlan Tẹsalonikanu lẹ mẹ? Eyin mí sè nude he gbọnvona nuhe mí ko plọn sọn Biblu mẹ, kavi eyin mí sè yèdọ-yèdọ he hẹnmẹ jọsi de, mí dona yí zinzin zan. To Union soviétique hohowhenu tọn, e ko jọ pọ́n bọ kẹntọ mítọn lẹ hẹn wekanhlanmẹ de gbayipe bo dolalo dọ tatọ́-tẹnnọ wẹ e wá sọn. Wekanhlanmẹ lọ na tuli mẹmẹsunnu delẹ nado do titobasinanu de ai na yede dovo. Wekanhlanmẹ lọ na ede taidi nuhe sọgbe. Amọ́ mẹmẹsunnu nugbonọ lẹ ma yin yẹdoklọ. Yé mọdọ nudọnamẹ he to wekanhlanmẹ lọ mẹ lẹ ma sọgbe hẹ nuhe ko yin pinplọn yé lẹ. To egbehe, kẹntọ nugbo lọ tọn lẹ nọ yí nuyizan nuyọnẹn wintinwintin tọn egbezangbe tọn lẹ zan to whedelẹnu nado hẹn mí biọ bẹwlu mẹ bosọ klan mí. Kakati nado “yawu hẹn lẹnpọn dagbe [mítọn] bu,” sọwhiwhe yíyí do gbadopọnna eyin vlavo nuhe mí sè kavi hia lẹ sọgbe hẹ nugbo he mí ko plọn lẹ gán basi hihọ́na mí.—2 Tẹs. 2:2; 1 Joh. 4:1.
A dike lalo he nọ taidi nugbo lẹ doyẹklọ we blo (Pọ́n hukan 15tọ) a
16. Sọgbe hẹ Lomunu lẹ 16:17, 18, etẹwẹ mí dona wà eyin mẹdelẹ zẹ̀ sọn ali nugbo lọ tọn ji?
16 Gbọṣi kọndopọ mẹ hẹ mẹhe yin nugbonọ na Jehovah lẹ. Jiwheyẹwhe nọ jlo dọ mí ni basi sinsẹ̀n hlan emi to kọndopọ mẹ. Mí na gbọṣi kọndopọ mẹ dile e na dẹnsọ bọ mí na tẹdo nugbo lọ go. Mẹdepope he zẹ̀ sọn ali nugbo lọ tọn ji nọ hẹn kinklan wá agun lọ mẹ, enẹwutu Jiwheyẹwhe na mí avase nado “dapana yé.” To alọ devo mẹ, mílọsu gán yin hinhẹn danbú sọn nugbo lọ mẹ.—Hia Lomunu lẹ 16:17, 18.
17. Ale tẹlẹ wẹ mí nọ mọyi eyin mí yọ́n nugbo lọ bosọ tẹdego gligli?
17 Eyin mí yọ́n nugbo lọ bosọ tẹdego gligli, mí na to ganji to gbigbọ-liho bo nasọ lodo. (Efe. 4:15, 16) Mí na yin hihọ́-basina sọn nuplọnmẹ lalo po nujijla oklọ tọn Satani tọn lẹ po si, podọ mí na gbọṣi hihọ́ mẹ dile Jehovah to nukunpedo mí go to nukunbibia daho lọ whenu. Mì gbọ mí ni zindonukọn nado nọ tẹdo nuhe yin nugbo go, podọ “Jiwheyẹwhe jijọho tọn nasọ nọhẹ [mí].”—Flp. 4:8, 9.
OHÀN 122 Nọte Gligli, Masẹafọ!
a ZẸẸMẸ YẸDIDE TỌN: Nujijọ he yin vivọbasi de do nuhe jọ to owhe susu lẹ die wayi hia, bọ mẹmẹsunnu he to Union soviétique hohowhenu tọn lẹ mọ wekanhlanmẹ de he taidi nuhe wá sọn tatọ́-tẹnnọ amọ́ na nugbo tọn kẹntọ mítọn lẹ dè wẹ e wá sọn. To egbehe, kẹntọ mítọn lẹ gán yí Intẹnẹt zan nado hẹn nudọnamẹ agọ̀ lẹ gbayipe gando titobasinanu Jehovah tọn go.
